Núm 15
15
Ruchojmilal pa kiwi' ri kamelabel y ri sipanik
1-2Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Jare' ri ruchojmilal richin ri sipanik y ri kamelabel ri niben toq rix ix okineq chik chupan ri ruwach'ulew ri xtinya' chiwe. 3Nik'en-pe jun chike ri nima'q o kokoj taq iwawej richin nijubulin chinuwech. Y re chikop re' xtik'atzin richin niporox chijun, richin jun kamelabel, chuqa' toq k'o jun ri nisuj chi niben chinuwech yin y toq nik'en-pe roma nalex-pe pan iwánima o toq niben jun nimaq'ij richin niya' nuq'ij. 4Y wi nik'en-pe jun nima-alaj chikop chike ri kokoj taq iwawej, k'o chi nisuj ka'i' libra k'ej chayun ri xolon rik'in jun litro aceite olivo. 5Chuqa' k'o chi nikaq'uj jun litro vino pa ruwi' ri kamelabel. 6Y toq ri kamelabel jun karne'l k'atzinel chi nisuj chuqa' kaji' libra k'ej chayun xolon rik'in más juba' jun litro aceite. 7Chuqa' nisuj más juba' jun litro vino, richin jun sipanik. Y re' jun sipanik ri kan nijubulin chinuwech yin. 8Jak'a toq nik'en-pe jun nima-alaj wákix richin niporox chijun o richin chi niq'alajin chi junan iwech wik'in o richin chi kan niben ri kan isujun chuwe yin; 9k'atzinel k'a chi nik'en-pe waqi' libra k'ej chayun nixol ka'i' litro aceite rik'in. 10Junan chuqa' rik'in ri', nik'en-pe ka'i' litro vino richin nikaq'uj pa ruwi' ri kamelabel ri niporox chijun. Y re' jun sipanik ri kan nijubulin chinuwech yin. 11Y kere' rubanik toq xke'isuj ri nima'q y kokoj taq iwawej, 12y jare' ri k'o chi nrachibilaj chikijujunal ri chikop ri nisuj.
13Kan kere' k'o chi niben iwonojel rix winaqi' israelita. 14Chuqa' ri winaqi' ri xa man e iwinaq ta y kan niqa' chikiwech richin yek'oje' chi'ikojolil, toq nikajo' nikiya' jun sipanik, k'o chi nikiben achi'el ri niben rix. 15Y xaxe jun ruchojmilal ri xtuk'uan iwichin rix y ri winaqi' ri man e iwinaq ta. Re jun ruchojmilal re' richin q'asen y xtik'atzin chike konojel ri winaqi' ri chi wiq chi tanaj e peteneq; roma chinuwech yin xa ix junan rix y ri winaqi' ri man e iwinaq ta. 16Xaxe k'a jun ruchojmilal ri xtik'oje' pan iwi' rix y pa kiwi' rije', xcha' ri Jehová.
17-18Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Toq xkixok-apo chupan ri ruwach'ulew ri akuchi yixink'uaj-wi, 19y nitikeriba' nitej ri wey ri nuya' chupan ri ruwach'ulew ri', k'o chi nich'er kan juba' chuwe yin. 20Toq nabey mul xtiben ri iway, k'o chi niwelesaj kan juba' ke'en y niben jun kaxlan-wey chire. Jare' ri niya' chuwe yin achi'el jun sipanik. 21Y re' k'o chi niben jantape' y keri' chuqa' ri iwijatzul.
22Jare' ri ruchojmilal wi rix man inojin ta richin niq'ej ruwi' jun chike ri nupixa', ri nuya'on pa ruq'a' ri Moisés: 23Y ri chojmilal re' iwichin rix y kichin ri iwijatzul chi wiq chi tanaj. 24Y wi kan qitzij chi rix imestan ri pixa' ri' y kan chi'iwonojel rix man iwetaman ta chi mak ri xiben, kan k'o k'a chi nisuj jun nima-alaj achij wákix richin jun sipanik ri niporox chijun. Y re' kan xtijubulin k'a chinuwech. Y kan k'atzinel chi rik'in ri sipanik ri', niya' ri sipanik richin k'ej y ri vino achi'el nubij chupan ri ruchojmilal. Chuqa' k'o chi nisuj jun achij tzuntzun richin nikuyutej ri imak. 25Y jari' k'a toq ri sacerdote xtusuj ri kamelabel, richin keri' nikuyutej imak y yin kan xtink'en chik iwech. Re' xtibanatej toq xtik'en-pe re jalajoj ruwech kamelabel re'. 26Re jun chojmilal re' kan xtiqaqa pan iwi' y pa kiwi' ri man e iwinaq ta. Keri' xtikuyutej ri imak roma man iwetaman ta chi xiq'ej ruwi' ri nupixa'.
