1 Co 15
15
Yabixal yictzojbail Cristo
1A tinani' ex wuẍtak, ex wanab, chi wochej che natek jun k'anejal yet colbanilej max walcan ayex. A jun abix ti', chabilxa e yuj. Caw tec'an e waay yin tinani', 2ta ayc'al oc e nabal yin jun abix max walcan ayex tu', ta yel wali max e yaoc e c'ul yin, ay e colbanil yuj.
3A juntzan cuybanilej chabil wuj, a max babji walon ayex. Tol a Cristo max cam yuj co mul, axca tz'ibelaycan yul tx'an Un Tz'ibbilcanok. 4Max mukayi, palta max ictzonelay pax aj yet cabjial, axca tz'ibelaycan yul tx'an Un tu'. 5Max tx'oxaj ba bay Pedro. Catatu' max tx'oxon aj ba bay juntzanxa eb is chekbej. 6Max lajwi tu', max tx'oxon aj ba bay ec'ban 500 eb jet creyenteal. Wajan ec' eb cax max yilon eb masanil. Xiwilto eb tu' iquis tinani', palta ay jaywan eb camnakxa. 7Max tx'ox c'apax aj ba bay Jacobo, yetok bay masanil juntzanxa eb is chekbej Cham.
8Yintakilxac'al tu', max tx'oxon aj ba ayin, yujtol axca junok unin manto yaljubalok, cayin tu'. Yujtol lajubxac'al max quin oc is chekbejok. 9Yuj tu' xan ayin ti', yaynakil wayji xol juntzanxa eb chekbej Jesucristo tu'. Toltax man in mojok wal-lay oc chekbejok yetok eb, yujtol etnebil eb yiglesia Dios wuj yetok yailal. 10Axa tinani xin, asan yuj is watx'c'ulal Dios, xan ayin oc yin wopiso ti', palta man nabac'alok max tx'ox is watx'c'ulal tu' win, yujtol ec'ban in mulnajil yintak eb wet chekbejal masanil. Palta man in tx'oklilok chin mulnaji; a Dios chi mulnaj wetok yuj is watx'c'ulal. 11Yuj tu', caxc'al ayin max wala', ma tol a juntzanxa eb chekbej Jesús max aloni, ac'al oc jun k'anejal yet colbanilej tu' chi jala'. A ton jun ti' che yaoc yin e c'ul.
Yet ok ictzoj aj eb camnak
12A jun k'anejal yet colbanilej chi jal ti', a chi alontek tol max ictzonelay pax aj Cristo xol eb camnak. Yuj tu', ¿tzet yuj xan ay ex che yal tinani', tol c'am chi je' yictzoj aj eb camnak? 13Ta yel c'am chi je' yictzoj aj eb, axca e yalon tu', man mi ictzonebilok aj Cristo chi yal tu'. 14Yetok c'apaxok, ta maj ictzonelay aj Cham, a jun k'anejal yet colbanilej chi jalil ti', c'am mi jabok yelapnok. Ta axca tu xin, nabac'al mi che yaoc yin e c'ul. 15Yetok c'apaxok, lek'ti' testigo on mi Dios, yujtol max jala', tol max ictzonelay aj Cristo yuj Dios. K'inalok ta c'am chi je' yictzoj aj eb camnak axca e yalon jaywanok ex tu', maj mi ictzonelay aj Cristo yuj Dios. 16Yujtol ta c'am chi je' yictzoj aj eb camnak tu', tamwal c'apax mi max ictzonelay aj Cham. 17K'inalok ta maj ictzonelay aj Cham, nabac'al mi che yaoc e c'ul yin, yujtol aytoc'al mi oc e yobtakil e yiban. 18Yetok c'apaxok, junelnej mi camnak el eb creyente camnakxa. 19Ta asan yuj jab co k'inal bay yulyibank'inal ti' xan chi jaoc Cristo yipok co c'ul, yelxac'al mi ok'bal on c'ul yintak masanil anima chi yal tu'.
