Jeremías 2
2
El cypa'n cyib aj Israel ti'j Dios
1Tzajtzun yolin Kman wuc'ile ex tma: 2Txi'ya, tjaw tk'ajk'ajel twi'ya cyuw tu'ntzun tbinjtza cyu'n aj Jerusalén, ex k'manxa cye: Chi Kman in tma'n:
—Na'nx wu'ne tej matok k'apojxtoka, o'cx wi'je toc tc'u'ja tej tbant ti'j kyol tuc'ila; in tc'ujlaya ex oc lpe'ya wi'je tuj lugar tzkij tx'otx', aju tx'otx' minti' nno'c awal tuj.
3Sc'o'maj Israel wu'ne tu'n toc te weye, ex ic oc te weye ic tza'n nej twitz awal. Ka at jun oc toc binchante mya ba'n ti'j, in tzaj tcastiw wu'ne ex in tzaj nsama'ne mya ba'n tibaj.
4Akeye tiyjil Jacob ex cycyakil c'loj aj Israel, cybinxe tyol Kman. 5Chi Kman, in tma'n cyeye:
—¿Alcye mya ba'n cnet wi'je cyu'n ke cyxe'chele tej tel cypa'n cyib wi'je? E oc lpe' cyi'j ke dios minti' cyajben, ax icx cye e oc te minti' cyajben. 6Minti' e jyon wi'je masque akine in etz k'inte cye tuj Ejipt, ex e tzaj nẍaklu'ne tuj lugar tzkij tx'otx' nim tkan xak tuj, minti' a' tuj, puro xobajilxix, minti' jun xjal najl tuj ex minti' jun in bet tuj. 7Wu'ne e ul wi'ne tuj tx'otx' tbanil, tu'ntzun cynic'bene ti'j twitz awal in tzaj tk'o'n, ex tu'n cyachine ti'j tcyakil tbanil at tuj. Pero tej cyule, ma tz'oc cyk'o'ne ntx'otx'e te mya ba'n, ex tu'n tlaj il, ma tz'el wic'une ntx'otx'e etzan wu'ne. 8Ke pal minti' cyma: ¿Jatum ta' Kman? che chiwt; ex keju at nleye tuj cyk'ab, minti' ma tz'el cynic' wi'je; ke nejenel minti' xi cyniman nyole, keju nno'c cyk'on cyib te nsanjele ma che pacban ti'j tbi Baal, ex ma che oc lpe' cyi'j ke tilbilal minti' cyajben.
E oc aj Israel tuj xtis tu'n Dios
9Cyja'tzun akine Dios in chin k'mante jlu: Che oquele tuj xtis wu'ne, cyuc'ix ke tal cychmane che ul itz'j te tibajxi. 10Cyxi'ye tuj tx'otx' Quitim ttzi'yile mar ex cyque'yin baje; cysamanxe jun xjal tuj tx'otx' Cedar, tu'n toc tk'o'n tcwent ti'j 11ka at jun nasyon ma che baj tch'expu'n ke tdios, masque mya ax toc dios ke. Atzun ke xjal etzan wu'ne, nok tu'n cylaj ke dios minti' cyajben ma tz'el cypa'n cyib wi'je, akine Cydios ma'xix woclene. 12Aya cya'j, tzajx t-xobil ti'ja tu'n tlaj jlu, tzaj lu'luna tu'n jun nintz xobajil. Akine Dios in chin k'mante jlu. 13Ke xjal etzan wu'ne cabe il ma cybincha: Ma tz'el cypa'n cyib wi'je, akine ic ntene ic tza'n jun twi' a' itz', ex mer ic tza'n ma baj cybincha'n txkan jul tu'n tchmet a' cyuj, pero minti' in ten a' cyuj, jurat nna'j tzkij tu'nju pa'x ke.
Aju castiw tzaj cyibaj aj Israel tu'nju el cypa'n cyib ti'j Dios
14Ke aj Israel mya majen ke, ex mya te majen minti' tzokpibl te ma che ul itz'j. ¿Tiku'ntzun ma tz'el k'i'n tcyakilju at cye cyu'n aj k'oj? 15¿Tiku'ntzun nno'c k'oj cyi'j, mer ic tza'n cyu'n balun in che tzanun cyuw wen? Aju cytx'otx' ma baj naj, ke cytanmi ma che baj tz'e'y tu'n k'ak', ex mi jun ma cyaj ten cyuj. 16Ke xjal aj Menfis ex ke aj Tafnes ma tz'el baj cyi'n tcyakilju at cyeye. 17Atzun jlu ma baj cyi'je tu'nju el cypa'n cyibe wi'je, akine Cymane aju Cydiose, ex atok kine uc'il cyeye tuj cybeye.
18Atzun ja'lo, ¿ti cycambable ti'j tu'n cyxi'ye tuj Ejipt ex tu'n cyc'ane a' tuj nima Nilo? Ex ¿ti cycambable ti'j tu'n cyxi'ye tuj Asiria tu'n cyc'ane a' tuj nima Éufrates? 19Ax cybinchbene mya ba'n cbel k'onte cycastiwoye, ex tu'nju ma tz'el cypa'n cyibe wi'je cbel cysentense. Che ximane ti'j ex tz'elx cynic'e ti'j, nim mya ba'n ex yajbil ma tzaj cyibaje tu'nju ma tz'el cypa'n cyibe wi'je, ex tu'nju minti' ma chinx cynimane, akine Cymane ex Cydiose. Akine Dios Tajaw tcyakil in chin k'mante jlu.
