Col 2

1Chi wochej chi nachaj el e yuj, tol caw chin lajoc ex wak'on serbil c'al eb aj conob Laodicea. Chi wak' c'apax serbil masanil eb creyente c'amto bay chin iloni. 2Chi wochej chi ak'lay tec'anil e nabal yetok eb, jun lajanxanejokab e camc'ulnen e ba e masanil. Chi wochej chex jelanbi yin yet Dios, yet watx' chex texac'al tec'anbi. Ta axca tu', ok nachaj wal el e yuj jun man ojtakbilok yet yalantok tu', tol a ton Cristo. 3Asan yuj Cham, xan chi je' nachaj el masanil jelanil Dios juj, c'al masanil ojtakbilal. 4Chi waltok juntzan ti' ayex, yet watx' c'am mac chi ion aytek e sat yetok montebal k'anej, yujtol ay mac caw jelan yalon yet ayex. 5Caxc'al c'am in ec' yin mimanilejal e yetok bay tu', palta axca tol caw ayin ec' e yetok. Yuj tu', caw chin tzaloj yet chi wabeni tol watx' e yak'on bay tu', tec'an che yut e yaon oc e c'ul yin Cristo.

6Yuj tu', axca max e yut e chaon Cham Jajawil Jesucristo, axcaokab tu' che yut e beybal yul k'ab tinani'. 7Axcaokab junok te te' caw xiwil xe', caw watx' ch'ibi, axcaokab tu' che yut e nabal yul k'ab Cristo. Tec'an che yut e yaon oc e c'ul yin, axca max yun yak'lay e cuyu'. Alek yuj diosalil bay Dios yin tojbalk'inal.

Chi yak' Dios co k'inal yetok Cristo

8Che yilc'al e ba. Manchak e cha' etax el e nabal yuj juntzan eb chi yut ba cuywajwomal yin yalon el tzet chi cuyu'. Caw jelan eb yin lek'tial, palta c'am jabok yelapnok tzet chi yal eb tu', yujtol manak bay Cristo chi tit jun yet eb tu'. Asan beybal yichmam eb chi yala', c'al juntzanokxa cuybej yulyibank'inal ti'.

9Tz'akan yayji oc Dios yin is mimanil Cristo. 10Yuj tu', caw tz'akan onxa tinani', yujtol junnej jayji yetok. A Cham ayoc yajawilal yiban masanil eb ayoc yajawilal, c'al yiban juntzan eb ay yikbej c'am chi jil oc yin. 11Ak'bil exxa circuncidar tinani', yujtol junxanej e yayji yetok Cristo. Manak circuncisión chi oc yin co mimanil chi wala', palta a co colbanilal el yul k'ab co yob ochwanilal. A jun ti' chi wala' tol ak'bil onxa circuncidar yuj Cham. 12A yet max ex ak'lay bautizar, junej max yun e muklay yetok Cristo yul sat Dios. Yetok c'apaxok, ictzojnak ex yetok, yujtol che yaoc e c'ul yin is yipalil Dios. A is yipalil tu' max on yictzoj aj Cristo xol eb camnak. 13A yet yalan, camnak ex el yul sat Dios yuj e yobtakil, yujtol mayex ak'bilok circuncidar; palta tinani', junnej max yut yak'on Dios co k'inal yetok Cristo, cax max yak'on lajwok co yobtakil. 14Ay jun tzet axca tol jequej aytek jiban yet yalan, yujtol maj jikej juntzan ley; palta a Dios max ak'on lajwok jun axca tol yunal co jec tu'. Max yiel jiban. Axca tol max mak'lay oc yin curus yetok lawuẍ. 15A yet max cam Cristo yin te curus tu', max yak' ayc'ay juntzan ayoc yajawilal, juntzan ay is yikbej. A yul sat anima, max tx'oxk'abnej elok, tol c'am wal jabok yelapnok eb. Max can eb yalan yuj yin junelnej.

Yowalil chi jaoc co c'ul yin tzet ay bay satcan

16Yuj tu', ta ay mac chex beyc'ulnen yuj tzet che lo' che yuq'uej, man e cha' yal eb ayex. Ta chi yaltek eb is mimek k'in ayex, c'al k'in yet chi alji xajaw, ma yuj c'ual xewilal, man e cha' yal eb ayex. 17Masanil juntzan ti', c'am jabok yelapnok. Yenelc'al juntzan tzet yetal t'inan jayi yayji ocok. A jun ay yenel tu', a ton Cristo. 18Ay eb chi ochen chi ion ec' e paktzil ok yak' Dios, palta man e cha' e yab tzet chi yal eb ayex. Caxc'al caw yaynakilxac'al chi yut ba eb, cax chi yaon ay ba eb bay eb ángel, comonc'al chi yatok ba eb xol tzet man yojtakok. Comonc'al chi maynej ba eb, yujtol caw jelan eb naoni. 19Yuj tu', c'amxa chi yaoc eb nabal yin Cristo. Palta axca co jolom, caytu' yayji Cham ayon, yujtol a' chi ak'on jip. Yuj Cham, xan junxanej chi juncan el co masanil, cax chon aj can axca chi yochej Dios.

20A tinani', camnak exxa yetok Cristo jetok yul sat Dios, c'amxa yelapnok juntzan comon cuybanilej yet yulyibank'inal ti' ayon. Yuj tu', ¿tzet yuj xan axca beybal eb yet yulyibank'inal ti', cay pax tu' e beybal? ¿Tzet yuj xan ac'ala' e yaon oc e nabal yin comon chekbanilej yet anima? 21A juntzan chekbanilej tu', comonc'al chi yak' yowalil junok tzet tol c'am pax yowalil yuj Dios. Ilab tol chi yal axca ti': Ay juntzan tzet c'am chi je' che mitx'a'. Ay juntzan tzet c'am chi je' che lo', c'am chi je' che jeka', ẍi. 22Palta a juntzan chi al-layi tol ay yowalil tu', c'am yelapnok ayon, yujtol a juntzan tu', chi co k'anbalnejc'alta'a, ayman chi lajwi c'apax elok. A juntzan chi al-lay tu', comon chekbanilej yayji, anima chi naon aj juntzan cuybanilej tu' yul yet. 23Yel toni, cochwal watx' juntzan chekbanilej tu'. Chi ton yaltek tol yowalil ay junok mac bay chi jal co ba. Yowalil chi jiay co ba, chi jak' techaj yailal co mimanil ti'; palta a juntzan tu', c'am jabok yopiso con is tenon oc wanaj junen yochwan co mimanil yin tzet man watx'ok.

Currently Selected:

Col 2: ATBYK89

Highlight

Copy

Compare