Sal 44
44
Ch'owen rik'in ri Dios pa ruwi' ri tinamit Israel*f42*
1Nimalej Dios, kan rik'in k'a qaxikin qak'axan ri utzilej rutzijol.
Ri qate-qatata' xetzijon kan chiqe chi rat xaben ri meyel taq banobel ri ojer kan.
2Rik'in ri aq'a' xe'awelasaj ri winaqi' chuwech ri kiruwach'ulew y xe'ajikiba' ri qati't-qamama' chuwech ri ruwach'ulew ri';
xaya' k'a ruk'ayewal pa kiwi' ri winaqi' ri', jak'a ri qati't-qamama' xaben chi xek'iyer-q'anej ri kijatzul.
3Rije', man roma ta ri kikamisabal xe'ok kan chuwech ri ruwach'ulew ri',
ni man ja ta ri kuchuq'a' rije' ri xekolo.
Kan ja ri awijkiq'a' y ri asaqil rat kik'in rije' ri xbanon chike chi xech'akon,
Kere' xaben kik'in roma kan xeqa' chawech.
4Rat, nimalej Dios, ri at nu-rey.
Tabana' utzil taya' ri kolotajik chike ri e rijatzul kan ri Jacob.
5Rik'in k'a ri ato'onik rat xkeqatzeq ri e etzelanel qichin.
Pan abi' k'a rat xqojch'akon chikij ri e yakatajineq chiqij.
6Yin man ninkuquba' ta nuk'u'x rik'in ri rute-ch'ab,
ni man ja ta ri espada ri xtikolon wichin.
7Roma kan ja rat ri xabanon chiqe chi xojch'akon chikij ri e etzelanel qichin,
y xe'ak'ixbisaj ri e yakatajineq chiqij.
8Awik'in k'a rat qa-Dios roj, xqojkikot-wi ronojel q'ij.
Kan jantape' k'a xtiqanimirisaj ri abi'.
9Jak'a re wakami xa xojamalij kan y xojak'ixbisaj;
y man at beneq ta chik kik'in ri aj-labal.
10Xaben chiqe chi xqatzolij-qi' chiqij chikiwech ri e etzelanel qichin.
Xaya' q'ij chi rije' xkik'uaj-el ronojel ri k'o qik'in.
11Xojajech k'a achi'el toq nuk'uex jun karne'l richin nibekamisex.
Xa xojataluj k'a el chikikojol winaqi' ri man yatkitzeqelibej ta rat.
12Xojak'ayij-el y xa man jun qajel xak'utuj,
kan man jun k'a xach'ek kan richin xojajech-el.
13Xaya' k'a q'ij chi xojkik'ixbisaj ri ek'o chiqanaqaj.
Kan yojkiyoq' y yetze'en chiqij ri tinamit ri kisutin-qij.
14Ri winaqi' kan chaq yojkinatala' k'a richin yetze'en chiqij.
Konojel ri yojkitz'et, kan nikisilola' ri kijolon chiqij.
15Roma ri' ronojel q'ij kan nisach k'a nuk'u'x.
Kan man yitikir ta ninyek-q'anej ri nujolon.
16Koma ri winaqi' ri yeya'on nuk'ix y nikiqasaj nuq'ij;
koma ri e etzelanel wichin ri nikajo' yinkiya' pa k'ayew.
17Ronojel re' xpe pa qawi', jak'a kan man at qamestan ta kan,
ni man qaq'ajon ta ruwi' ri ajikibel-tzij ri abanon qik'in.
18Kan man qabanon ta richin yatqamalij kan,
ni man qach'aron ta kan qi' chire ri bey ri xak'ut chiqawech.
19Man rik'in ri', rat xojaq'ututej; xojaya' akuchi yek'oje-wi ri k'uxunela' taq chikopi'.
Y ri kamik kan niqaqa yan k'a pa qawi'.
20Wi ta roj xatqamestaj ta kan rat, qa-Dios,
o xa xqaya' ta ruq'ij jun chik dios.
21¿Kan man ta kami nanabej rat?
roma rat kan awetaman k'a ronojel ri k'o pa qánima.
22Roj kan awoma k'a rat ajaw, jubama yojkamisex,
xa kan banon chiqe chi oj achi'el ri karne'l toq ye'uk'uex richin yebekamisex.
23Kak'astej, qa-Dios roj, ¿achike roma yawer?
Kayakatej k'a, man yojamalij kan richin jantape'.
24¿Achike roma nawewaj-awi' chiqawech,
y amestan ri qaq'axo'n y ri ruk'ayewal ri niqaq'axaj roj?
25Roma ri qánima kan ruqasan-ri' jumul.
Chijun ri qach'akul kan k'a pan ulew qajineq-wi.
26Roma ri' Jehová, kayakatej richin yojato'.
Qojakolo' rik'in ri ajoyowanik.
Currently Selected:
Sal 44: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
