Zac 11
11
1Chiri' pa juyu' Líbano ri q'aq' kan xtuk'is ronojel tiox-che'
y man jun xtiq'aton richin.
2Xtitz'etetej chi ri k'isis achi'el xkebison,
roma ri tiox-che' xa xketzaq,
y xa xkek'is ri jebelej taq che'.
Xtitz'etetej chi ri tuq ri ek'o pa Basán achi'el xkebison,
roma ri janila chi che' xa xkek'is.
3Ri yuq'unela' kan xke'oq' k'a janila,
roma ri q'os xa kan xtik'is jumul.
Ri koj kan xtiwajin ri ruch'abel,
y ri k'echelaj ri ek'o chuchi' ri raqen-ya' Jordán kan xkek'is pa jun bey.
Ri e ka'i' yuq'unela'
4Kere' k'a xubij ri Jehová chuwe: Ke'ayuq'uj ri nuwinaq ri e achi'el taq karne'l ri ek'o richin chi yekamisex. 5Ri loq'onela' man xtiqaqa ta rutojbalil pa kiwi' toq yekikamisaj-qa. Y ri xek'ayin-el kichin nikibij-qa: Kan janila nim ruq'ij ri Jehová, roma xojbeyomer kan, yecha-qa. Ni ta k'a ri xyuq'un kichin man nujoyowaj ta k'a kiwech. 6Roma ri' man xtinjoyowaj ta kiwech ri nuwinaq. Y xkenjech k'a el pa kiq'a' ri kachpochel y pa kiq'a' ri ki-rey. Kan xtikitoloba' kan ri kiruwach'ulew, y kan man xkenkol ta pa kiq'a', xcha' ri Jehová.
7K'ari' yin xenchajij rije' achi'el nuben jun yuq'unel ri nuchajij ri nibeken. Y xinchop k'a ka'i' ch'ame'y: Ri jun xinbij Utzil chire y ri jun chik xinbij Junan Kiwech chire. K'ari' xenyuq'uj rije'. 8Pa jun ik' xenwelesaj k'a el oxi' chike ri yuq'unela', roma xkiben chuwe richin xik'o yan nuk'u'x kik'in. Chuqa' ri winaqi' xa kan xinketzelaj. 9Y chike ri winaqi' xinbij chi man jun bey chik xkenyuq'uj. Y wi k'o ta jun xtiken chike, kan xtiken k'a. Y wi k'o ta jun xtisach-el, kan xtisach k'a el. Y ri k'a xkek'oje' na kan, kan tikitija-qa-ki' chi kachibil-ki'.
10Xinchop k'a el ri nuch'ame'y rubini'an Utzil y xinq'ej; re' jun retal chi xyojtej kan ri jikibel-tzij ri xinben kik'in. 11Chupan k'a ri q'ij ri' xa xk'is kan ri jikibel-tzij. Y ri winaqi' in kitzuliben y xq'ax k'a chikiwech chi kan ja ri Jehová ri nibanon chuwe richin chi ninben keri'. 12Xinbij k'a chike chi wi xqa' chikiwech re xinben kere', kan kinkitojo' k'a. Jak'a wi man xqa' ta chikiwech, man yinkitoj ta. Y rije' kan xinkitoj k'a xaxe rik'in juwineq lajuj raqen saqipueq. 13K'ari' ri Jehová xubij chuwe chi tinbenya' kan ri saqipueq pa rachoch ri akuchi k'o-wi ri rubeyomel,*f2* stape' man k'iy ta ri rajel. Xink'uaj k'a el ri juwineq lajuj raqen saqipueq y xinya' kan pa rachoch ri Jehová. 14K'ari' xinq'ej ri jun chik ch'ame'y rubini'an Junan Kiwech, y re' retal chi nibek'is ri ach'alalri'il chikikojol ri ruwach'ulew Judá y ri ruwach'ulew Israel.
15Chirij ri' ri Jehová xubij chik chuwe: Wakami k'a tachapa' chik ch'aqa' ch'ame'y kichin yuq'unela', y tabana' chi at jun yuq'unel ri man nitz'aqet ta ri rusamaj. 16Roma yin kan xtinya' k'a jun aj-raqen ri nichajin kichin ri nuwinaq, achi'el jun yuq'unel ri man xtiniman ta chike ri karne'l kitalun-ki', ni man xkerukanoj ta ri e sachinaqi', ni man xkeraq'omaj ta ri q'ajineq kaqen, ni man xkeruch'elej ta ri e kosinaqi'. Xa kan xaxe k'a xtutej ri rutijul ri karne'l ri e ti'oj, y ni ta k'a ri ruwi' taq raqen xtuya' kan.
17Toq'ex k'a ruwech ri itzel yuq'unel toq numalij kan ri tzobaj karne'l.
Kan xtiqaqa ta k'a ri espada chirij ri ruq'a',
y xtel ta el jun runaq'-ruwech ri k'o pa rijkiq'a',
richin keri' xtichaqi'j-qa ri ruq'a' y xtimoyir kan jumul, xcha' ri Dios.
Currently Selected:
Zac 11: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
