Zac 14
14
Ri ruch'akonik ri Jerusalem
1Noqaqa yan jun q'ij wichin yin Jehová toq ronojel ri xtik'en-pe chuwi-kiq'a' ri e etzelanel iwichin xtitalutej chiwech qa rix. 2Jak'a pa nabey yin xkenmol konojel ri winaqi' richin ri ruwach'ulew richin xtikiben labal kik'in ri aj-Jerusalem. Kan xtich'akatej k'a, y xke'eleq'ex k'a el ronojel ri k'o rejqalen. Ri ixoqi' kan xtiqasex k'a kiq'ij koma achi'a'. Y nik'aj chire ri tinamit xke'uk'uex-el. Jak'a ri ch'aqa' chik k'a xkek'oje' na kan ri chiri', xcha' ri Dios.
Ri Jerusalem xtikolotej
3Chirij ri', ri Jehová xtuben labal kik'in ri ch'aqa' chik ruwach'ulew. 4Xtipe y xtipa'e' pa ruwi' ri juyu' Olivo, ri k'o pa relebel-q'ij chire ri Jerusalem. Y ri juyu' ri' xtich'aratej; ri nik'aj chire ri juyu' nibe pa xaman y ri nik'aj chik pa xokon, y chukojol ri' xtuben k'a jun nimalej taq'aj, nitiker-el rik'in ri Jerusalem, y napon k'a pa relebel-q'ij. 5Ri aj-Jerusalem kan xke'el-el chiri' pa kitinamit, y xke'animej chupan ri taq'aj ri', y xke'apon k'a pan Asal. Kan xke'animej k'a achi'el xe'animej ri winaqi' ri ojer toq xuben ri nimalej silonel pa ruq'ijul kan ri rey Uzías. Jari' toq xtipe ri Jehová e rachibilan-pe ri choj kik'aslen. 6Chupan k'a ri q'ij ri', ri q'ij man xtisaqirisan ta chik, y chuqa' man xtiq'equmer ta chik. Y man xtuben ta chik tew. 7Roma ri' toq xtapon ri q'ij ri' xtibanatej ri man jun bey banatajineq, xa kan xaxe ri Dios etamayon ri achike rubanik ri'. Y toq xtapon ri aq'a', man xtiq'equmer ta chik. 8Xtibanatej k'a chupan ri q'ij ri' chi pa Jerusalem xtibiyin ya' ri nuya' k'aslen. Chupan chijun ri juna' kan xtibiyin k'a. Nik'aj k'a chire ri ya' ri' xtapon chupan ri Tzayi-Choy ri k'o pa relebel-q'ij y ri nik'aj chik xtapon pa palou ri k'o pa qajbel-q'ij.
9Ri q'ij k'ari' kan ja ri Jehová xtiq'aton-tzij pa ruwi' chijun ruwach'ulew. Y xaxe chuqa' rija' xtiya'ox ruq'ij. 10Chijun ri ruwach'ulew ri' xtok taq'aj, nuchop-pe pa Geba y napon k'a pa Rimón ri k'o pa xokon chire ri Jerusalem. Jak'a ri Jerusalem xtik'oje' pa jotol y kan xkek'oje' chik winaqi' chuwech, nitiker-pe ri akuchi k'o-wi ri okinen richin Benjamín ri k'o pa relebel-q'ij, napon k'a akuchi k'o-wi ri okinen richin ri tz'aq ri nusutij-ri', ri k'o pa qajbel-q'ij. Nuchop chik ri akuchi k'o-wi ri okinen rik'in ri torre richin Hananel ri k'o pa xaman, y napon k'a akuchi nipitz'-wi ri uva ri richin ri rey, ri k'o pa xokon. 11Kan ek'o k'a winaqi' ri xkebek'oje' chupan ri Jerusalem y man jun bey chik xtiwuluwu'. Ri tinamit ri' kan jebel xtijike'.
12Jak'a ri Jehová xtuteq-pe jun nimalej ruk'ayewal pa kiwi' ri winaqi' ri xkeyakatej chirij ri Jerusalem. Kan k'a yebiyaj na ri winaqi' toq xtuben yan chike chi xtiq'ey ri kich'akul; keri' chuqa' ri runaq' taq kiwech y ri kaq'. 13Y xtibanatej k'a chi ri Jehová xtuteq-pe jun nimalej xibinri'il. Y chikijujunal rije' xtikichop k'a chikiq'a' chi kach'alal, xtikichop k'a ki' y xtikikamisala-ki'. 14-15Ri e etzelanel kichin ri aj-Israel ri ek'o pa Judá xkejote-q'anej pa Jerusalem richin xkeyakatej chikij ri kachibil. Y kan achi'el k'a ri nima-ruk'ayewal ri xtiqaqa pa kiwi' ri winaqi', kan keri' chuqa' xtiqaqa pa kiwi' ri jalajoj kiwech chikopi', achi'el ri kiej, ri camello y ri bur. Y chupan ri q'ij ri' xtikimol k'a ruchi' chijun ri beyomel ri k'o kik'in ri e etzelanel kichin ri aj-Israel ri ek'o chiri'; ri q'anapueq, ri saqipueq y ri jebelej taq tzieq. Y re' kan pa ruk'iyal k'a xtikimol.
16Chirij ri', konojel ri winaqi' ri k'a xek'ase' na kan chike ri tinamit ri xeyakatej chirij ri Jerusalem, xkebe k'a juna-juna' richin nibekiya' ruq'ij ri rey, ri Jehová k'iytisanel richin ronojel. Y nibekinimaq'ijuj ri nimaq'ij toq yeban taq jay banon rik'in ruq'a-che'. 17Jak'a wi k'o ta jun ruwach'ulew ri man xtiberuya' ta ruq'ij ri Jehová, re ruwach'ulew k'a re' kan man xtiqaqa ta job pa ruwi'. 18Wi ri aj-Egipto man xkebe ta richin xtibekiya' ruq'ij ri Jehová, kan man xtiqaqa ta pe job pa kiwi' y xtiqaqa chuqa' ri nima-ruk'ayewal pa kiwi'. Ri ch'aqa' chik ruwach'ulew ri man xtikajo' ta richin xtibekiya' ruq'ij ri Jehová ri chiri' pa Jerusalem, 19y man nikajo' ta nikinimaq'ijuj ri nimaq'ij ri', xtikitej poqon achi'el xtikik'uluwachij ri aj-Egipto.
20Chupan k'a ri ruq'ijul ri', kan k'o k'a ri xtibetz'ibex chikiwech ri taq klun ri nitzeqe' chikiqul ri kiej, y kere' nubij: Kan Ch'aron Chire ri Jehová. Y chuqa' xtitz'ibex chuwech ri bojo'y ri nikusex chupan ri rachoch ri Dios, y chuqa' chikiwech ri nima'q taq leq ri ye'ukusex chuwech ri porobel. 21Kan ronojel k'a bojo'y ri ek'o pa Jerusalem y ri ek'o pa Judá kan xkejach k'a chire ri Jehová. Y konojel k'a ri xtikisuj kamelabel, xtikikusaj k'a ri bojo'y ri' richin xtikiroqowisaj ri ti'ij chupan. Y roma ri' kan man xtik'ayix ta chik bojo'y chupan ri rachoch ri Jehová.
Currently Selected:
Zac 14: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
