1 Ts 3
3
1Palta maj ex techaj co naoni, xan max co nabalnej el co can co tx'oklil bay conob Atenas ti', 2cax max co chekontok Timoteo ti' ayex, yujtol yak'omal serbil Dios jetok yin yalon el k'anejal yet colbanilej aycan yuj Cristo. A' max toj yuj yak'on e tec'anil. Max toj yuj yaon oc e nabal, yet watx' che ya wal oc Cristo yin e c'ul, 3c'al yuj yalon e yabej, yet watx' c'am ex chi somchaj el e nabal yuj tzet bay lanan e yaben yail. E yojtakxa tol yowalil chi jay juntzan yailal ti' jiban. 4A yet max on ec' ayex tu', max jaloncan ayex, tol yowalil chi jab yail, xan e yojtakxa. Mayal wal yun axca max jut jaloncan tu'. 5Yujc'al wal tu', maj ex techaj in naoni, xan max in chektok Timoteo toj yabentek, ta ayc'al oc Cristo yin e c'ul. A talaj c'uxan chi ak'lay somchaj el e c'ul yuj nak diablo, cax nabac'al mi max jetnej co ba co mulnaj e nan e xol.
6Axa tinani xin, ti' mayal betic' Timoteo ayex. Max yala' tol ac'ala' ayc'al oc Cristo yin e c'ul, cax ayc'al e camc'ulal yin. Max yalon c'apaxok tol naan onc'al e yuj masanil tiempo, cax chon e camc'ulnenc'al, cax tolab che yochej che yil jin. Ilab on c'apaxok, caw wal xiwil chi jochej chi jil e yin. 7Ayon ti' ex wuẍtak, ex wanab, xiwil tzet yetal chi jayoc jiban, lanan wal jilon yailal cayti', palta a yet max jabeni tol ayc'al oc Cristo yin e c'ul, max jay wal co tzalojc'ulal e yuj. 8A yet max jabeni tol tec'anc'al waay e nabal yin Cham Jajawil, axca wal tol max ji' jun xikokxa co k'inal e yuj. 9Yuj tu' xan caw wal chi jal yuj diosalil bay Dios e yuj, yujtol caw wal chon tzaloj e yuj satak Cham. 10C'ualil c'al ak'balil chi jak' jip co txajli, yuj co k'anontok co ba ex toj jiloni, cax chi cam wal co tz'aktzencan e tec'anil tu'.
11Chi jochej chi oc co Mam Dios, c'al Cham Jajawil Jesucristo jetok, yet watx' chi je' co toj ayex tu'. 12Chi jochej chi yak' mimanbok Cham Jajawil e camc'ulal, yet watx' che camc'ulnelej e ba wal sic'libil, cax ok je' e camc'ulnen masanil anima axca chex jut co camc'ulneni. 13Chi jochej tol a Cham chi ak'on tec'anbok e nabal, yet watx' ac'ala'c'al watx'il e beybal, cax c'am jabok e yobtakil yul sat co Mam Dios yet ok jay Cham Jajawil Jesucristo yetok eb yet-xa yayji.
Currently Selected:
1 Ts 3: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
