Matey 25
25
Aju techal cyi'j laj k'apoj
1Aju cawbil in tzaj tuj cya'j ic tten ic tza'n laj k'apoj xi cyi'n cycandil e je'x canil ti'j ju xinak banin ti'j tu'n tmoje'. 2Jwe' k'apoj at cynabl, atzun jwe'tl minti' cynabl. 3Akeju k'apoj minti' cynabl, xi cyi'n cycandil, pero minti' xi cyi'n aseyt tu'n tcu'x cyk'o'n tuj cycandil oc tcub baj aju tcu'xsa'n tuj candil. 4Atzun ke k'apoj at cynabl, xi cyi'n aseyt tuj tcubil tuc'ix cycandil. 5Ex tu'nju yaj bant tten xinak, tzaj watl tuj cywitz k'apoj ex e ic' tan. 6Ex te tmij ak'bil, jaw tk'ajk'ajel cywi xjal in cyma'n: Lu tzul ju chmilbaj, cyetze canil ti'j. 7Cycyakiltzun k'apoj e jaw we', ex baj cybincha'n cycandil. 8Akeju k'apoj minti' cynabl xi cyma'n cye keju k'apoj at cynabl: Cyk'ontze ch'in aseyt keye, aju at cyuc'ile; porque ch'ix cycub yupj kcandile. 9Atzun cye k'apoj at cynabl xi cytzak'we'n: Mas ba'n tu'n cyxi'ye cyuc'il ke c'ayil ex tu'n ttzaj cylak'one ch'in aseyt te cyeye, tu'ntzun mi'n tcub baj naj keye ax icx cyeye, che chi. 10Cyja'tzun otok che'x ke jwe' k'apoj lak'ol aseyt tej tul ju chmilbaj, atzun ke k'apoj banin cyten, e ocx tuja tuc'il chmilbaj tuj mejeble'n ex bi'xtzun lamet ttzi ja. 11Te yajxitzun e ul keju jwe'tl k'apoj ex cyma: Tat, tat, jakon ocxa ja kwitze. 12Atzunte xinak etz ttzak'we'n: Ax toc cxel nma'ne cyeye, minti' ojtzki'n keye wu'ne, chi xinak.
13Cyja'tzun che xk'ukine, porque minti' bi'n cyu'ne alcye or chin ule, akine sc'o'maj kine tu'n Dios tu'n ntene cyuc'il xjal.
Aju techal ti'j pwak xi tk'o'n xjal cye tmajen
14Porque aju tcawbil Dios in tzaj tuj cya'j ic tten ic tza'n jun xjal xi' tuj jun tbe najchak, e tzaj ttxco'n ke tmajen, ex cyaj tk'o'n tpwak cye.
15Xi tk'o'n jwe' mil sak pwak te jun tmajen, atzun te juntl xi tk'o'n cabe mil ex xi tk'o'n jun mil te juntl, teylex junjun xi k'o'n nic'pun che ak'nan. Ex xi'tzun najchak. 16Aju majen o tc'am jwe' mil sak pwak, oc ten negosyaril ti'j, ex o tcamba jwe'tl mil. 17Ax icx aju majen o tc'am cabe mil sak pwak o tcamba cabetl mil. 18Atzun juntl majen, aju o tc'am jun mil sak pwak, xi' ex cu'x tlacu'n jun jul ex cu'x tmaku'n tpwak tpatrón.
19Tbajlenxi nim k'ij ul cypatrón majen, ex tzaj cyma'n tajlal cyak'unben. 20Tej tpon aju otok tc'am jwe' mil sak pwak, pon ti'n jwe'tl mil, ex xi tma'n cyja': Tat, jwe' mil sak pwak tzaj tk'o'na weye, lu jwe'tl mil ma ncambaye lu, chi majen. 21Xi tma'n tpatrón te: Cu, aya majen ba'n ex ma japunxix tu'na; ch'in xi nk'o'ne teya, ex ma tz'ak'nanxixa ti'j; ja'lo nimxix cxel nk'o'ne teya tu'ntzun ttzalaja junx wuc'ile, chi patrón. 22Ex tej tpon juntl majen aju otok tc'am cabe mil sak pwak, xi tma'n: Tat, cabe mil sak pwak tzaj tk'o'na weye, lu cabetl mil ma ncambaye lu, chi majen. 23Xi tma'n tpatrón te: Cu, aya majen ba'n ex ma japunxix tu'na; ch'in xi nk'o'ne teya ex ma tz'ak'nanxixa ti'j; ja'lo nimxix cxel nk'o'ne teya tu'ntzun ttzalaja junx wuc'ile, chi patrón te. 24Te mancbil pon aju majen o tc'am jun mil sak pwak ex tma: Tat, ba'n wu'ne aya jun xinak cyuwxix, in jaw tchmo'na twitz awal jatum minti' in cu'x tawa'na, ex in jaw tchmo'na twitz awal jatum minti' in xi tchituna iyaj. 25Tu'ntzunju, tzaj nxobile ex inxe ewalte tpwaka tjak' tx'otx'. Lu tpwaka lu, chi majen. 26Xi ttzak'we'n tpatrón: Aya majen mya ba'na ex cy'aja, ba'n tu'na in jaw nchmo'ne twitz awal jatum minti' wawale ex in jaw nchmo'ne twitz awal jatum minti' xi nchitune iyaj. 27Cyja'tzun, mas ba'nwtlo nokwit ocx tk'o'na npwake tuj banc; tejtzun ma chin ule mawtlo nc'ame npwake tuc'il ch'in ta'l, chi patrón te majen. 28Xitzun tma'n patrón cye mastl: Cyi'mele ju pwak te, ex cyk'onxe teju at laj mil sak pwak tuc'il. 29Porque aju xjal at ch'in te, mas cxel k'o'n te, ex cchmetel te; pero alcyeju minti' te, aju ch'in at te c'elel k'i'n. 30Ex aju majen minti' tajben, cyk'o'mixe ti'jxi tuj klolj; atzun tzul ok'el ex ckitx'itx'il t-xe' cye' xjal, chi patrón.
