Isaías 66
66
Cbel cycastiw xjal tu'n Kman ex che bel tcy'iwla'n ke aj Sión
1In tma'n Kman cyja': Aju cya'j, atzun nk'ukbile tu'n ncawine, ex aju tx'otx', atzun lugar tu'n tcub ten nkane tibaj. ¿Alcyetzun jun ja oc cybinchaye weye? ¿Jatum ba'n tu'n tbaj cybincha'ne jun lugar te wojlable? 2Tcyakil jlu tak'unben nk'abe, ex cyja'tzun tten e xe't tu'n cyten.
Ke xjal in chin tzalaje cyi'j, akeju mans ex in ajtz ti'j cyanmi ex at tchiylal nyole tuj cywitz. 3Pero at xjal in xi tk'o'n jun tor te chojbil, pero ax icx in cub cybyo'n jun xjal, nno'cx cykesin tjak' tkul jun ẍne'l, pero ax icx in cub cytokin ti'j tkul jun tx'yan, in xi cyk'o'n ke twitz awal te oyaj, pero ax icx in xi cyk'o'n tchc'el jun boch; in cub cypatun storac, pero ax icx in che c'ulun cywitz ke tilbilal. Akeju e jaw sc'onte ke costumr ic'bilxix lu, nimxix cygan tu'n cybinchante tcyakil jlu. 4Ax icx weye, cjawil nsc'o'ne jun c'ixbisabl tu'n ttzaj wi'ne cyibaj, ex ctzajel wi'ne aju nimxix in che xob twitz, porque e tzaj ntxco'ne, ex mi a'l jun tzaj tzak'wente weye, in yoline cyuc'il, pero minti' in tzaj cybi'n; o cybincha aju minti' in cub tuj nwitze, jaw cysc'o'n aju minti' in chin tzalaje ti'j.
Aju jwisi ex ju tzokpibl
5Cybinxe tyol Kman, akeye ba'n che niman tyol: At junjun cyxjalile in che ic'un cyi'je ex in che k'ojin cyi'je tu'nju in tzaj cyna'ne nbiye, ex in cyma'n cyja': E ttzaj tyec'un Kman tajwalil; kajbile tu'n cyoc kque'yine in che tzalaje, che chi. Pero ctzajel cych'ixwi ke xjal lu. 6Cybinxe tk'ajk'ajel cywi xjal in k'ajt tuj tnam, tuc'ix tk'ajk'ajel in k'ajt tuj tja Dios; atzun tk'ajk'ajel lu tu'n Kman, porque in cub tk'o'n cycastiw ke xjal aj k'oj ti'j.
7Aju tnam Sión ic tten ic tza'n jun xu'j nok minaben nnu'l itz'j tal na'nxtok ttzaj ta'w tc'u'j tu'n tul itz'j tal. 8¿Alcye jun o tbixi ic tza'n jlu? ¿Alcye jun o lonte ic tza'n tten jlu? ¿Tzinpe nnu'l itz'j jun nasyon te junx k'ij? ¿Tzinpe nnu'l itz'j jun tnam jurat naj? Pero tej ttzaj ta'w tc'u'j tnam Sión, jurat naj e ul itz'j ke tal. 9Mlay bant tu'n tmayet wu'ne tu'n mi'n cyul itz'j ke c'wa'l, porque wu'ne in xi nk'o'ne ambil tu'n cyul itz'j, chi Cydiose.
10Che tzalajxe tuc'il tnam Jerusalén, che tzalajxe nim junx tuc'il akeye at cyc'ujlalile ti'j, che tzalajxe nim junx tuc'il cycyakile akeye o che baj ok'e ti'j; 11ex atzunte tnam Jerusalén ic c'oquel ic tza'n jun txubaj, che oquel c'a'chine tu'n ocxi tnoj cyc'u'je ex ck'ukbanjtzel cyc'u'je tu'n. 12Porque akine Cymane cxel nma'ne jlu: Oc nbincha'ye tu'n tten Jerusalén tuj txubtxaj ic tza'n a' tuj jun nima nimxix at, ex atzun cyk'inumabl ke nasyon cxel nk'o'ne, ic c'oquel ic tza'n jun nima otok tz'ex kojl tuj tbe. Atzunju tnam Jerusalén cc'a'chal te cyeye, che jawil chle'ne tu'n tuj tk'ab ex che oquel xmoxine tu'n k'ukl keye twi tkan. 13Ic tza'n jun txubaj in xi tk'ukba'n tc'u'j tal, cyja'xtzun weye cxel nk'ukba'ne cyc'u'je, ex cnetel k'ukbabl cyc'u'je tuj Jerusalén.