27Y wi ta xaxe jun chiwe rix ri niq'ajo ruwi' ri nupixa', k'o chi nuk'en-pe jun alaj ixoq tzuntzun ri k'o jun rujuna', richin jun kamelabel richin xtikuyutej ri rumak. 28K'ari' ri sacerdote xtusuj ri kamelabel richin nikuyutej rumak ri wineq ri', roma ri wineq ri' kan man ruch'obon ta chi nimakun y xtzaq pa mak. Y richin keri' yin nijunamatej nuwech rik'in. 29Y re jun chojmilal re' iwichin rix y kichin ri man iwinaq ta roma man ich'obon ta richin yixmakun y xixtzaq pa mak.
30Y wi k'o ta jun wineq ri kan rik'in rija' nalex-wi-pe chi nimakun, ri wineq ri' stape' ta jun chiwe rix o jun chike ri man e iwinaq ta, k'o chi nikamisex-el, roma xa xuben chuwe yin Jehová chi xa xuqasaj nuq'ij. 31Roma ri wineq ri' xa xrixowaj ri nuch'abel yin Jehová y xuq'ej ruwi' ri nupixa', roma ri' rija' kan man xtikolotej ta chuwech ri kamik; y ja ri rumak ri xtuk'uan-el richin, xcha'.
Ri niqaqa pa ruwi' jun ri nisamej chupan uxlanibel-q'ij
32Toq ri winaqi' israelita ek'o k'a chiri' pa tz'iran ruwach'ulew, xbekila' k'a pe jun achin ri kiwinaq rije' ri nuben rusi' chupan ri q'ij richin uxlanen. 33Y ri achin ri', xkik'en k'a pe chuwech ri Moisés y chuwech ri Aarón y chikiwech ri ch'aqa' chik kiwinaq. 34Y ri xek'amon-pe ri achin ri' kan ek'o k'a achi'a' ri xekiya' kan richin xkichajij, roma man jani q'alaj ta achike ri xtiban rik'in. 35Y ri Jehová xch'on k'a pe rik'in ri Moisés y xubij chire: Ri achin ri xilitej-pe ri nuben rusi' chupan ri q'ij richin uxlanen, tikamisex k'a chi abej koma ri winaqi' israelita, chuchi-el ri akuchi ixk'o-wi-qa, xcha' ri Jehová. 36Y kan achi'el k'a xubij ri Jehová chire ri Moisés, kan keri' xkiben. Xkelesaj k'a el ri achin ri' chuchi' ri akuchi ek'o-wi-qa y konojel ri winaqi' xkik'eq chi abej y keri' xken.
Ri nik'atzin-wi ri retz'aba'l ri ruchi' ri kitziaq ri winaqi'
37-38Ri Jehová xuya' chik k'a re jun ruchojmilal re' chire ri Moisés richin nuq'axaj chike ri ruwinaq y xubij: Rix y ri iwijatzul ri xkepe chiwech-apo, kan xtiben k'a taq k'olok'eq chutza'n-qa ri itziaq richin retz'aba'l chijun qa ri ruchi', y ri kijitz'ibal ri taq etz'aba'l ri', raxroj k'a nitzu'un. 39Ri retz'aba'l ri ruchi' ri itziaq ri' kan xtik'atzin k'a chiwe richin toq nitzu-qa, noqaqa chi'ik'u'x ronojel ri nupixa' ri nuya'on chiwe yin y xkixok k'a nimey taq tzij y man xtiben ta ri itzel taq rayinik ni man xtitzu' ta chik ruwech. 40Y keri' noqaqa ta chi'ik'u'x ri nupixa', y niben ta ronojel ri nubij. Chuqa' kan xtijech ta iwi' chuwe yin Jehová, ri i-Dios. 41Ja yin Jehová ri xinelesan-pe iwichin pa ruwach'ulew Egipto richin xinok i-Dios. Ja yin k'a Jehová, ri i-Dios wakami, xcha'.
Currently Selected:
Núm 15: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
