2 Tesalónica 3
3
Che na'ne Dios ki'je
1Cyja'tzun erman, che na'ne Dios ki'je tu'ntzun tel lak'e' mas tkanil tyol Kajaw ex tu'n tnimanjtz, ic tza'n cyeye ma txi cynimane. 2Ax icx che na'ne Dios ki'je tu'n kclete cywitz ke xjal miban che bin ex mya ba'n ke, porque mya cycyakil xjal at cyocslabl. 3Pero ate Kajaw in japunxix tyol, ex ba'n tu'n tke' kc'u'j ti'j, oc che cyuwsanjtzele tu'n, ex che oquel cwentine tu'n, tu'n mi'n tcub cyi'je tu'n tajaw il. 4Ex nok tu'n Kajaw ma ke' kc'u'je cyi'je, aju ma txi kma'ne cyeye in cybincha'ne ex cucx oc cybincha'ye. 5Awt Kajaw ẍaklun cyeye tu'n tel cynic'e ti'j tc'ujlalil Dios ex tu'n tten cypasense ic tza'n te Crist.
Il ti'j tu'n kak'nan
6Pero cxel kcyuwsa'ne cyeye erman tu'nju ato' tjak' toclen Kajaw Jesucrist, cypa'mel cyibe cyi'j ke erman in che bet mya tuj tumel ex minti' in che bet ic tza'n ju xnak'tzbil xcyc'ame keye. 7Porque ax keye ba'n cyu'ne tza'n tten tu'n tel cycano'ne ki'je; porque tej ktene cyxole minti' o ko bete mya tuj tumel, 8ex minti' o ko wa'ne nok cucx tu'n juntl, nok o'cx nim o ko ak'nane k'ijl ex konic'an ex nim o ko sicte tu'n mi'n tcub kk'o'ne jun iktz cyibaje. 9Masque at koclene tu'n kwa'ne cyi'je, pero o ko ak'nane tu'n tcnet kwaye, tu'n t-xi kk'o'ne jun yec'bil cyeye tu'ntzun tel cycano'ne ki'je. 10Porque tej ktene cyxole, xi kma'ne jlu cyeye: Ka at jun tc'i' tz'ak'nan, ax icx mi'n wa'n. 11Porque in kbi'ne at junjun cyxole in che bet mya tuj tumel, minti' in che ak'nan ch'in, nok cucx nne'x cyk'ij ttzi cyja xjal. 12Cyetzun jlu in xi kma'ne ex in xi kk'o'ne cynabl tu'n tyol Kajaw Jesucrist, tu'n cyak'nan yalnix ti'j ex tu'n cywa'n cycwent-x cyib.
13Erman, mi'n baj cyganiye tu'n cybinchanteye aju ba'n. 14Ka at jun cyxole minti' in xi tniman aju in xi kma'ne tuj u'j lu, tz'elx cynic'e ti'j, ex mi'n tz'oc cymojban cyibe tuc'il, tu'ntzun ttzaj tch'ixwi. 15Pero mi'n tz'oc cyk'o'ne ic tza'n jun aj k'oj cyi'je, nok o'cx tu'n t-xi cyk'o'ne tnabl erman lu tu'nju ocslal te.
Jun k'olbebl tu'n Pablo te bajsbil yol
16Ate Kajaw k'olte kmojbabl kib. Cucxwit tzaj tk'o'n cymojbabl cyibe tuj tcyakil. Tenwt Kajaw cyuc'ile cycyakile.
17Aju k'olbebl lu tu'nx nk'abe ma txi ntz'ibane, akine Pablo; atzun techal jlu ti'j tcyakil u'j in xi ntz'ibane; cyja'tzun tten chin tz'ibane. 18Aju t-xtalbil Kajaw Jesucrist tenwt cyuc'ile cycyakile. Icxwitju.
Currently Selected:
2 Tesalónica 3: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993