14Octzun cylonteye jlu, cjawil tzalaj cyanmiye; c'oquel ac'aj tipumal cyximlale ic tza'n cha'x c'ul. Ctzajel tyec'un Kman tipumal cyxol ke tmajen, ax icx ctzajel tk'oj cyi'j ke aj k'oj ti'j. 15Porque tzul Kman tuc'il tkan k'ak', ke tcarwaj mer ic tza'n jun xcyakinpaẍ; ctzajel ttzokpin ttx'u'jil tuc'ix tk'oj; aju castiw ctzajel tk'o'n in c'ant ic tza'n k'ak'. 16Ax toc tzul jwisi tu'n Kman tuc'il k'ak'; cbel cycastiw cycyakil xjal tu'n tu'nju t-spad k'i'n, ex che cymel nimcu xjal tu'n.
17In tman Kman cyja': Akeju in baj cyxjansan cyib tu'n cyc'ulun cywitz tilbilal cyxol tkan awal, lepchix ke ti'j jun nejenel cyxol ex in xi cychyo'n tchibjal boch ex tchibjal ich' ex cychibjal mastl jil mayo'n tu'n ley, cycyakil bi'x che cymel te jumajx, 18porque ojtzki'n wu'ne ke cybinchben ex cyximbetz.
Chin ultzune ex ax kine chin oquel chmonte ke tnam ex ke nasyon, che ul ex c'oquel cyque'yin aju wajwalile. 19Cxel nk'o'ne jun techal cye; cxel nk'o'ne ambil tu'n cycyaj ank'in junjun ex che xel nsama'ne cyuj ke nasyon lu: Tuj Tarsis, Libia, Lidia, atzunju tnam lu jatum ate' ke xjal ba'n che yucun xobl plech, tuj Tubal, Grecia ex cyuj ke tx'otx' ate' najchak ttzi'yile mar, akeju bajx cybi tkanil wi'je ex bajx cyil wajwalile; ex atzun ke che xel k'mante tkanil wajwalile cyxol ke nasyon. 20Che tzajel k'i'n cycyakil cyxjalile cyuj cycyakil nasyon; at che ul tibaj chej, at tuj carwaj, ex at cyuj carret jawo'n cyu'n chej, at cyibaj chej mul ex cyibaj chej camey, ic che oquel ic tza'n jun oyaj te weye tuj Jerusalén aju witz xjan etzan wu'ne, ic tza'n ke oyaj in tzaj cyi'n aj Israel cyuj ke vas sakxix cyuj tu'n tul cyi'n tuj njaye. Akine Dios ma chin k'mante jlu.
21Che jawil nsc'o'ne junjun cyxol tu'n cyoc te pal ex te aj Leví. Akine Dios ma chin k'mante jlu.
22Ax icx in tma'n Kman cyja': Ic tza'n ju ac'aj cya'j ex ju ac'aj tx'otx' akeju che bantel wu'ne che tel te jumajx, icxtzun ke cyiyjile che tel te jumajx tuc'ix cybiye. 23Ex teyle junjun xjaw, tuj k'ij oc in tzaj que'yin ac'aj xjaw, ax icx tuj teyle junjun seman, tuj k'ij te ojlabl, che tzajel cycyakil xjal tu'n cycub ẍmeje' nwitze. Akine Dios ma chin k'mante jlu.
24Oc cyex, oc cyila' cyximlal ke cyimni e cyim tu'n tlaj tjawlen cyi'n cyib tu'n cyk'ojin wi'je. Mlay che cyim ke ẍuk' che chyo'l cyi'j ex mlay yupj k'ak' jatum che oquex xo'n tuj. A jlu ic'bilxix cye cycyakil xjal.
Currently Selected:
Isaías 66: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993