Núm 9
9
Toq ninimaq'ijux ri q'ij toq ri Jehová xuya' Solbelri'il
1Ri Jehová xch'on k'a rik'in ri Moisés ri chiri' pa tz'iran ruwach'ulew Sinaí chupan ri nabey ik', chupan ri ruka'n juna' chire toq xe'el-pe ri pa ruwach'ulew Egipto. Y xubij chire: 2Ri tinamit Israel k'o chi nunimaq'ijuj ri q'ij richin ri Solbelri'il. Y ri q'ij ri k'o chi ninimaq'ijuj, ja ri 3q'ij kajlajuj chire ri nabey ik', re' toq xa nok yan qa ri aq'a'. Ri rubanik ri niben chire kan achi'el ronojel ri nubij ri pixa', xcha'.
4Y ri Moisés xch'on k'a kik'in ri ruwinaq richin nikinimaq'ijuj ri q'ij ri'. 5Y rije' xkinimaq'ijuj k'a ri q'ij ri', achi'el ronojel ri rubin ri Jehová chire ri Moisés.
6Y ek'o k'a jujun winaqi' ri man e ch'ajch'oj ta toq xapon ri q'ij richin ninimaq'ijux ri nimaq'ij ri', roma rije' xkineq ruch'akul jun kamineq y roma ri' man xkinimaq'ijuj ta ri q'ij ri'. Roma ri' xe'apon rik'in ri Moisés y ri Aarón, y 7xbekibij chike: Roj man oj ch'ajch'oj ta roma xqaneq ruch'akul jun kamineq. ¿Man ruk'amon ta k'a richin niqanimaq'ijuj ri q'ij ri' junan kik'in ri kan oj rijatzul kan ri Israel, richin niqasuj ri sipanik chuwech ri Jehová pa ruq'ijul?, xecha'
8Y ri Moisés xubij chike chi tikoyobej na juba' rokik rija' nuk'utuj na chire ri Jehová. 9Y ri Jehová xubij k'a chire ri Moisés: 10Tabij k'a chike ri awinaq: Wi k'o jun chiwe o k'o jun chike ri iwijatzul ri man ch'ajch'oj ta roma xuneq ruch'akul jun kamineq o xa nej beneq-wi chire ri tinamit toq xapon ri q'ij richin ninimaq'ijuj ri q'ij ri', utz ninimaq'ijuj stape' man chupan ta ri q'ij. 11K'o k'a chi ninimaq'ijuj chupan ri q'ij kajlajuj chire ri ruka'n ik', toq nok yan qa ri aq'a'. Y chuqa' k'o chi nikitej ri kaxlan-wey ri maneq ch'amilej-q'or rik'in, y ri k'ayilej-ichaj. 12Y man jun tuyek kan richin ri ruka'n q'ij chire ri ti'ij ri nitij ri q'ij ri' y man tikiq'ej ri rubaqil. Ronojel re ruchojmilal re' k'atzinel richin nikiben. 13Jak'a ri wineq ri ch'ajch'oj, wi man beneq ta nej chire ri rutinamit y man nunimaq'ijuj ta ri q'ij ri', rija' k'o chi nelesex-el chi'ikojol, roma man xuya' ta apo ri sipanik chire ri Jehová chupan ri q'ij y kan nrejqalej k'a ri rumak.
14Y wi k'o jun wineq chi'ikojol ri xa man iwinaq ta y rija' nrajo' nunimaq'ijuj ri q'ij ri', utz ninimaq'ijun, xaxe k'o chi nuben ri ruchojmilal ri niben rix, xcha' ri Jehová.
Ri sutz' pa ruwi' ri rachoch ri Dios richin molojri'il
(Ex 40:34-38)
15Chupan k'a ri q'ij toq xtane' ruchojmirisaxik ri rachoch ri Dios, kan jari' k'a toq k'o jun achi'el sutz' ri xumatzej-rij ri jay ri'. Y ri achi'el sutz' ri' nok k'a achi'el jun q'aq' ri nisaqirisan ri chaq'a' y toq niseqer-pe nok chik el sutz'. 16Keri' k'a xuchop rubanik ronojel mul; ri sutz' numatzej-rij ri rachoch ri Dios ri paq'ij y ri chaq'a' nok achi'el jun q'aq' ri nisaqirisan. 17-19Toq ri sutz' niyakatej-el pa ruwi' ri rachoch ri Dios, ri winaqi' israelita nikichop-el bey. Y ri akuchi toq ri sutz' man nibiyin ta chik, chiri' k'a yek'oje-wi-qa. Rokik ri sutz' k'o pa ruwi' ri rachoch ri Dios, rije' chiri' yek'oje-wi-qa achi'el ri rubin rija'. 20-21Y k'o k'a jujun bey ri sutz' nik'oje' pa ruwi' ri jay, richin jun ka'i-oxi' q'ij y kan man nisilon ta el. Y toq keri' nuben, ri winaqi' kan chiri' yek'oje-wi-qa. Chuqa' k'o k'a jujun bey ri sutz' ja ri tiqaq'ij nipa'e' y man nisilon ta chik el y ri nimaq'a', ja yan chik ri' niyakatej-el, richin chi ri israelita nikichop chik el kibey. Toq ri sutz' niyakatej-el, stape' chaq'a' o paq'ij ri israelita kan jari' nikichop-el bey. Re' kan jari' ri retal ri xuya' ri Jehová chike richin yek'oje-qa, o nikichop binen. 22Wi ri sutz' nipa'e' pa ruwi' ri rachoch ri Dios jun ka'i' q'ij, o jun ik', o jun juna'; rokik pa'el chiri', ri winaqi' israelita yek'oje' chiri' y man yesilon ta el. Jak'a toq ri sutz' niyakatej-el, rije' chuqa' ye'el-el chiri' y yebe.
23Kan rutzij k'a ri Jehová toq yek'oje' chiri' y kan rutzij chuqa' ri Jehová toq yebe. Kan xkitaqej k'a ri rutzij ri Jehová, achi'el ri rubin chire ri Moisés.
Currently Selected:
Núm 9: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
