Jos 5
5
1Konojel ri rey kichin ri amorreo ri ek'o re juk'an-pe chire ri ruchi' ri raqen-ya' Jordán pa qajbel-q'ij y konojel ri rey kichin ri aj-Canaán ri ek'o chunaqaj ri palou, toq xkak'axaj chi ri Jehová xuben chire ri ya' richin ri Jordán chi xpa'e' y xumol-ri' chikiwech ri e rijatzul kan ri Israel y xkiq'axaj, jari' toq xmayamo-qa ri kánima y man xk'oje' ta chik uchuq'a' kik'in rije' chikiwech ri e rijatzul kan ri Israel.
Ri achi'a' xequpix richin xya'ox ketal
2Chupan k'a ri q'ij ri' ri Jehová xubij chire ri Josué: Ke'abana' qupibel rik'in chay y ke'aqupij konojel ri achi'a' richin jun retal richin niq'alajin chi rije' e rijatzul ri Israel; ke'aqupij k'a chi ch'uti'q chi nima'q ri e rijatzul kan ri Israel ri man jani k'o ketal. 3Y ri Josué xeruben k'a ri qupibel y xeruqupij k'a ri achi'a' richin ri retal chi ch'uti'q chi nima'q, chiri' pa taq'aj ruwi-juyu', y rije' xkibij chire ri juyu' ri' Qupibel. 4Ri Josué xuben chi xequpix ri achi'a' richin ri ketal, roma konojel ri e eleneq-pe pan Egipto, ri aj-labal, xa xeken yan kan pa tz'iran ruwach'ulew, 5roma ri achi'a' ri xe'el-pe pan Egipto kan konojel k'a e qupin-pe richin ri ketal. Jak'a ri xe'alex toq e beneq pa bey ri chiri' pa tz'iran ruwach'ulew toq e eleneq chik pe pan Egipto man e qupin ta richin ri retal. 6Konojel k'a ri rijatzul kan ri Israel xebiyin pa tz'iran ruwach'ulew kawineq juna' y kan konojel ri aj-labal ri eleneq-pe pan Egipto xek'is k'a, roma man xkitaqej ta ri ruch'abel ri Jehová. Y roma ri' ri Jehová xuya' rutzij chike chi man nikitz'et ta ri ruwach'ulew ri ruya'on rutzij chire chi nuya' chike ri kite-kitata'; ri ruwach'ulew ri akuchi niwachin-wi ronojel ruwech tiko'n. 7Wakami jak'a ri alk'ualaxela' ri xek'oje' kan pa kik'exel ri kite-kitata', ja rije' ri xequpix richin ri ketal, roma man jani tiya'ox ri etal ri' chike.
8Y toq xequpix yan konojel ri achi'a' richin jun retal, konojel k'a xekanej-qa chiri' akuchi ek'o-wi-qa, k'a toq xe'utzir na. 9Y ri Jehová xubij chire ri Josué: Re q'ij re' ninwelesaj k'a pan iwi' ri qasanri'il ri xik'owisaj pan Egipto; roma ri' ri ruwach'ulew ri' xubini'aj Guilgal*f1* k'a re wakami.
10Y rije' xkinimaq'ijuj ri q'ij toq ri Jehová xuya' ri Solbelri'il. Y re nimaq'ij re' xkiben chupan ri q'ij kajlajuj richin ri ik' ri', toq xqaq'ij-qa, ri chiri' pa Guilgal ri k'o pa taq'aj chuwech-apo ri tinamit Jericó. 11Chupan ri q'ij wolajuj richin ri ik' ri', jari' toq xkitej ri nabey mul ri ruwech ri tiko'n ri richin ri ruwach'ulew ri'. Xkitej k'a jalajoj ruwech ixin k'ilin y chuqa' xkitej kaxlan-wey ri maneq ch'amilej-q'or rik'in. 12Y ri aj-chikajil-wey kan xk'is k'a chupan ri q'ij ri' toq xkitej ri ruwech ri tiko'n ri'. Keri' ri e rijatzul kan ri Israel man jun bey chik xk'oje' ri aj-chikajil-wey kik'in. Y kan chupan k'a ri q'ij ri' xkichop rutijik ri ruwech ri tiko'n ri richin ri ruwach'ulew Canaán.
Ri Josué y ri achin ri ruk'uan jun espada pa ruq'a'
13Y ri Josué k'o k'a ke taq ri' chunaqaj ri tinamit Jericó, toq xutz'et jun achin pa'el chuwech y ruk'uan jun espada pa ruq'a' ri eleneq pa ruk'ojelibal. Y ri Josué xjel-apo rik'in y xubij chire: ¿At achike k'a rat? ¿At qachibil o xa at etzelanel qichin?, xcha' chire.
14K'ari' ri achin ri' xubij chire ri Josué: Man jun chike ri ka'i' ri nabij rat, yin kan in tata'al kichin ri e richin ri Jehová ri in peteneq wakami, xcha'.
Jari' toq ri Josué xuxuk-xumej-ri' chuwech richin xuya' ruq'ij, y xubij chire: Ajaw ¿achike k'a nawajo' nabij chuwe yin ri asamajel?, xcha'.
15Y ri tata'al kichin ri e richin ri Jehová ri' xubij chire: Tawelesaj ri axajab roma re akuchi atk'o-wi kan loq'olej-wi roma wawe' ink'o-wi yin, xcha'. Y ri Josué kan keri' xuben.
Currently Selected:
Jos 5: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.