20Akxa tinani', wal yel ictzonebil aj Cristo xol eb camnak. Axca junok babel sat awoj, caytu' max yun yictzonelay aj Cham co satak, yuj tx'oxk'abnen elok, tol ok on ictzonelay c'apax ajok. 21Asan yuj jun winak, a ton Adán, xan max titcan camich jiban co masanil. Ac'ala' c'apax asan yuj junxa winak, a ton Cristo xan ok ictzonelay aj eb maxax cami. 22Masanil anima ok camok, yujtol yinatil Adán masanil. Axa co masanil tol yet onxa Cristo ti', ok on ictzonelay pax ajok. 23Junjunc'al yin is txolilal. Babel max ictzonelay aj Cristo. Axa yet ok jay Cham yet is cayelal, cax ok on ictzonelay aj ayon yet onxa Cham ti'. 24Ok lajwok tu', cax ok jay lajubal, cax ok ak'lay lajwok el masanil eb yajaw yuj Cristo, c'al eb ay yopiso, yetok masanil juntzan eb ay yikbej. Catatu bian, ok yacan oc yopiso yul k'ab Cham Dios Mamej. 25Yujtol a Cristo, yowalil ok oc reyal, masantac'al ok can masanil mac ajc'ul oc yin yalan yuj. 26Ay c'apax junxa tzet axca tol ajc'ul oc jin bay yulyibank'inal ti', a ton camich. A jun lajub ajc'ul ok lajwok yuj Cristo, a ton camich tu'. 27Yujtol max yacan oc Dios Mamej masanil tzetak yetal yul k'ab Cristo. Palta caxc'al ayoc masanil tzetak yetal yul is k'ab, axca ta' chi yal tx'an Un Tz'ibbilcanok, c'am yoc Cham Dios Mamej xol juntzan tu', yujtol a Dios chi ak'on masanil tzetak yetal tu' yul is k'ab. 28A yet mayal yacan oc Cham masanil tzetak yetal yul k'ab is C'ajol tu', catatu' a wal caw Cham C'ajolej tu' ok yaoc ba yul k'ab is Mam, Cham beknej oc masanil tzetak yetal tu' yul is k'ab. Catatu bian, asanxanej Dios ok yajawbok yiban masanil.
29A tinani', ay eb chi ak'lay bautizar q'uexelok eb camnak, palta ta man ok ictzoj pax aj eb camnak tu', ¿tzet yuj xan ay eb chi ak'lay bautizar q'uexelok eb xin?
30Yetok on c'apaxok, ¿tzet yuj xan chi jak'c'al co ba yul k'ab camich masanil tiempo? 31Ayin ti' ex wuẍtak, ex wanab, junjunc'al c'u ijan chin mak'lay camok. Wal yel chi wal ayex, caw wal chin tzaloj e yuj, yujtol ayoc Cham Jajawil Jesucristo yin e c'ul wetok. 32A bay Efeso ti', axca tol max wak'lej owal yetok no chiwajwom no'. Ta asan yuj tzet yetal yetc'al yulyibank'inal ti', ¿tzet wal yuj max wetnej in c'ul axca tu'? Ta man ok ictzoj aj eb camnak, yel mi watx' chi jak' co nabal tinani'. K'inalok tatol man ok on ictzonelay ajok, lowokonek, juq'uek an, yujtol talaj a yet yecal chon cami.
33Manchak e yak' e ba etnelay yuj junok lek'tial. Ta ay eb yob beybal chon ec' yetok, ok etax el co watx' beybal yuj eb. 34Naek e ba sic'libil, cax watx'nejek oc e nabal. Manchakxa e yun tzet man watx'ok. Chi wal jun ti' yujtol ay ex c'amto wal che yojtaknej el Dios. A yuj e q'uixwilok, xan chi waltok.
A tzet ok yun jictzonelay ajok
35Tekan ay junok ex ok e k'anlej el ayin axca ti': A eb camnakxa chal tu', ¿tzet ok yun yictzonelay aj eb? ¿Tzetbil yili mimanil eb yet ok ictzonelay aj eb tu'? tekan quex chi. 36Ta ayex che na axca tu', tita' tol c'amto e nabal xin. K'inalok junok tzanc'al tzet inatil tinani'. Ta c'am chi jawaytok yul tx'otx', ¿tzet ok yun yelol xe' yin comonc'al? A yet chi jawoni, axca tol chi cam chi jila'. 37A yet chi jawon jun inat tu', manak is txutxal chi jawaytok. Caxc'al trigo, ma junokxa tzanc'al tzet inatil chi jawa', asan bak' ma sat chi jawa'. 38Axa Dios chi aon oc txutxal junjun inat tu' axca chi yochej c'ul, atac'ala' tzet inatil junjun. 39A masanil tzetak yetal yulyibank'inal ti', tx'ok tx'okc'al is mimanil junjun makan. Tx'ok yel co mimanil ayon anima on ti'. Tx'ok yel is mimanil no no' caneb yakan. Tx'ok pax yel is mimanil no tz'iquin. Ac'ala' tx'ok c'apax yel is mimanil no txay. 40Ay satcanil mimanilej, ay c'apax sattx'otx'al mimanilej. A satcanil mimanilej tu', ay watx'ilal tx'ok yel yintak sattx'otx'al mimanilej. 41A juntzan tzet ay satcan tu', tx'ok tx'ok yel tzekekial junjun. Tx'ok yel tzekekial c'u, tx'ok yel tzekekial xajaw. Tx'ok c'apax yel tzekekial junjun waycan. 42Ac'ala' cayton tu' ok yun eb camnak yet ok ictzonelay aj eb. Chi mukay aytok jun co mimanil tol c'un k'a ti', axa yet ok ictzonelay aj tu', c'amxa oxlajon bak'in ok camok. 43A yet ok mukay co mimanil ti', c'am jabok watx'il yoqui, cax c'am yelapnok jabok. Axa yet ok ictzonelay aj xin, yelxac'al watx' ok yun co mimanil tu' cax mimanxa yelapnok. 44A yet ok muklay co mimanil ti', naba chibejc'al yayji ocok. Axa jun co mimanil ok ictzonelay aj tu xin, yet-xa espíritu. Ay jun co mimanil naba chibejc'al ti', yuj tu' xan jojtak c'apaxok tol ay pax jun co mimanil yet-xa espíritu.
