Sal 99
99
A Jehová Yajal d'a eb' rey
1A Jehová Rey toni, a d'a yib'an̈ eb' querubín ayq'ue sc'ojnub'. Tz'ib'xi nivac chon̈ab' yuj xivelal, tz'ib'xi pax masanil lum luum.
2Nivan ton yelc'och Jehová d'a tzalan Sion. A' ay yopisio d'a yib'an̈ masanil chon̈ab'.
3Alchajocab' vach' lolonel d'ay, yujto nivan ton yelc'ochi, te ay smay, Axon̈ej Ochi.
4Mamin, a ach tic Rey ach toni, masanil syal uuj, tza xajanej tojolal. A ach a b'onaccani to lajann̈ej tz'aj sch'olb'itaj junjun anima. A d'ayon̈ yin̈tilal on̈ can vin̈aj Jacob tic ix ac' tojolal yed' vach'ilal.
5Ex vetchon̈ab', quiq'uecchaan̈ sb'i Jehová co Diosal. Con̈ emec cuman d'a yichan̈ yujto Axon̈ej Ochi.
6A vin̈aj Moisés yed' vin̈aj Aarón, ec'nac eb' vin̈ d'a scal eb' sacerdote Dios chi'. A vin̈aj Samuel ec'nac vin̈ d'a scal eb' lesalvinac d'a Jehová. Ix tac'vi d'a eb' ayic ix sc'anan scolval eb'.
7D'a scal jun topan̈ asun ix lolon Dios yed' eb'. A sc'ayb'ub'al yed' schecnab'il ix yac' d'a eb', ix sc'anab'ajej eb'.
8Mamin Jehová co Diosal, ix ach tac'vi d'a a chon̈ab'. Ix ac' nivanc'olal smul eb', palta ix ac' pax syaelal eb' yuj schucal.
9Ex vetchon̈ab', quiq'uecchaan̈ sb'i Jehová co Diosal. Con̈ emec cuman d'a yichan̈ d'a tzalan yic ejmelal, yujto a Jehová co Diosal chi' Axon̈ej Ochi.
Currently Selected:
Sal 99: CSM
Highlight
Copy
Compare
Share
Want to have your highlights saved across all your devices? Sign up or sign in
Biblia en Chuj de San Mateo Ixtatán © Sociedad Bíblica de Guatemala 2007