Dn 10
10
A tzet max yil Daniel bay ti a' aej Tigris
1A yet is yox abil yoc cham Ciro yin reyal bay Persia, ay tzet max tx'oxlay yil Daniel, ac'al oc chi yik Beltzasar. Caw wal yel tzet max yil tu', palta ya' nachaj el tzetbil wal yelapnok. Axa Daniel xin, max cam wal naoni, cax max nachaj el yuj, xan max yal axca ti':
2A wal yet juntzan c'ual tu', oxeb wal semana caw wal ayin oc yin cusc'ulal. 3C'am loj watx' max in lo', maj wablej jabok chibej, tamwal max wuc' vino, c'amc'al jabok perfume max waoc win masantac'al max eq'uel oxeb semana tu'. 4A yet 24 waay babel xajaw yet abil tu', ayin ec' bay is ti a' miman aej Tigris. 5Max in toj t'ananok, max wilon jun winak ayoc pichilej naba lino yuj, c'al jun c'alilej naba oro tol watx'. 6Toxac'al chi jopopi is mimanil axca ch'en topacio, toxac'al chi jopopi yili is sat axca letz'lon, axa is bak' sat tol chi chaw k'ak'al axca tzektebalej. Axa is k'ab c'al yakan, tol chi jopopi axca ch'en bronce caw nululixac'al, axa yul is nuk' axca wal yoc yul is nuk' junok miman bulan anima.
7Asan in wal max je' wilon jun tu', a pax masanil eb anima ayic' wetok maj yil eb, yujtol max jayoc xiwc'ulal yin eb, cax max toj eb c'uban el ba. 8Asannej in wal ayin ec' in tx'oklil cax max wilon jun tu', caw wal max pax in chiq'uil, c'amxa wip max wabej. 9A wal yet max waben k'anjab aj tu', max paxxac'al wip, max c'ayil in c'ul, axa way nojnaj sat tx'otx' tu'. 10Axa max yun xin, max oc lacan jun k'abej win, cax max in yion ajok, masantac'al max je' waj txacan yetok jolom in penec c'al yetok in k'ab. 11Cax max yalon ayin axca ti': Daniel, ach tol ochebil ach yuj Dios, chi cam wal aben tzet ok wala'. Ajan wanok yujtol max in cheklaytek ayach, ẍi.
A wal yet max lajwi yalon juntzan k'anej tu', toxc'a chin lukloni, max in oc lecanok. 12Catatu' max yalon ayin: Ach Daniel, manchak ach xiwi. Max yab Dios a txaj yettax babel c'ual max aon wal oc yin a c'ul oc yin ayilal bay. Yuj a tewilal tu' xan max in cheklaytek ayin ti'. 13A jun ángel yajaw yayji bay is makbej Persia, a' max in mitx'on oc waan yin jun is cawinak c'ual. Axa pax Miguel, jun ángel tol yajaw c'apax yayji, a' max jayoc colwaj wetok, tol max cancan c'atan eb yajawilal Persia. 14Xan a tinani', chi ul wal ayach yuj tzet ok ec'tok yiban a conob ti' yet lajub c'ual, yujtol a jun tzet ok tx'oxlay ela' chi yal yuj tzet ok uj yet yajtok tu', ẍi.
15A yet lanan yalon juntzan k'anej tu' ayin, c'amxac'al junok belan k'anej max wala', toxac'al t'anan in ay sat tx'otx'. 16Axa max yun xin, ay jun lajan yili axca anima, ayman max oc matxan yin in ti'. Axa walon bay jun lecan oc in satak tu': Mamin, a yuj jun tzet max wil ti' max in oc yin bilc'ulal yuj, cax c'amxa wip chi wabej. 17¿Tzet wal ok yun in k'anjab ayin a chekbej in ti' etok, Mamin? Tutun wal c'amxa wip, cax c'amxa chi wi in cak'ek' chi wabej, quin chi.
18A jun lajan yili axca anima tu' max oc pax matxan win junelxa, cax max wion pax wip. 19Max yalon ayin axca ti': C'am chach xiwi, c'am chach oc il. A Dios caw wal chach yochej. Asan tol cha tec'baj a ba, ẍi.
Yak'ban lanan wal k'anjab ayin tu', cax max wion wal wip max wabej, max waloni: Mamin, k'anjaban ayin, yujtol max jay pax wip junelxa oj, quin chi bay. 20-21Cax max yalon ayin: ¿Ojtakmi tzet yuj xan chin jay ach ul wiloni? Ti wal ok wal ayach tzet yetal tz'ibbil ay yul tx'an libro tol yel. A tinani' ok wak'lej pax owal yetok jun ángel yajaw yayji bay Persia. A yet ok lajwok wak'len owal yetok tu', cax ok jay pax oc jun ángel yajaw yayji bay Grecia. A yin jun owal tu', asan wal Miguel, jun ángel yajaw yayji bay a conob Israel chi colwaj wetok.
Currently Selected:
Dn 10: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
