Ri Ezequiel 48
48
Ri u jachic ri ulew chquiwäch ri aj israelib
1-7“Are cajilabal ri amak' wa'.
Cächaptaj bic pa ri c'ulbat ri c'o pa riquiak'ab elebal k'ij, ri cäbe che ri u suq'uilal ri Plo ri Mediteran coc'ow c'u pa Hetlon, pa ri oquibal pa Hamat xukuje' pa Hazar-enan, pa ri u mox k'ab ri rulew ri Damasc xukuje' ri Hamat, chquijujunal ri amak' caquic'am na ch'akatak tak culew pa ri c'ulbat ri c'o pa ri elebal k'ij c'ä pa ri u kajebal k'ij, je u cholajil wa':
Dan
Aser
Neptali
Manases
Eprain
Ruben
Juda
8Are' chi c'u cäpe ri ulew ri rajawaxic u tasic iwumal, ri cächaptaj pa ri elebal k'ij quetakal c'ä pa ri u kajebal k'ij. Ri u wäch quieb legua ruc' niq'uiaj, are c'u ri u rabic xak junam quetan ruc' ri quebetan ri niq'uiaj ulew chic ri cachaptaj pa ri elebal k'ij quetakal c'ä pa ri u kajebal k'ij. Pa u niq'uiajil wa' cäcanaj wi na can ri Rachoch Dios.”
Ri ulew ri tasom che u patanixic ri Ajawaxel
9 # 48.9,13 Ri pajtzij ri craj ne utz je cubij wa' “quieb legua”; ri hebrey je cubij wa' “jun legua”. “Ri ch'akap ulew ri tastalic che u patanixic ri Ajawaxel quieb legua ruc' niq'uiaj u rabic, quieb legua c'u u wäch.
10Chupam we ch'akap ulew ri' c'o jun ulew ri tasom xuwi chque ri e cojol tabal tok'ob; pa ri riquiak'ab ri elebal k'ij xukuje' pa ri u mox k'ab ri elebal k'ij quetan quieb legua ruc' niq'uiaj, pa ri elebal k'ij xukuje' pa ri u kajebal k'ij, jun legua u wäch. Pa u niq'uiajil c'ut cäcanaj wi can ri Rachoch Dios.
11We ulew ri' cätas can chque ri e cojol tabal tok'ob ri xquitas quib che u patanixic ri Ajawaxel, ri e rija'lil ri Sadoc, ri xecanaj can pa ri nu patanijic man c'u xequitakej taj ri niq'uiaj aj israelib chic ri xquitas quib chquij ri e nu be, jacha' ri xquiban ri aj levitib.
12Rumal ri' chupam ri ulew ri tasom che u patanixic ri Ajawaxel, chuxcut ri culew ri aj levitib, ri e cojol tabal tok'ob c'o na jun ulew chque are c'u jun ulew wa' ri sibalaj tastal na.
13Chuxcut ri culew ri e cojol tabal tok'ob, cäcanaj wi can ri culew ri aj levitib, ri quebetan quieb legua ruc' niq'uiaj u rabic jun legua c'ut u wäch. Ri ulew ri tasom che u patanixic ri Ajawaxel, chi ronojel quieb legua ruc' niq'uiaj u rabic quieb legua c'ut u wäch.
14Are' jun ulew wa' ri sibalaj nim na u k'ij pa ri ulew. Man c'o ta jun ch'akap che ri chuya'taj chi c'ayixic o caq'uexic o cak'axex ta pa u k'ab jachin jun winak chic, tastal c'u che ri Ajawaxel.
15Ri niq'uiaj chic ri cäcanajic, re quieb legua ruc' niq'uiaj u rabic niq'uiaj legua c'ut u wäch, man tastal taj. Chila' cuya' quejeki' ri winak, chila' c'o wi ri quecha' ri awaj. Pa u niq'uiajil cäcanaj wi ri tinimit,
16ri culatz'obej jun cajtzalaj re jun legua pa tak ri jujun u xcut.
17Chrij ri tinimit e c'o wi tak ri echabal, ri quebetan jun sient ruc' cawinak lajuj ruc' quieb (152) bara' u wäch pa ri u cajtzalajil.
