Sal 4
4
Ch'owen rik'in ri Dios toq niqaq'ij-qa*f2*
1Nu-Dios yin, ri pa ruchojmilal yaq'aton-tzij,
tak'uluba' k'a pe ri nuch'abel toq yich'on-q'anej awik'in;
toq xik'oje' pa bis, rat xaya' uxlanen chuwe.
Tajoyowaj k'a nuwech y tawak'axaj k'a ri nuch'owen.
2Rix achi'a', ¿k'a janipe' k'a yixtane' richin yiniyoq'?
¿K'a janipe' k'a yixtane' richin niqasaj nuq'ij y nibij tz'ukun taq tzij?
3Tiwetamaj k'a chi ri Jehová e rucha'on ri choj kik'aslen chuwech rija'.
Roma ri' kan xtrak'axaj toq yin xkich'on rik'in.
4Tik'oje' k'a rukiy ri Dios chiwech y man chaq yixmakun.
Toq ix kotz'ol y silan-silan chik, tiquqa' pa taq iwánima ri ibanobal chuwech rija'.
5Tisuju' k'a kamelabel rik'in ch'ajch'ojil chuwech ri Dios,
y kan tikuquba' k'a ik'u'x rik'in.
6E k'iy ri nikik'utuj y nikibij: ¿Achike ta xtik'utu chiqawech ri utz?, yecha'.
Tabana' utzil Jehová, taya' ri awutzil pa qawi' roj.
7Rat nu-Dios, nim kikoten ri aya'on pa wánima.
Kan ik'owineq chikiwech ri winaqi' ri k'o pa ruk'iyal ri trigo y vino kik'in.
8Rik'in uxlanibel-k'u'x xkikotz'e-qa y keri' xkiwer jebel;
roma xaxe rat Jehová ri yabanon chuwe chi kuqul nuk'u'x yik'ase'.
Currently Selected:
Sal 4: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