Cycyakil nasyon che oquel tuj xjel
31Octzun wule akine sc'o'maj kine tu'n Dios tu'n ntene cyuc'il xjal, otok chin oque rey, ex cyuc'ix cycyakil anjel wuc'ile, octzun chin bel ke'ye tuj nk'ukbile in koptz'aj tu'n ncawine. 32Ex ke xjal cyuj cycyakil nasyon che oquel chmo'n nwitze, ex c'elel npa'ne jun c'loj cyxol txkantl, ic tza'n jun pastor in che el tpa'n ke ẍne'l cyxol ke chip. 33Che bel nk'o'ne ke ẍne'l tuj nbank'abe, atzun ke chip che bel nk'o'ne tuj nnayaje. 34Entons akine Rey cxel nma'ne cye keju ate' tuj nbank'abe: Cytzaje akeye cy'iwla'n keye tu'n Nmane, cyc'monxe aju cawbil banimaj te cyeye atxix tej tbant twitz tx'otx'. 35Porque tej ttzaj el nc'u'je, tzaj cyk'o'ne nwaye; ex tej ttzaj txketle'n wi'je, tzaj cyk'o'ne nc'a'ye; stranjer xjal kine, ex tzaj cyk'o'ne nposadiye, 36tej minti'tok nxbalune, tzaj cyk'o'ne nxbalune; tej yabtok kine, e ule que'yil weye; tej prestok kine e ule visitaril weye. 37Ctzajeltzun cytzak'we'n keju tz'aklxix: Tat, ¿jtoje kile minti' twaya ex xi kk'o'ne twaya? ¿Jtoje kile in txketa ex xi kk'o'ne tc'a'ya? 38¿Jtoje kile stranjer xjala ex xi kk'o'ne tposadiya? ¿Ex jtoje kile minti' t-xbaluna ex xi kk'o'ne t-xbaluna? 39¿Jtoje kile yaba ex ka tocxa tuj pres ex o ule que'yil teya? 40Entons akine Rey cxel ntzak'wene: Ax toc cxel nma'ne cyeye: Aju cybinchaye cye wermaniye tal ch'in, weye o cybinchaye jlu, nchiloye cye.
41Ax icx cxel nma'ne cye keju ate' tuj nnayaje: Cypa'mil cyibe wi'je akeye tcub cysentense, cyxi'ye tuj k'ak' te jumajx, banimaj te tajaw il ex cye t-anjel. 42Porque tzaj el nc'u'je ex minti' tzaj cyk'o'ne nwaye; tzaj txketle'n wi'je ex minti' tzaj cyk'o'ne nc'a'ye, 43stranjer xjal kine ex minti' tzaj cyk'o'ne nposadiye; minti'tok nxbalune ex minti' tzaj cyk'o'ne nxbalune; yabtok kine ex in tene tuj pres ex minti' e ule que'yil weye, nchiloye cye. 44Ctzajeltzun cytzak'we'n: Tat, ¿jtoje kile nne'l tc'u'ja, ex ka in txketa, ex ka stranjer xjala, ex ka minti' t-xbaluna, ex ka yaba, ex ka ata tuj pres, ex minti' o ko onine teya? Che chilo. 45Octzun cxel ntzak'we'ne: Ax toc cxel nma'ne cyeye; aju minti' cybinchaye cye keju tal ch'in lu, ax icx minti' o cybinchaye weye, nchiloye cye. 46Che xe'ltzun jlu tuj castiw te jumajx, atzun keju tz'aklxix che xe'l tuj chwinklal te jumajx.
Currently Selected:
Matey 25: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993