Jonás 1
1
El ok Jonás twitz Dios
1Tzaj yolin Kman tuc'il Jonás aju tcy'ajal Amitai ex tma: 2Chux k'oncu beya, txi'ya tuj nintz tnam Nínive ex k'manxa cye xjal ka cnajel tnam wu'ne, porque ma pon tkanil wuc'ile ti'j cybinchben mya ba'n, chi Dios.
3Pero el ok Jonás twitz Kman, tu'n tpon tuj tnam Tarsis. Xi' ttzi mar tuj tnam Jope, ex atzun cnet jun barc tu'n, cyja' t-xi' tu'n tpon tuj tnam Tarsis. Xi'tzun tchjo'n tpasaj ex jaxtzun tuj barc tu'n tpon ma chixin, tuj twitz ka tu'n tel ok twitz Kman. 4Tzajtzun jun nintz cyk'ik' cyuwxix wen tibaj mar tu'n Kman, ex mer ic tza'n cyja'tok tbaj yuch'j barc tu'n tipumal a'. 5Akeju yucul barc tzaj nimxix cyxobil, ex teyle junjun oc ten cubsal twitz tdios, ax icx ex cyxo'n tcyakil iktz tuj mar tu'ntzun tel talil tikatz barc. Atzun te Jonás otok cu'x tal max t-xe'pun barc, ex mi na'n tu'n tu'n watl. 6Atzunte nejenel tuj barc pon tuc'il Jonás ex xi tma'n te:
—¿Ti nbaj teya, txa watin? We'ctza ex cubsana twitz Tdiosa. Kape jacu tzaj k'ak'an tc'u'j ki'j tu'n kclet.
7Atzun cye yucul barc cyma cyxolx:
—E tjaw swert ku'n, tu'ntzun tel knic' ti'j alcye at til ti'j ju mya ba'n ma tzaj ki'j.
Jawtzun swert cyu'n ex aju swert cub tz'ak tibaj Jonás. 8Xi'tzun cyma'n te:
—K'mantza keye tiku'n ma tzaj mya ba'n kibaj. ¿Alcye tak'una? ¿Jatum tzajniya? ¿Alcye ttanmiya ex alcye tiyjila? Che chi xjal.
9Atzunte Jonás xi ttzak'we'n:
—Aj Ebrey kine ex in chin c'ulune te Kman aju Dios at tuj cya'j, aju binchante mar ex tx'otx', chi Jonás.
10Tzaj nimxix cyxobil ke yucul barc, ex xi cyma'n te:
—¿Tiku'n ma tbinchaya jlu?
Porque el cynic' ti'j ka otok tz'el ok Jonás twitz Kman porque ax Jonás otok txi k'mante cye.
11Ex tu'nju cyja' ttzaj pulin mar nimxix wen, xi cykanin te: ¿Ti cbantel ku'ne ti'ja tu'ntzun tcub nume' mar? Che chi.
12—Chin cyxo'nxe tuj mar, tu'ntzun tcub nume'. Ba'n wu'ne, akine at wile, ex tu'ntzun jlu ma tzaj nintz cyk'ik' lu cyibaje, chi Jonás, xi ttzak'we'n.
13Ke yucul barc o cyajbe tu'n cyajtz meltz'aj ex e oc ten yuculte barc tu'n tcyakil cyipun, tu'ntzun cyic'el juntl maj ttzi tx'otx', pero minti'x pon cyxcye' ti'j, porque ate mar nok masxix tzaj pulin wen. 14E octzun ten cubsal twitz Kman, che chi cyja':
—Aya Kman, mi'n tak'a ambil tu'n kcyime tu'n tlaj til ju xinak lu. Ex mi'n tz'oc tk'o'na te kile aju tcamic ka minti' til, porque ma bant tu'na ic tza'nx tajbila, che chi.
15Cu'xtzun xo'n Jonás cyu'n tuj mar ex atzunte mar cub nume'. 16Tejtzun cyque'yinte ke yucul barc jlu, tzaj nimxix tchi Kman cyi'j; xi cyk'o'n jun chojbil te Kman ex xi cytziyan tu'n cyniman te.
17Pero banin tten jun nintz cyiẍ tu'n Kman tu'n t-xi balk'u'n Jonás tu'n. Oxe k'ij ex oxe konic'an ten Jonás tuj tc'u'j cyiẍ.
Currently Selected:
Jonás 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993