Rut 2
2
Ri Rut nipich'olin pa rulew ri Booz
1Chiri' pa Belén k'o k'a jun achin ri rach'alal kan ri ánima Elimélec, ri rachijil ri Noemí. Re achin re' rubini'an Booz, rija' jun nimalej beyom y kan k'o ruq'ij.
2Y k'o k'a jun q'ij ri Rut xubij chire ri ralite': Tabana' utzil, taya' q'ij chuwe richin chi yibe pa juyu', richin yibepich'olin pa rulew ri xtijoyowan nuwech, xcha'. Y ri Noemí xuya' k'a el q'ij chire.
3Ri Rut xbe k'a richin nibepich'olin. Y toq xapon pa jun ulew akuchi niq'at-wi cebada, xuchop nipich'olin chiri' kik'in ri yesamej; y ri akuchi xbepich'olin-wi, xa richin ajk'a ri Booz, ri rach'alal kan ri ánima Elimélec. 4Y toq ri Rut najin nipich'olin, xapon k'a ri Booz ri peteneq pa Belén, y xubij chike ri rusamajela': Ja ri Jehová xtik'oje' iwik'in, xcha'. Y ri rusamajela' xkiq'ejela' chuqa'.
5Xeri' ri Booz xubij chire jun rusamajel ri k'o pa kiwi' konojel ri samajela': ¿Achike k'a xten la k'o chila'?, xcha'. 6Y ri samajel xubij chire: Ja k'a xten la' ri aj-Moab ri peteneq rik'in ri Noemí. 7Rija' xuk'utuj utzil chuwe chi ninya' q'ij chire richin nipich'olin juba' wawe' y nitzeqe' chikij ri q'atonela'. Kan nimaq'a' okineq-pe y jala' k'a k'o na wakami; xa juba' ok uxlawineq, xcha' ri samajel chire ri Booz.
8K'ari' ri Booz xch'on rik'in ri Rut y xubij chire: Nána, kan kinawak'axaj k'a, man kabe juk'an chik ulew richin yabepich'olin, xa kak'oje' wawe'. Tatunu-apo awi' kik'in la waj-ik' ixoqi'. 9Ke'atzeqelibej ri ixoqi' ri akuchi niban-wi samaj. Man taxibij-awi', roma yin xinbij yan chike ri nusamajela' achi'a' chi tikiya' q'ij chawe richin chi yapich'olin. Y toq xtichaqi'j-pe achi', kabiyin-apo akuchi k'o-wi ri yakbel-ya' y taqumu' ri ya' ri nikiqum ri nusamajela', xcha' chire ri Rut.
10K'ari' ri Rut xulukuba-qa-ri' y kan xuqasaj-qa-ri' k'a pan ulew chuwech ri Booz y xubij chire: ¿Achike roma rat janila utzil naben chuwe, y yin xa man in awinaq ta?, xcha' chire.
11Y k'ari' ri Booz xubij: Yin xinwetamaj yan ronojel ri utzil ri abanon rik'in ri awalite', achapon-pe naben utzil chire rija', kan ja toq xken-el ri awachijil; y roma ri awalite' xe'aya' kan ri ate-atata', xaya' kan ri aruwach'ulew y xatok'oje' re wawe' chiqakojol roj ri man jun bey awetaman qawech. 12Ja ri Jehová ri qa-Dios roj xtiya'on rajel ruk'exel chawe roma ri yatajin chubanik y kan xtak'ul rajel ruk'exel pa ruq'a' ri qa-Dios roj ri aj-Israel, ri achoq ik'in akuquban-wi ak'u'x rat, xcha' ri Booz.
13Y ri Rut xubij: Táta, kan jantape' ta xtink'ul utzil awik'in, roma ri ch'abel ri xabij chuwe kan xapon k'a pa wánima y janila nukuquba' nuk'u'x, roma kan xach'on wik'in rik'in ajowabel, stape' xa man in asamajel ta, y chuqa' man in jun ta chike ri awaj-ik'a', xcha' ri Rut.
14Y toq jari' yebewa', ri Booz xubij chire ri Rut: Katanpe richin yawa', k'o wey qik'in y junan xtakeq' away qik'in chupan re q'utun ri k'o vinagre rik'in, xcha'. Y ri Rut xtz'uye' k'a apo junan kik'in ri samajela', y ri Booz xuya' cebada k'ilin chire y jebel xwa', y rija' xuyek k'a janipe' ri man xuk'is ta chire ri xukochij.
15Y toq ri Rut kolawineq chik, y xyakatej yan el richin chi xuchop chik jun bey nipich'o'l, jari' toq ri Booz xubij chike ri rusamajela': Tiya' q'ij chire richin yerumol-el ri ruwi' taq cebada ri yetzaq kan chire ri boraj y man jun tibanon chire chi man yerumol ta el. 16Y chuqa' tibana' utzil chi kan pa rubanik tibana' chi nitzaqala' kan juba' richin numol-el rija', y man kixch'olin chirij, xcha' ri Booz chike.
17Ri Rut xpich'olin k'a y xqasan-q'ij chiri'; y ronojel ri xumol xuch'ey, y toq xch'eyetej xuben más juba' jun arroba. 18Y jari' xuk'uaj-el y xtzolin pa tinamit. Y toq ri ralite' xutz'et ronojel ri rupich'o'l ri xuben chupan ri q'ij ri', jari' toq ri Rut xberelesaj-pe chuqa' ri cebada k'ilin ri man xuk'is ta ri paq'ij, y xuya' chire ri ralite'. 19Roma ri' ri ralite' xuk'utuj chire: ¿Akuchi k'a xapich'olin-wi? Ja ta ri Dios xtiya'on urtisanik pa ruwi' ri achin ri xato'on, xcha' ri Noemí. Y ri Rut xutzijoj k'a chire ri ralite' chi ri ulew ri akuchi xpich'olin-wi, richin jun achin rubini'an Booz. 20Y ri Noemí xubij k'a: Ja ta ri Dios xtiya'on rutzil pa ruwi' rija', roma janila utz ri najin chubanik qik'in roj ri k'a oj k'es na kan, y xa kan jun utzil chuqa' ri najin chubanik chike ri ánima taq qachijilal. Ri achin ri' xa kan qach'alal-wi, roma ri' kan yojruto' y tikirel chi nok jun kolonel qichin, xcha' ri Noemí chire ri Rut.
21Y ri Rut xubij: Ri achin ri' xubij chuqa' chuwe chi utz chi yitzeqe' chikij ri raj-ik'a' ixoqi' y keri' ninben k'a toq xtik'is na ri q'atoj, xcha'.
22K'ari' ri Noemí xubij chire ri Rut: Kan utz ri junan yabe kik'in ri aj-ik'a' ixoqi', richin man yabe ta pa jun chik ulew, y keri' man jun yanaqon, xcha'.
23Y ri Rut kan keri' xuben; xk'oje' chikikojol ri raj-ik'a' ri Booz. Xpich'olin chiri' k'a toq xk'is na ronojel ri ruq'atik ri cebada y chuqa' ruq'atik ri trigo. Y rija' kan ronojel k'a q'ij nitzolin rik'in ri ralite'.
Currently Selected:
Rut 2: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.