Lev 17
17
Ri akuchi k'o chi nisuj jun kamelabel
1Ri Jehová xch'on rik'in ri Moisés y xubij chire chi 2tubij chire ri Aarón, ri e ruk'ajol y chuqa' chike ri ruwinaq: 3-4Wi ta jun chiwe rix nrajo' nusuj jun wákix, jun karne'l o jun tzuntzun, jak'a wi nukamisaj ta chirij-el o chupan ri akuchi ixk'o-wi-qa, y man nukamisaj ta chuchi' ri wachoch achi'el ri nubin yin, ri wineq ri xtibanon keri' kan xtrejqalej k'a ri kik' roma xuben richin xbiyin kik'; y roma ri' kan xtelesex k'a el chupan ri tinamit. 5Richin keri' ri israelita kan xtikik'uaj k'a ri chikop ri nikisuj y xtikijech chire ri sacerdote richin nikamisex chuchi' ri wachoch y man nikamisex ta xabakuchi ri nikajo-wi rije'. Keri' nikamisex ri chikop richin nuq'alajirisaj chi nijunamatej-iwech wik'in. 6Ri sacerdote nuchikaj k'a ri kik' chi kaji' ruwech ri porobel y pa taq ruxikin, y chuqa' nuporoj ri q'en richin nijubulin chinuwech yin. 7Y man jun bey chik tisuj kamelabel chikiwech itzel taq espíritu ri iya'on kiq'ij ri xa koma rije' xixtzaq. Re' kan jun k'a pixa' chiwe rix tibe-q'ij tibe-seq.
8Chuqa' tabij chi xabachike chike ri iwinaq o ri man e iwinaq ta ri ek'o chi'ikojol, wi k'o jun nrajo' nusuj chuwe jun kamelabel ri niporox chijun o xabachike kamelabel, 9y man nuk'uaj ta chuchi' ri wachoch richin chiri' nukamisaj-wi, ri xtibanon keri' kan xtelesex k'a el chi'ikojol.
Pixa' richin man titij ri kik'
10Yin Jehová kan man utz ta nintz'et chi jun wineq nutej kik', stape' iwinaq o man iwinaq ta. Ri xtitijo kik', kan xtinwelesaj k'a el chi'ikojol rix. 11Ri kik' jari' ri ruk'exewach ri kik'aslen konojel ri e k'es. Roma ri' nubin chiwe chi ri kik' richin ri kamelabel, k'o chi niya'ox pa ruwi' ri porobel richin nijunamatej-iwech wik'in. Ri kik' ri', ruk'exewach ri ik'aslen, richin nuben chi nijunamatej-iwech wik'in. 12Y roma ri' nubin chiwe rix israelita chi man jun chiwe titijo kik', y keri' chuqa' ri man e iwinaq ta ri ek'o chi'ikojol. 13Xabachike k'a chike ri iwinaq, o ri man e iwinaq ta ri k'o chi'ikojol, wi ta nukamisaj jun chikop o jun aj-xik' chikop richin tijel, xtrelesaj k'a kan ri rukik'el y xtumuq kan rik'in ulew. 14Roma ri k'aslen ja ri kik', roma ri' nubin chiwe chi man nitej ti'ij ri xa k'a ruk'uan na kik'. Achike k'a ri xtitijo ri kik', kan xtelesex k'a chi'ikojol. 15Keri' chuqa' ri iwinaq o man iwinaq ta, wi k'o xtitijo ri ruch'akul jun chikop ri xken ruyon o xwech' koma ch'aqa' chik chikopi', ri wineq ri' k'o chi natin y nuch'ej rutziaq, y kan xtok man ch'ajch'oj ta chi jun q'ij k'a toq nok-pe ri aq'a'. 16Y wi man natin ta y man nuch'ej ta ri rutziaq kan xtrejqalej k'a ri mak, xcha' ri Jehová.
Currently Selected:
Lev 17: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
