Núm 27
27
Ri kich'ojinik ri rumi'al ri Selofhad
1Y k'o k'a jun achin rubini'an Selofhad, ri ruk'ajol kan ri Héfer, ri rumam kan ri Galaad, ruxikin rumam kan ri Maquir y rijatzul kan ri Manasés y ri José. Y ri e rumi'al kan kibini'an Mahlá, Noá, Hoglá, Milcá y ri Tirsá. 2Rije' xe'apon k'a chikiwech ri Moisés, ri sacerdote Eleazar y ri e aj-raqen richin ri tinamit, ri chiri' chuchi' ri rachoch ri Dios richin xech'ojin chikiwech y xkibij: 3Ri qatata' xken kan pa tz'iran ruwach'ulew, achi'el ri ch'aqa' chik winaqi'. Y rija' man jun k'a ruk'ajol ri xk'oje' ta. Jak'a man xken ta roma xok ta kachibil ri tzobaj winaqi' richin ri Coré, ri tzobaj ri xech'on chirij ri Jehová. 4Y roma ri' man ruk'amon ta chi niyojtej ri rubi' ri qatata' chikikojol ri rach'alal, xaxe roma man xk'oje' ta jun ruk'ajol. Wakami k'a niqajo' chi ja roj ri yojichinan kan ri ulew chikikojol ri e rach'alal kan ri qatata', xecha'.
5Y ri Moisés xuk'ulubej k'a ri Jehová chirij ri kich'ojinik ri ixoqi', 6y ri Jehová xubij k'a chire ri Moisés: 7Ri e rumi'al ri Selofhad kan pa ruchojmilal-wi ri nikibij. Y kan qitzij wi chi k'o chi nikichinaj kan jun ulew junan kik'in ri e rach'alal kan ri kitata'. Kan chike k'a rije' naya-wi ri ulew ri xrichinaj ta ri kitata'.
8Y wakami k'a taq'alajirisaj chikiwech konojel ri awinaq y tabij chike chi toq k'o k'a jun achin ri niken-el y wi man jun ta ruk'ajol ri ichinanel kan, k'o chi niq'axex chire ri rumi'al. 9Y wi maneq ta rumi'al, xtiq'axex chike ri rach'alal kan ri kamineq; 10y wi e maneq ta kan rach'alal ri kamineq, xtiq'axex k'a chike ri e ruch'utitata' kan rija'. 11Y wi man jun ta ruch'utitata' kan ri kamineq, xtiq'axex k'a chire jun ach'alalri'il ri más naqaj y xtok richin rija'. Re ruchojmilal re' kan xtok k'a jun pixa' richin nikikusaj ri awinaq, kan achi'el-wi ri ninbij yin, xcha' ri Jehová chire ri Moisés.
Ri Josué jari' ri ruk'exel ri Moisés
12Y chirij re', ri Jehová xubij chire ri Moisés: Kajote-pe re chuwi' taq juyu' richin ri Abarim y xtatz'et ri ruwach'ulew ri xtinbenya' chike ri awinaq. 13Y toq atz'eton chik na kan ri ruwach'ulew ri', rat chuqa' xkaken y xtabek'ulu-awi' kik'in ri awati't-amama' achi'el xbanatej rik'in ri awach'alal Aarón. 14Roma chi ix ka'i' rix kan man xinimaj ta nutzij ri chiri' pa tz'iran ruwach'ulew Sin ri chiri' chuchi' ri ya' pa Meribá ri k'o pa Cadés, toq ri winaqi' xeyakatej richin xkich'ojij kiya' y rix kan chikiwech ri winaqi' xiben-wi chi achi'el xa man jun ok nuq'ij, xcha' ri Jehová.
15K'ari' ri Moisés xubij k'a chire ri Jehová: 16Rat Jehová Dios, ri at rajaw ronojel k'aslen kichin ri winaqi': Tacha' k'a jun achin richin naya' pa kiwi' re winaqi' re', 17ri kan nitikir yeruk'uaj y yeruk'en-pe; ri kan nok jun uk'uey kichin, richin keri' man xtikiben ta achi'el jun tzobaj karne'l ri maneq kiyuq'unel, xcha'.
18K'ari' ri Jehová xubij chire ri Moisés: Tak'ama-pe ri Josué, roma rija' kan k'o-wi ri Espíritu wichin yin rik'in y taya' ri aq'a' pa ruwi'. 19Tapaba' k'a chuwech ri sacerdote Eleazar, chikiwech konojel ri awinaq y kan pa ruq'a' rija' tajacha' kan ri samaj, 20y taya' kan ri aq'atbel-tzij chire, richin keri' rije' kan xtikinimaj rutzij. 21Ri Josué kan jataqil k'a xtapon chuwech ri sacerdote Eleazar, y ri sacerdote xkiruk'ulubej k'a yin rik'in ri Urim y ri Tumim. Ja ri Josué k'a ri xtibin jampe' yebe y jampe' yepe e rachibilan ri ruwinaq. Kan chijun k'a tinamit xtuben ri xtubij rija' chike, xcha'.
22Y ri Moisés kan xuben-wi achi'el ri xbix chire roma ri Jehová, y xuk'uaj k'a el ri Josué rik'in y xberupaba' chuwech ri sacerdote Eleazar ri chiri' chikiwech konojel ri winaqi' ri xkimol-ki'. 23K'ari' ri Moisés xuya' ruq'a' pa rujolon y xuq'axaj kan ri samaj chire, kan achi'el ri rubin ri Jehová chire.
Ri sipanik ri k'o chi yeya'ox q'ij-q'ij
(Ex 29:38-46)
Currently Selected:
Núm 27: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
