2 Co 12

Juntzan tzet yetal max tx'oxcan el Dios bay Pablo

1Nabac'al chi wetnej in ba walon in ba watx'il. Yel watx' tol a juntzan axca wayichej wilnak chi waltok ayex, c'al juntzanxa tx'oxbil ayin yuj Cham Jajawil. 2Ay jun winak wojtak tol caw ayoc yin Cristo. 14 abilxa tinani' max ilay ajtok satcan bay ayic' Dios. Man wojtakok ta tojnak yetok is mimanil, ma c'amak. Asan Dios yojtak. 3Caxc'al tojnak yetok is mimanil, ma c'amak, man wojtakok. Asan Dios yojtak. Asan jun wojtak, 4tol max ilaytok bay jun lugar chi yik paraíso. A bay tu' max yab yoc juntzan k'anej tol c'am axca, cax c'am chi chalay yal-lay elok. 5A jun winak tu', asan ok wi' can. Axa ayin xin, maj wi' can in ba. Ay juntzan tzet ayoc win chi tx'oxk'abnen elok, tol c'am jabok welapnok. Asan juntzan tu' ok waltok yet ok in maynen in ba jabok. 6K'inalok yelc'ulal chi wochej chi wi' can in ba tinani', maj in k'anjab axca junok mac c'am is nabal, yujtol asan mi tzet yetal yel chi wala', palta maj in maynej in ba axca tu', yujtol chi wochej tol c'am junok mac chi naoni, tol yel miman welapnok yintak tzet chi yil eb win c'al tzet chi yab eb waloni.

7A juntzan tzet yetal max tx'oxlay ayin bay satcan tu', caw miman ton yelapnok. Yuj tu', ay is may wion can in ba yuj. Yuj tu', ay jun in yailal max yaoc Satanás, yuj in yetneni. Axca wal junok miman q'uix jekantok yul in chibejal jun yailal tu'. Max oc jun yailal tu' win, yet watx' c'am chi wi' can in ba. 8Oxel max in k'anil jun in yailal tu' win bay Cham Jajawil. 9Palta tix max yut yalon Cham ayin ti': K'okbilc'al in watx'c'ulal ayach yet chi techajc'al oj. Yujtol a yin eb c'am jabok yip yul yet, a tu' chi txecloj wal el wipalil ayin ti', ẍi ayin. Yuj tu', caw chin tzaloj yuj c'am wipalil, yet watx' chi aj can yipal Cristo win. 10Yuj tu', chin tzaloj tinani', yujtol c'am wipalil. Caxc'al chin buchlayi, caxc'al ay tzet caw chi oc wuj, caxc'al chi wil yailal, caxc'al chi wab yail yuj Cristo, palta caw chin tzalojc'al. Yujtol a yet c'am jabok welapnok, a ton yet tu' chi aj can yipal Cristo win.

Max oc is bilc'ulal Pablo yuj eb creyente aj Corinto

11Axca tol c'am ton in nabal yet max walon oc in ba watx'il ayex, palta ayex max quin e yak' pural waloni, yujtol ayex e moj quin e yalon watx'il. Ay mactxel chi tz'ak yaloc ba chekbejok Cristo, caw miman yelapnok eb e yaloni. Caxc'al c'am jabok welapnok, palta c'am jabok ec'ban yelapnok eb tu' wintak. 12A yet max in ec' e xol, max in tec'baj in ba in mulnaji. Max in tx'oxil juntzan milagro, c'al juntzan tzet yetal chi tx'oxon el yikbej Dios. Max c'ayaj e c'ul yuj juntzan max el wunen tu'. A juntzan tu' chi txeclonen elok tol chekbej in Cristo. 13Axca watx'il max ec' wut in ba bay eb creyente bay junjun iglesia, axca tu' max ec' wut in ba ayex. Asan tol maj wak' in ba e cuentanej yuj in gasto. Palta caw che yak' mimanc'ulal win yuj jun in paltail max oc ayex tu'.

14A tinani', toxa wal chin toj yet yoxelal ayex tu'; palta man ok wak' in ba e cargonej, yujtol c'am chi wochej oc tzetak yetal ayex, palta a ex caw chex wochej. A eb mamej, moj chi wajbaj eb is tumin, cax chi yak'on eb bay yuninal. Manak eb uninalej chi wajbaj is tumin, cax chi yak'on bay is mam c'al bay is txutx. 15Ayin ti', chin bek in c'ulok lajwi el masanil tzet ayin, asan ta chi watx'jican oc e nabal. Caxc'al ok lajwok in mimanil ti' yin ex wak'on serbil, palta ok in tzalojc'alta'a, caxc'al a yet chi aj can in camc'ulal e yin, chi aytek e camc'ulal win.

16Ay juntzan eb, caxc'al tol yojtak tol c'am bay max wak' in ba e cargonej, palta chi yal eb tol yetok in jelanil max wiaytek e sat yin wion tzet yetal e yin. 17¿Mac junok eb max in chektok ayex tu' max ion aytek e sat? 18Max in k'an bay Tito yet chex toj il-lay yuj, cax max in chekontok junxa juẍtak yetok. ¿Tom max bet yiaytek Tito tu' e sat xin? Mantok tol lajanc'al max ec' jut co beybal on e nan e xol. Lajanc'al max ec' jut co nabal on.

19Tekan che na' tol toc'al chi jiil jin e satak, palta c'amak paxok. Satak wal Dios lanan walontok juntzan ti' ayex, axca chi yochej Cristo, yet watx' che yi' e yip, ex wuẍtak, ex wanab camc'ulnebil. 20C'am chi wochej chex toj wil tinani', a wal ta c'am che yut e ba axca wal chi wochej, a wal ta c'am c'apax chi wut in ba axca wal che yochej. C'amto chi wochej chin toj ayex tu', a wal ta aytoc'al owal e xol, c'al chichonc'ulal, c'al k'ak'alc'ulal. Talaj ay ex che yi' can e ba. Talaj ay ex che yal-lej e k'umal. Talaj ay ex che luesnej e ba, talaj ay ex che buchlej e ba, cax talaj ay ex lanan e somchaj elok. 21Majto yal in c'ul chin toj ayex junelxa, a wal ta chin yak' q'uixwok aj co Diosal e satak. A wal ta chin ok' e yuj, yujtol yettaxc'al yalantok, xiwil ex max e beybalnej tzet man watx'ok. C'amc'al wal che bekcan e beybalnen yobtakil tu' yetok e mimanil, axca ajmulal, yetokc'al juntzan tzet tol caw wal q'uixwiltak chi el e yuneni.

Currently Selected:

2 Co 12: ATBYK89

Highlight

Copy

Compare