2 Co 7

1Ex in camc'ulnebil, a ton juntzan ti' yalnak Dios, yet max yak'on is ti' ayon. Yuj tu', co bekekcan tzet chi iontok co mimanil yetok co nabal yin tzet man watx'ok. Yowalil tz'akan chi jaoc co ba yul k'ab Dios yuj chon xiw bay Cham.

Is cusc'ulal eb aj Corinto ocnak

2Aek oc yin e c'ul tzet chi jala'. Ilab c'am junok ex bay ocnak co mul. C'am junok ex max etax el e nabal juj. C'am c'apax junok ex max ex jetnej. 3Man yujok waon oc junok tzet yetal e yiban, xan chi waltok juntzan ti' ayex, yujtol toxa mayal waltok ayex, tol caxc'al tzet chi jayoc jiban, ayexc'al oc yin co c'ul masantac'al camich. 4Caw wal yip in c'ul e yayji, cax chex wal watx'il. Caxc'al xiwil tzet chi alay oc jiban, palta caw chi wi' in mimanc'ulal e yuj chi wabej. Caw chin tzaloj sic'libil e yuj.

5A yet max on jayoc bay Macedonia ti', c'am chi xew co mimanil ti', yujtol xiwilxa yailal max jay jiban. Owalc'al max alay oc jiban. Ay bay chi jayoc xiwilal jin. 6Palta chi mimanc'ulnej Dios masanil mac ayoc yin cusc'ulal, xan a Cham max ak'on mimanil co c'ul, yuj max jayoc Tito cayti'. 7Man asannejok yuj max jayoc Tito xan max jion mimanil co c'ul, palta caw chon tzaloj c'apaxok, yujtol max e mimanc'ulnej Tito ti' yet max ec' ayex. A' max alon ayin, tol xiwil che yochej che yiloc win. Max yalon c'apaxok, tol xiwil chi cus e c'ul yuj jun tzet max uj e xol tu'. Max yaloni, tol caw xiwil chin e na'. Yuj tu', caw max aj can in tzalojc'ulal e yuj.

8Caxc'al max cus e c'ul yuj tzet chi yal tx'an carta wanaktok ayex, palta c'amxa chin cus yuj tinani'. Max in cus ton yuj yet babelal, yet max wabeni tol max ex ak'lay cus yuj, janic' tiempoal. 9Axa tinani xin, caxc'al max ex cus yuj, palta chin tzaloji, yujtol a e cusc'ulal tu' max on e naon e ba. Max ex cus axca chi yochej Dios. Yuj tu', c'am jabok max jak' etax el e nabal. 10Ta chon cus axca chi yochej Dios, a jun co cusc'ulal tu' chi ak'on na ba co c'ul, cax chon colchajcanok. Ta caytu' yelapnok, maj on texac'al cusaj yuj, palta a is cusc'ulal yulyibank'inal ti', asanc'al camich chi yitek. 11Palta ayex ti', max ex cus axca chi yochej Dios. Yuj tu' naektek, tzet max yun e yeloc yuj. Caw yelc'ulal wal tol max ex oc il, cax max e yalontek tzet max el e yunen yuj e colon e ba. Max tit e yowal yuj jun tzet max uj e xol tu', max ex xiw c'apax aj yuj. Xiwil max e yochej max ex k'anjab wetok. Max el yin e c'ul e yak'on cuenta nak max oc is yobtakil tu' yuj e tx'oxk'abnen elok tol c'am e locanil yin jun is mul nak tu'. 12Yuj tu xin, a yet max in tz'ibentok jun in carta tu', man yujok nak max oc is mul tu' xan max in tz'ibejtok, tamwal c'apax yuj jun mac bay max oc mul nak tu'. Palta yuj ok nachaj el e yuj, tol a yul sat Dios, caw ay ton e camc'ulal jin. 13Yuj tu', caw max ji' can co mimanc'ulal. Palta man asannejok co mimanc'ulal max ji'. Caw wal max texac'al aj can co tzalojc'ulal yet max yalon Tito, tol caw wal max yak' tzalojbok c'ul e yetok, yujtol c'am tzet max na' e yuj e masanil. 14Walnak bay Tito ti' tol watx' ex. A tinani xin, man yobok chin can chi wabej, yujtol walnak axca tu'. Masanilc'al tzet walnak ayex yelc'al elok. Ac'ala' c'apax yet max wal bay Tito tol watx' ex, tutun yel, xan max wala'. 15A Tito ti', caw wal ay is camc'ulal e yin tinani', yujtol chi natek tol che yikej tzet yalnakcan ayex, cax chi naon c'apaxtek tol yin ayilal max e yut e chaon apnok ayex tu', cax miman yelapnok yul e sat. 16Caw chin tzaloj tinani', yujtol chi je' ex waon oc yipok in c'ul.

Currently Selected:

2 Co 7: ATBYK89

Highlight

Copy

Compare