Dt 14
14
1Ayon ti' yuninal on Jehová co Diosal. Manchak jak' yasjok co mimanil, tamwal co tzukon el xil co jolom bay co satak yet chi cam junok anima, 2yujtol ayon ti', is conobal Jehová co Dios jayji. A Cham max on sic'on el bay xol juntzanxa conoblak bay sat tx'otx' ti', yet chon occan is conobok.
No no' chi chilayi, c'al no no' c'am chi chilayi
(Lv 11.1-47)
3C'am che chi' no no' man watx'ok yul sat ley.
4Tixton is listail no no' chi je' e chion ti': No wacax, no calnel, no chiwo, 5no gacela, no tx'ucchej, no gamos, no xolakilteal chiwo, yetokc'al masanil pojanil no antílope. 6Chi je' e chion masanil no no' tol chi jutx' yan, cax tol pojan nan yisk'ak. 7A pax juntzanxa no' ti xin, c'am chi je' e chion no':
A ton no camello, no tejón, c'al no txitx. A juntzan no' tu' man watx'ok no'; chi jutx' no yan, palta tol xiwil yisk'ak no'.
8Axca no txitam, pojan nan yisk'ak no', palta c'am chi jutx' no' yan. A no' tu', yowalil che na' tol man watx'ok no'. Manchak e chi' juntzan no' tu', tamwal che mitx' yet camnakxa.
9A pax masanil no' ay bay yulak a' aej xin, chi je' e chion no' ta ay is xic', c'al tuminal yin. 10A pax no' c'am yet xin, c'am che chi' no'. Yowalil che na' tol man watx'ok no'.
11Masanil no tz'iquin, watx' chi je' e chion no', 12palta ay juntzan no' c'am chi je' e chioni: axca no águila, no quebrantahueso, no asor, 13no' gallinaso, no milano, 14yetok c'apax masanil pojan no joj; 15no avestruz, no lechuza, no teẍeliẍ, yetokc'al masanil pojanil no tx'acbaj, 16no tonton, no ibis, c'al no cisne, 17no pelícano, no ostoc, c'al yetok no cormorán, 18no cigüeña, no garza, no abubilla, c'al yetok no sotz'.
19Masanil no coc'lak no' ay is xic' chi ec' yin bulanil, man watx'ok no'. C'am chi je' e chion no'. 20A pax no coc'lak no' tol ay is xic' albilxa tol watx', chi je' e chion no'.
21C'am che chi' junok no' toc'al chi camaj axcac'al tu', yujtol a jun conobal on ti', sic'bil on el yuj Jehová co Diosal. Palta chi je' e yak'on bay eb tx'ok conobal cajan ec' e xol tu'. A eb tu' chi je' chioni, ma xin, chi je' c'apax e txonon bay eb tx'ok conobal, toc'al chi ec'jab e xol.
Manchak e txic no yune' chiwo xol yal yim is txutx.
Chekbanilej yuj yak'lay diezmo
22Junjunc'al abil yowalil che pojcan el is diezmoal sat e yawoj che waja'. 23A ton diezmo che yiel yin e trigo, yin e vino, c'al yin e yaceite, yetok c'apax yin babel yune' e wacax, c'al yin babel yune' e calnel. A no' tu' che chi' ayex ti' bay satak Jehová co Diosal, a ton bay jun lugar, tol a Cham ok sic'on el yet chi oc ayilal bay, yet watx' miman yelapnok Cham yul e sat. 24Ta a jun lugar bay chi oc ayilal tu', yelxac'al najat chi can bay ay e yatut, xan ta c'am chi je' e yiontok diezmoal e tzet yetal ok yak' Jehová ayextac'al bay tu', 25chi je' e txonon el e diezmo tu', axa ch'en tumin che yitok bay jun lugar max sic'can el Cham tu'. 26Axa yetok ch'en tumin tu' chi je' e manon bay tu' tzet chi cha' e c'ul: axca no wacax, ma no calnel, ma vino, ma junokxa makan uq'ueja' tol max pajbi; mac'al juntzanokxa tzet yetal chi yochej e c'ul, cax chex low satak Jehová bay tu', che chaon k'in yetok e familia.
27Manchak e yintaknejcan el eb levita cajan bay yul e conobal. Ilab tol maj yi eb tx'otx' tx'otx' is satakok axca e yet ayex ti'.
28Yin oxox abil che pojcan el is diezmoal sat e yawoj che waj yet jun abil tu'. A tu' che wajbaj bay yul e conobal tu', 29xan a yet ok apnok oc eb levita tol maj cha' is tx'otx' satakok e yetok, ma eb tx'ok conobal cajan ec' e xol, ma eb meba' c'amxa mam c'amxa txutx, c'al eb xal ix camnakxa yichamil, chi je' loon eb e diezmo wajan ec' tu'. Caytu' ok yun yak'on Jehová co Diosal yaxilal yiban masanil tzet che yun tu'.
Currently Selected:
Dt 14: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
