Lev 11
11
Ri chikopi' ri utz richin yetij
1Ri Jehová xch'on chik rik'in ri Moisés y rik'in ri Aarón richin chi rije' xtikiya' ch'aqa' chik ruchojmilal chike ri winaqi'. Y xubij chike: 2Jare' ri ruchojmilal pa kiwi' ri chikopi' ri e utz richin yetij chikikojol konojel ri chikopi' ri ek'o chuwach'ulew. 3Ri chikopi' ri nikikamuluj ri kiway y chuqa' ri ruch'aron ri' ri kipi'ch, utz ye'itej. 4-6Xaxe k'a man ke'itej ri chikopi' achi'el, ri camello, ri tejón y ri umul, roma stape' nikikamuluj ri kiway, jak'a xa man ruch'aron ta ri' ri kipi'ch. Re chikopi' re' man e ch'ajch'oj ta, y man ke'itej. 7Ri aq ruch'aron ri' ri kipi'ch, jak'a man yekamulun ta. Re chikopi' re' man e ch'ajch'oj ta chuqa' y man ke'itej. 8Roma ri' ri chikopi' ri man e ch'ajch'oj ta, kan man tichop ri kich'akul, toq e kaminaqi' chik.
9Y chike ri chikopi' ri e richin pa ya' ri utz ye'itej, ja ri k'o taq kixik' y ri k'o kisolotal. 10Jak'a ri maneq taq kixik' y maneq kisolotal, k'o chi ye'iwixowaj, stape' kan e richin pa ya'; man titej. 11Chuqa' kan man tichop ri kich'akul ri chikopi' ri' toq e kaminaqi' chik, roma xa man e ch'ajch'oj ta. 12Kan konojel k'a ri chikopi' ri e richin pa ya' ri maneq taq kixik' y maneq kisolotal, man ke'itej, xa kan ke'iwixowaj.
13-19Ri jalajoj kiwech aj-xik' taq chikopi'*f2* ri nikitej ti'ij, achi'el ri aj-ch'ak. Ri' man ke'itej, xa k'o chi ye'iwixowaj. Keri' chuqa' ri aj-xik' taq chikopi' ri yewa' akuchi nitorix-wi q'ayis, achi'el ri k'uch.
20Ronojel ri taq kokoj taq chikopi' ri k'o kixik' y ri yebiyin, re' kan man xke'itej ta, xa k'o chi xke'iwixowaj. 21Jak'a kan utz richin ye'itej ri taq chikopi' ri k'o kixik' y yetzopiyaj ri yebiyin. 22Y chike re taq chikopi' re' utz ye'itej ronojel ruwech taq sak', y ri nima'q taq sak', ri xi'l y ri taq saltamonte. 23Ronojel k'a ri taq chikopi' ri xa yebiyin y ri k'o kixik' k'o chi man ye'itej ta, xa kan k'o chi ke'iwixowaj.
24-28Xabachike k'a chikop ri man ruch'aron ta ri' ri rupi'ch y man nikamulun ta, kan man ch'ajch'oj ta. Chuqa' chikikojol ri chikopi' ri k'o ruwi-kaqen y kixk'eq, ri' man e ch'ajch'oj ta. Xabachike k'a ri chaq k'ate' nuneq kan ri ruch'akul ri chikop kamineq, o xtuk'uaj-el juba' chire ri ruch'akul; ri wineq ri' kan xtok man ch'ajch'oj ta chijun q'ij k'a toq xtiq'equmer-qa, y chuqa' k'o chi nuch'ej ri rutziaq.
29-30Ri chikopi' ri yejepejot yebiyin, ri man e ch'ajch'oj ta, ja ri saqbin, ri ch'oy, ri jalajoj kiwech spa'ch, ri ayin, ri ski't y ri xwa'r. 31Konojel re' kan man e ch'ajch'oj ta chikikojol ri chikopi' ri e jepejeq, y achike k'a xtichapo ruch'akul jun chike re chikopi' re' toq kamineq chik kan, xtok man ch'ajch'oj ta chijun q'ij k'a toq xtiq'equmer-qa.