45Caytu' tz'ibelaycan yul tx'an Un bay chi yal axca ti': A nak babel winak, a ton Adán, max iquisbi ajok, ẍi. Palta ay junxa mac tzunanxa max jayi, axca Adán tu' yayji; a junxa tu', espíritu ak'on k'inalej toni. 46Manak jun co mimanil yet espíritu max babji yak'lay ayon. Palta tol a jun chibej mimanilej max babji yak'layi. Tzunanilto ok ak'lay co mimanil yet espíritu tu'. 47A nak babel winak, yin tx'otx' tx'otx' max tit nak. Yuj tu' xan yet yulyibank'inal ti' yayji nak. Axa jun winak yet is cab tu xin, yet satcan yayji. 48Axcac'al jun mimanilej tol tx'otx' tu', cayc'al tu' co mimanil ti', yet c'apax yulyibank'inal ti' yayji. Palta axca is mimanil Cham aj satcan tu', caytu' jun co satcanil mimanil ok co cha'. 49A tinani', lajan co mimanil ti' yetok jun tx'otx' mimanilej tu'. Axa yet jun tiempoal tu', lajanxa ok yun co mimanil yetok yet Cham aj satcan.
50Ex wuẍtak, ex wanab, chi wochej c'apax chi waltok junxa ti' ayex. A co mimanil ti', c'am chi je' yapni bay ayic' Dios. A co mimanil ti', cambejal yayji, yuj tu' c'am chi je' chaon k'inalej tol ayc'al yin tojbalk'inal. 51Palta ay jun tzet c'am mac ojtaknen yul yet. Chi wochej che yojtaknej el tinani'. Man co masanilok ayon creyente on ti' ok on camok, palta co masanil ok q'uexponelay co mimanil ti'. 52A jun tu' yin aymanil ok ujok. Yin junnej mutz'satil ok yun jayi, yet ok xulay ch'en lajub trompeta. A yet ok xulay ch'en trompeta tu', cax ok ictzoj aj eb creyente camnak. Axa yet mayal ictzoj aj eb tu', c'amxa oxlajon bak'in ok cam eb. Axa ayon iquis onto yet tu xin, toxac'al ok q'uexponelaycan el co mimanil ti'. 53Yujtol a co mimanil ti', c'un yetaxtok. Yuj tu' xan yowalil ok co cha' jun co mimanil c'am bak'in ok etaxtok tu'. A co mimanil ti', cambejal yayji. Yuj tu' xan yowalil ok co cha' jun co mimanil tol c'amxa bak'in ok cam tu'. 54A yet ok co chaon junxa co mimanil tu', catatu' bian ok yunen el jun tzet tz'ibbilcan yul tx'an Un bay chi yal axca ti': A camich ok can yalan, yuj yipal Dios, 55xan a tinani', tx'oxokabtek camich tu' yipalil yin yak'on c'ayil anima. Tx'oxokabtek camich tu' yikbej yin c'aywajwomal, ẍi yul tx'an Un tu'. 56Yuj co yobtakil, xan ay yipalil camich tu' on yak'on camok. A ley Dios max ak'oncan yikbej co yobtakil tu' co cam yuj. 57Palta yuj wal dios bay co Mam Dios, yujtol chi occ'al Jesucristo is C'ajol jetok, xan chi cancan camich yalan juj.
58Yuj tu' ex wuẍtak, ex wanab camc'ulnebil, caw tec'anc'al che yut e ba. E yak'ta' cabc'ulal. Yinokab masanil e c'ul chex mulnajc'al yin yet Cham Jajawil yujtol e yojtakxa, tol a co mulnajil yin yet Cham manc'al nabaok.
Currently Selected:
1 Co 15: ATBYK89
Highlight
Copy
Compare
Share
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