18Pa tak ri u xcut ri tinimit cäcanaj jun ulew pa ri u xcut ri ulew ri tasom che u patanixic ri Ajawaxel, ri c'o jun legua u rabic pa ri elebal k'ij jun etabal chi c'ut junam pa ri u kajebal k'ij. We ulew ri' cätic na u wäch, ri wächinic ri cäyac chuwäch cajwataj che qui tzukic ri quechacun pa ri tinimit.
19Ri quechacun pa ri tinimit, aj apachique ta ne amak' pa Israel quepe wi, caquitic na u wäch we ulew ri'.
20Ronojel ri ulew ri je u tasic wa' banom, ri u rikom rib ruc' ri ulew ri tasom che u patanixic ri Ajawaxel xukuje' ri rech ri tinimit, cäbantaj jun ulew cajtzalaj rij re quieb legua ruc' niq'uiaj ri u pa tak u xcut.”
Ri ulew che ri k'atal tzij
21-22“Ri ulew ri c'o chuxo'l ri Juda ruc' ri Benjamin; che u bixic, ri ulew ri c'o pa jun u xcut xukuje' pa ri jun u xcut chic ri ulew ri tasom che u patanixic ri Ajawaxel xukuje' che ri rulewal ri tinimit che ri k'atal tzij cäya' wi. Quieb legua ruc' niq'uiaj u wäch, culic' c'u rib pa ri elebal k'ij c'ä pa ri c'ulbat aj elebal k'ij, are' chi c'u ri pa ri u kajebal k'ij c'ä chuchi' ri plo. Pa u niq'uiajil cäcanaj wi can ri ulew ri tasom che ri Ajawaxel, ri c'o ri Rachoch Dios chupam, c'o c'u wi na ri culew ri aj levitib xukuje' ri rulewal ri tinimit.”
Ri culew ri niq'uiaj amak' chic
23-27“Ri culew ri niq'uiaj amak' chic cätaken pa ri u mox elebal k'ij. Chquijujunal tak ri amak' caquic'am na jun ch'akap culew kas pa ri c'ulbatil aj elebal k'ij c'ä pa ri u kajebal k'ij, pa we cholajil ri':
Benjamin
Simeon
Isacar
Zabulon
Gad
28Pa ri u mox elebal k'ij che ri rulewal ri Gad, ri c'ulbat cächaptaj bic kas pa Tamar, coc'ow chupam ri u c'ache'laj ri Merib-cades xukuje' coc'ow chupam ri alaj u nima' ri Ejipt, quetakal c'ä chuchi' ri Plo ri Mediteran.
29Are' ulew wa' ri caquic'am na ri ramak' tak ri Israel jacha' che quechbal, je c'u u jachic wa' chibana'. In, ri Ajawaxel, quinya' takanic chi je cäbanic.”
Ri e roquibal ri Jerusalen
30-34“Ri tinimit sutim rij rumal jun nimalaj tapia, ri quetan niq'uiaj legua pa ri jujun chque ri quiejeb u xcut. Che ri jujun u xcut ri nimalaj tapia e c'o ox ox oquibal, chquijujunal cojom wi ri u bi' jun ramak' ri Israel, pa we cholajil ri': Ri oquibal ri e c'o pa ri riquiak'ab elebal k'ij: che ri Ruben, ri Juda xukuje' ri Levi; ri e c'o pa ri elebal k'ij: che ri Jose, ri Benjamin xukuje' ri Dan; ri e c'o pa ri u mox elebal k'ij: che ri Simeon, ri Isacar xukuje' ri Zabulon; ri e c'o pa ri u kajebal k'ij: che ri Gad, ri Aser xukuje' ri Neptali.
35Ri nimalaj tapia quetan na chi ronojel quieb legua u rabic, are' c'u ri u bi' ri tinimit ri cätakex u bixic:
‘Ri Ajawaxel C'o Waral’.”
Currently Selected:
Ri Ezequiel 48: QUICH1
Highlight
Share
Copy
Want to have your highlights saved across all your devices? Sign up or sign in
Biblia Quiché © Sociedades Bíblicas Unidas, 1995.