32Y chuqa' achoq pa ruwi' xtitzaq-wi ri ruch'akul jun chike re chikopi' re' xtok man ch'ajch'oj ta; wi ta xtitzaq-qa pa ruwi' jun samajibel ri banon rik'in che', o chirij jun tzieq, o chirij jun tz'um, o chirij jun costal o chirij xabachike k'ojelibel o samajibel, re' xtiya' k'a pa ya' richin nich'ajch'ojirisaj. Y man rik'in ri' man ch'ajch'oj ta chijun q'ij k'a toq xtiq'equmer-qa. 33Y wi ta jun chike re chikopi' re' nitzaq ta pa jun xabachike leq ri banon rik'in ulew, k'o chi nipaxix. Y chuqa' ri k'o chupan kan xtok man ch'ajch'oj ta. 34Y xabachike k'a ri utz richin niqum ri k'o chupan ri leq ri', kan xtok man ch'ajch'oj ta. Y chuqa' wi k'o ya' chupan ri leq ri', y wi niqaqa pa ruwi' xabachike ri nitij, re' kan xtok k'a man ch'ajch'oj ta. 35Y achoq pa ruwi' xtitzaq-wi ri ruch'akul ri chikop xtok man ch'ajch'oj ta. Y wi xtitzaq ta pa ruwi' jun horno o pa ruwi' jun k'ojelibel richin boxbel q'aq', kan xtiwulex k'a. 36Jak'a wi ta nitzaq ri ruch'akul jun chike ri chikopi' ri' chupan jun yakbel-ya' o akuchi nalex-wi-pe ya', ri ya' ri' kan ch'ajch'oj. Jak'a xabachike ri ninaqo o ri nichapo ri ruch'akul ri chikop ri', xtok man ch'ajch'oj ta. 37Wi xa ta nitzaq jun chikop kamineq chirij ri ija'tz ri nibetik yan, ri ija'tz ri' kan k'a ch'ajch'oj na. 38Jak'a wi ri ija'tz ri' k'o ta kan pa ya' y nitzaq-qa ri chikop rik'in, re' kan xtok man ch'ajch'oj ta.
39Wi ta niken jun chikop ri utz nitij, achike xtichapo ri ruch'akul ri chikop ri', xtok man ch'ajch'oj ta chijun q'ij k'a toq xtiq'equmer-qa. 40Ri nitijo ri ruch'akul ri chikop ri', k'o chi nuch'ej ri rutziaq y xtok man ch'ajch'oj ta chijun q'ij k'a toq xtiq'equmer-qa. Y ri nelesan-el ri ruch'akul ri chikop ri' chuqa' k'o chi nuch'ej ri rutziaq y xtok man ch'ajch'oj ta chijun q'ij k'a toq xtiq'equmer-qa.
41-42Ri chikopi' ri nikiqirirej-ki' man ke'itej, xa kan ke'iwixowaj, y chuqa' ri chikopi' ri xenatex yan ri yebiyin rik'in kaji' kaqen, o ri yebiyin rik'in k'iy kaqen; konojel re chikopi' re' man e ch'ajch'oj ta, y kan ke'iwixowaj. 43Man k'a tiben chi yin yixinwetzelaj, roma ye'itej ri chikopi' ri' y nuben chiwe chi yixok man ch'ajch'oj ta. 44Ja yin Jehová ri i-Dios, y man jun chik ri achi'el ta yin. Y roma rix ijachon chik iwi' chuwe yin, roma ri' rix k'o chi man yixmakun achi'el nikiben ri ch'aqa' chik winaqi'; rix xa kan ix ch'ajch'oj-wi y roma ri' man tiben chi yixok man ch'ajch'oj ta koma ri chikopi' ri'. 45Yin Jehová ri xinelesan-pe iwichin ri chiri' pan Egipto richin chi xinok i-Dios. Roma ri' man ix junan ta kik'in ri ch'aqa' chik winaqi', kan ruk'amon chi rix ix ch'ajch'oj, roma yin kan in ch'ajch'oj-wi, xcha' ri Jehová chike.
46Jare' ri ruchojmilal pa kiwi' ri chikopi' ri yebiyin pa ruwi' ulew, ri aj-xik' taq chikopi', konojel ri e richin pa ya' y konojel ri chikopi' ri nikiqirirej-ki' pa ruwi' ulew, 47richin niya' rukojolil ri ch'ajch'oj rik'in ri man ch'ajch'oj ta y niya' kikojolil ri chikopi' ri e tijel kik'in ri man e tijel ta.
Currently Selected:
Lev 11: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
