Sal 7
7
Ri David nuk'utuj rutojbalil-mak*f5*
1Jehová nu-Dios, awik'in rat nukuquban nuk'u'x.
Kinakolo' k'a pa kiq'a' ri e yakatajineq chuwij.
2Roma rik'in juba' nikelesaj ri nuk'aslen
y xkinkiwech' achi'el nuben jun koj,
y kan man jun xkikolon pa kiq'a'.
3Jehová nu-Dios yin,
wi ta yin k'o ri man utz ta ri nubanon,
wi k'o ta itzel taq banobel nubanon,
4wi ta xinya' rutojbalil chire ri xa man jun rubanon chuwe,
wi ta yin kan k'o xinmej chuwi-ruq'a' ri etzelanel wichin, toq man ojk'o ta pan oyowal.
5Wi ta keri' nubanon, kan kinkitzeqelibej k'a ri e etzelanel wichin,
y kan kinkiq'i' k'a.
Kinkikamisaj y kinkitorij kan pan ulew.
6¡Jehová, kayakatej k'a chi nuto'ik!
kan rik'in k'a awoyowal, kayakatej chikij ri e etzelanel wichin.
Rat kan abin chi kan naya-wi rutojbalil,
kan kinato' k'a wakami.
7Tikimolo' k'a ki' ri tinamit,
richin k'a chila' chikaj xkaq'aton-pe tzij pa kiwi'.
8Jehová ja rat ri yaq'aton-tzij pa kiwi' ri winaqi'.
Taq'ata' k'a tzij chuqa' pa nuwi' yin,
achi'el ri ruchojmilal ri nuk'aslen.
9Tik'is k'a wakami ri ketzelal ri aj-maki' y takolo' ri choj ruk'aslen,
roma rat at jun Dios choj,
y kan nanik'oj ri ránima y ri ruch'obonik ri wineq.
10Ri nutobal yin, kan ja ri Dios,
ri Dios ri nikolon kichin ri choj yebiyin.
11Ri Dios kan jun choj q'atoy-tzij,
rija' jantape' nrixowaj ri mak.
12Wi ri aj-mak man nutzolij ta ri' chirij,
ri Dios kan xtuben rey ri ru-espada;
kan xtuya' k'a chuwi-rutele'n ri rute-ch'ab,
y kan xtuq'ijuj k'a rik'in.
13Kan e runaban chik ri rukamisabal,
y kan e ruya'on chik q'aq' pa rutza'n ri ruch'ab.
14Ri aj-mak kan xaxe k'a q'axo'n ri nutik,
y pa ruk'isibel nibeq'alajin-pe ronojel ri q'oloj yeruben.
15Nuk'ot k'a jun jul y janila nim rupan nuben chire;
jak'a ri jul ri xuben xa chupan k'ari' xtitzaq-wi.
16Ri rumak xa pa ruwi' k'a rija' xtiqaqa-wi;
kan pa ruwi' k'a rija' xtapon-wi ri itzel taq rubanobal.
17Jak'a yin kan xtinya' ruq'ij ri Jehová, roma rija' kan pa ruchojmilal nuq'et-tzij,
Kan xtinbixaj k'a ri rubi' ri nimalej Jehová.
Currently Selected:
Sal 7: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