Minti' xi cyniman aj Israel tyol Dios
20Ma bet-xi k'ij tjawlen cyi'n cyibe wi'je, ma cub cyxc'ayin cyibe tu'n mi'n t-xi cynimane nyole ex ma cymaye: Mi'n kaje tu'n kajbene teya, che chiye. Cyibaj cycyakil tal witz ex cyjak' cycyakil tze' nim cyxak o'cx ma tz'oc baj cywi'ye ti'j tu'n cyc'ulune cywitz junxitl dios, ic tza'n jun xu'j jawni twitz cyuc'il xinak. 21Ic e oc nk'o'ne ic tza'n jun wi' tkan uva tbanil, e cu'x wawa'ne ic tza'n tkan uva tzajni ti'j tbanil iyaj, pero ma baj cych'expun cyibe, ex ic ma che oque ic tza'n tkan uva at tuj c'ul minti' tajben. 22Masque tz'el cyjaku'n cyi'je tu'n ta'l tza'j ex masque tz'ajben nim jabón cyu'ne, pero tuj nwitze ttenx cyile, mlay tz'el tx'jet. 23¿Tza'n tten in cyma'ne: Baka ma baj ktz'ilsan kibe ex baka ma ko c'ulune cywitz tilbilal Baal? Che ximane ti'j tza'n tten e bete tuj chk'ajlaj, cyk'o'nque cwent ti'j tcyakilju o cybinchaye. Ic cytene ic tza'n jun ttxu camey oc in pon t-sakch in bet tic' tuj tcyakil part. 24Ic cytene ic tza'n jun ttxu bur te tjak' c'ul ax o ch'iy tuj lugar minti' cynajbil xjal tuj, oc te'lel t-sakch mlay tzyet, in xi t-sko'n cyk'ik' tu'n tcnet jun tman bur tu'n. Ka ma jyon jun tman chej ti'j, mya il ti'j tu'n t-sict, jurat in cnet tu'n porque otok tz'e'l t-sakch. 25Akeye aj Israel, mi'n cyc'ixbisaye cykane tu'nju in che ojkelane ocxi tbaj cyxajbiye toc, mi'n cyak'e ambil tu'n ttzkij tuj cykule tu'nju in che jyone ti'j junxitl dios. Pero che chiye in cyma'ne: Mi'n, mlay txi knimane tyola; mas c'ujla'n ke junxitl dios ku'ne ex ko xel lpe'ye cyi'j, che chiye.
Il ti'j tu'n tcub cycastiw aj Israel
26Ic tza'n te elek' in cub tch'ixwi oc tel tuj k'ancha'l, icxtzun cbel cych'ixwi cycyakil aj Israel, cyuc'ix ke cyrey, ke nejenel cye, ke pal ex ke nsanjele ate' cyxol; 27porque in cyma'n te jun piẍ tze': Aya kmane, ex in cyma'n te jun abj: Aya ktxu'ye. Atzun weye nok ttzal cyi'j in tzaj cyk'o'n nwitze, pero oc in tzaj mya ba'n cyi'j, jurat naj in tzaj cyma'n weye: Tzaja colol ki'je.
28¿Jatum ate' ke cydiose e baj cybinchane? akeye aj Judá. E cytzaj ka jacu che clete cyu'n oc ttzaj mya ba'n cyibaje. Nimcu cyajlal cydiose at. Ic tza'n cyajlal cytanmiye, ictzun cyajlal cydiose. 29¿Tiku'n in che yoline mya ba'n wi'je? Cycyakile miban che nimane weye. Akine Dios in chin k'mante jlu. 30Nok gan cub cycastiwoye wu'ne, minti' o tz'ajben jlu te xnak'tzbil cyeye. E cub cybyo'ne ke nsanjele ic tza'n jun balun in baj ttzakun tcanb. 31Akeye aj Israel ate'ye tuj tk'ijlalil ja'lo, cybintze nyole, akine Dios. ¿Icpetzun kine te cyeye ic tza'n jun tzkij tx'otx' ex ka ic tza'n jun lugar puro klolj tuj? Akeye xjal etzan wu'ne, ¿tiku'n in cyma'ne: Tzokpi'n ko'ye ex mlay ko aje juntl maj tuc'ila? Che chiye. 32¿Jacupe tzic' tna'l xmulk'abaj ex ka uwj tu'n jun xu'j, aju otok tc'am tu'n tchmil, tuc'ix t-xbalun tej tmoje'? Atzun cyeye, akeye etzan wu'ne, ma tz'el nim k'ij tic'len nna'njtze cyu'ne.
33Ojtzkimaj be cyu'ne tu'n cyjyonteye junxitl cydiose. Ma che oque te xnak'tzal ti'j mya ba'n. 34Nojni ti'j cyxbalune tu'n cychc'el ke meba xjal ex tu'n cychc'el ke xjal minti' cypaltil, akeju minti' jun cyil o cnet cyu'ne. 35Ex masque in cybincha'ne tcyakil jlu, in cyma'ne: Minti' ke kil ex minti' in k'ojin Dios kuc'ile, che chiye. Che oquele tuj xjel wu'ne tu'n tcub cycastiwoye, porque in cyma'ne ka minti' cyile. 36¿Tiku'n jurat naj in ch'expaj cynable tu'nju nok jachak in che'xe jyolte juntl colol cyi'je? C'elel cych'ixwiye cyu'n aj Ejipt, ic tza'n el cych'ixwiye cyu'n aj Asiria. 37Che ajetz meltz'aje tuj Ejipt in che ch'ixwiye wen, porque akeju k'ukl cyc'u'je cyi'j ic'un ke wu'ne, ex minti' jun oc cycamba'ye tu'nju k'ukl cyc'u'je cyi'j.
Currently Selected:
Jeremías 2: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993