Jue 21
21
Ri xtani' ri xejach chike ri tzobaj richin ri Benjamín
1Ri israelita kibanon k'a jun jikibel-tzij chiri' pa tinamit Mispá y kibin: Man jun chiqe roj xtuya' ri rumi'al chike ri tzobaj richin Benjamín richin nok rixjayil, e chayineq. 2Chirij ri oyowal ri xbanatej, ri israelita xkimol k'a ki' chiri' akuchi k'o-wi ri rachoch ri Jehová y xek'oje' chiri' chuwech k'a toq xok na ri aq'a', y kan janila k'a xe'oq' y xkibij: 3¡Nimalej Jehová ri at qa-Dios roj israelita! ¿Achike roma kere' xbanatej chupan re qatinamit Israel, chi wakami maneq chik jun tzobaj chiqakojol?, xecha'.
4Ri ruka'n q'ij ri israelita xeyakatej nimaq'a' yan, y xkipaba-q'anej jun porobel chiri' y xkisuj k'a kamelabel ri niporox chijun, y chuqa' xkisuj sipanik richin nikiq'alajirisaj chi junan kiwech rik'in ri Jehová, 5y xkibij k'a chikiwech rije': ¿K'o kami tinamit kichin ri tzobaj richin Israel, ri man xepe ta richin ri molojri'il chuwech ri Jehová wawe' pa Mispá?, xecha'. Kere' xkibij roma chupan ri nabey molojri'il kan kiya'on kitzij chi kan xkekamisex ri man xkepe ta chuwech ri Jehová.
6Ri israelita kan xq'axon k'a ri kánima koma ri aj-Benjamín, ri kach'alal y xkibij: Wakami xelesex k'a el jumul jun chike ri tzobaj richin Israel chiqakojol. 7¿Achike ta k'a niqaben richin nik'oje' ta kixjayilal ri achi'a' aj-Benjamín ri man xeken ta, roma roj kan qabanon k'a jun jikibel-tzij chuwech ri Jehová richin man niqaya' ta ri qami'al chike richin ye'ok kixjayilal?, xecha'. 8Y xkik'utuj k'a chi wi k'o jun tinamit chikikojol ri tzobaj richin Israel ri man xjote' ta q'anej chuwech ri Jehová chiri' pa Mispá toq xban ri nabey molojri'il. Y xkinabej k'a chi ri aj-Jabés richin Galaad man xe'apon ta chupan ri molojri'il ri', 9roma toq xsik'ix kibi' konojel ri tzobaj richin Israel, kan man jun chike ri aj-Jabés ri xapon ta. 10K'ari' konojel ri kimolon-ki' xekiteq-el 12,000 aj-labal ri maneq xibinri'il chikiwech, y xkibij-el chike chi kebe pa Jabés richin yebekikamisaj chi espada konojel ri winaqi' ri ek'o chiri', chi achi'a', chi ixoqi', chi alaboni', chi ak'uala', 11jak'a ri xtani' man yekikamisaj ta kan. Konojel k'a ri achi'a' y ri ixoqi' ri e k'ulan chik k'o chi yekikamisaj kan.
12Keri' xbanatej; y xe'ilitej k'a pe e 400 xtani', y xek'amer-pe pa Siló, ri akuchi ek'o-wi-qa ri ch'aqa' chik israelita. 13Chirij ri' ri winaqi' israelita xkiteq koyoxik ri aj-Benjamín ri xkewaj-ki' chiri' pa Rimón, y xkibij-el chike chi tik'is ri oyowal y tijunamatej-kiwech. 14Y ri aj-Benjamín kan xetzolej k'a, y ri ch'aqa' chik israelita xekiya' k'a el jujun kixjayilal ri e kik'amon-pe pa Jabés; jak'a ri xtani' xa e juba' ok y man xeruben ta el konojel.
15Chirij ri' ri israelita xkijoyowaj chik kiwech ri aj-Benjamín, roma ri Jehová xuben chi maneq chik jun tzobaj chikikojol rije'. 16K'ari' ri achi'a' ri k'o kiq'ij xkibij: ¿Achike ta niqaben richin nik'oje' kixjayilal ri k'a xek'oje' na kan, roma ri ixoqi' kichin ri tzobaj Benjamín xa xeken konojel? 17Wakami ja k'a ri xkewaj kan ki' ri xkeyako-q'anej ri tzobaj richin Benjamín, richin chi man nik'is ta qa jumul jun tzobaj chiqakojol. 18Jak'a roj man yojtikir ta niqaya' ri qami'al chike richin ye'ok kixjayilal, roma kan qabanon jun jikibel-tzij richin man yeqaya' ta ri qami'al chike ri aj-Benjamín y kere' qabin: Itzel xtiqaqa pa ruwi' ri xtiya'on rumi'al chike ri aj-Benjamín, xojcha'. 19Qetaman k'a chi ronojel juna' k'o ri nimaq'ij richin ri Jehová chiri' pa Siló, xecha'. Y ri Siló k'o pa xaman-q'anej chire ri tinamit Betel, y chuqa' pa relebel-q'ij chire ri bey ri nel-el pa Betel y napon-q'anej pa tinamit Siquem, y pa xokon chire ri tinamit Leboná.
20Jari' toq ri achi'a' ri k'o kiq'ij xech'on kik'in ri achi'a' aj-Benjamín ri man xya'ox ta kan kixjayil, y xkibij: Kixbiyin chunaqaj ri Siló y tiwewaj-iwi' chukojol ri tiko'n richin uva. 21Kan tinaba' k'a iwi'; y toq xtitz'et chi ri xtani' aj-Siló xkebe'el-pe pa tzobaj y yexajo', chi'anin kixel-pe ri akuchi ixk'o-wi, y chi'ijujunal tik'ama' kan jun xten ri aj-Siló y kixbiyin pan iruwach'ulew ri richin Benjamín. 22Y wi ri kitata' o ri kixibal ri xtani' yepe qik'in richin yech'ojin, roj kere' k'a xtiqabij chike: Tibana' utzil richin ye'iya' kan ri xtani' chike, roma roj chupan ri labal ri xqaben, man xeqil ta kan xtani' richin ye'ok kixjayilal konojel rije'; y chuqa' rix maneq imak chire ri jikibel-tzij roma man ja ta rix ri xixya'on-el chike, xa kan xe'eleq'ex k'a el, xqojcha' chike, xecha'.
23Y ri tzobaj richin Benjamín kan keri' k'a xkiben; xk'oje' k'a kixjayilal achi'el ri kajlabal rije'. Re' xekeleq'aj kan chikikojol ri xtani' aj-Siló ri yexajo'. Xekik'uaj k'a el y xetzolej pa kiruwach'ulew ri kichinan kan, y xkipaba' chik q'anej ri kitinamit, y chiri' xek'oje-wi. 24Ri ch'aqa' chik israelita chuqa' xetzolej pa taq kitzobaj y xetzolej pa kiruwach'ulew ri akuchi kichinan wi kan achi'el ri kajlabal ri aj pa kachoch.
25Chupan ri q'ij toq xbanatej ronojel re' man jani k'o rey pan Israel; y roma ri' chikijujunal nikiben ri achike niqa' chikiwech.
Currently Selected:
Jue 21: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.