1 Timotey 2
2
Jun xnak'tzbil ti'j tza'n tten tu'n kna'n Dios
1Tnejelxix cxel nma'ne teya tu'n cycubsan ke ocslal twitz Dios cyi'j cycyakil xjal, ex tu'n cyna'n Dios cyi'j, ex tu'n t-xi cykanin t-xtalbil Dios cyibaj, ex tu'n t-xi cyk'o'n chjonte te Dios cyi'j. 2Ax icx ba'n tu'n cyna'n Dios cyi'j ke gobierni ex cyi'j cycyakil keju at cyoclen tuj cawbil, tu'ntzun kten tuj txubtxaj ex tu'n kcub txule', ex tu'n kniman twitz Dios ex tu'n kbet tuj tumel. 3Ba'n te jlu ex in tzalaj Dios ti'j, aju Clol ke. 4Porque atzun taj Dios, tu'n cyclet cycyakil xjal ex tu'n tel cynic' ti'j ju yol axix toc. 5Porque junx Dios at, ex junx yolil at in yolin tuc'il Dios ex in yolin cyuc'il xjal tu'n tbant cyten tuc'il Dios, atzun Jesucrist ax xjalte. 6Xi tk'on tib Jesucrist tu'n tcyim tu'n cycolpet cycyakil xjal, ex tzaj tchic'ba'n Dios ti'j jlu tujxix tk'ijlalil. 7Ti'jtzun jlu ma chin oc k'o'ne pacbal ex apostl ex xnak'tzal cye xjal mya judiy, tu'n cyocslan ex tu'n tel cynic' ti'j ju yol axix toc. Ax toc in xi nma'ne tu'nju ocslal kine ti'j Crist, minti' in chin nic'ane yol.
8Cyja'tzun wajbile tu'n cyna'n Dios ke xinak tuj tcyakil lugar, oc cyjaw cyi'n cyk'ab tu'n cyna'n Dios, minti'wt jun mya ba'n tuj cyanmi, ex minti'wt cyk'oj ex minti'wt in che yolin mya ba'n ti'j juntl. 9Icx ke xu'j, waje tu'n mi'n tjaw cyniman cyib tuj cyxbalun tbanilxix, tu'ntzun mi'n toc baj cywitz xjal cyi'j, ba'n tu'n tbaj cybinchan cyib, pero mi'n che ic' tibaj oc tbaj cyxeban cywi', ex mi'n tz'oc cyk'o'n k'an pwak cyi'j ex ka tal abj wi'yilxix perla tbi, ex mya tu'n toc cyk'o'n cyxbalun wi'yilxix, 10nok o'cx tu'n cybinchante aju ba'n, atzunte jlu ba'n cye ke xu'j cyajbil tu'n cynimante Dios. 11Ke xu'j oc cyten tuj xnak'tzbil, ba'n tu'n cycub txule' ex tu'n tcub cymansin cyib. 12Porque minti' in xi nk'o'ne ambil cye xu'j tu'n cyk'onte xnak'tzbil cye xinak ex ka tu'n cycawin cyibaj xinak, o'cx tu'n cycub txule'. 13Porque ate Adán cub bincha'n nej, te tibajxi cub bincha'n Eva. 14Mya ate Adán o sbunjtz, ate xu'j o sbunjtz ex binchan il. 15Pero oc che cletel ke xu'j, ka ba'n che ch'iysan cyal, ka cucx tten cyocslabl tuc'ix cyc'ujlalil, ex ka sak tuj cyanmi, ex ka at cynabl.
Currently Selected:
1 Timotey 2: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993