Esd 8
8
Ri kibi' ri achi'a' ri xetzolin-pe pa Jerusalem.
1Ja kibi' re' ri aj-raqen pa kiwi' ri tzobaj ri xe'el-pe wik'in yin pa Babilonia chupan ri q'atbel-tzij richin ri Artajerjes: 2Guersón ri rijatzul kan ri Finees; Daniel ri rijatzul kan ri Itamar; Hatús ri rijatzul kan ri David 3y ri Secanías; Zacarías rijatzul kan ri Parós e rachibilan e 150 achi'a'; 4ri Eliehoenai ruk'ajol ri Zeraías, ri rijatzul kan ri Pahat-moab e rachibilan e 200 achi'a'; 5ri Secanías ruk'ajol ri Jahaziel, ri rijatzul ri Zatú e rachibilan e 300 achi'a'; 6ri Ébed ri ruk'ajol ri Jonatán, ri rijatzul ri Adín e rachibilan e kawineq lajuj achi'a'; 7ri Isaías ruk'ajol ri Atalías, ri rijatzul ri Elam e rachibilan e oxk'al lajuj achi'a'; 8ri Zebadías ruk'ajol ri Micael, ri rijatzul ri Sefatías e rachibilan e jumuch' achi'a'; 9ri Abdías ruk'ajol ri Jehiel, ri rijatzul ri Joab e rachibilan e 218 achi'a'; 10ri Selomit ruk'ajol ri Josifías, ri rijatzul ri Baní e rachibilan e 160 achi'a'; 11ri Zacarías ruk'ajol ri Bebai, ri rijatzul kan ri jun chik Bebai e rachibilan e juwineq waqxaqi' achi'a'; 12ri Johanán ruk'ajol ri Hacatán, ri rijatzul ri Azgad e rachibilan e 110 achi'a'; 13ri Elifélet, Jeiel, y Semaías, ja e ruk'isibel e rijatzul kan ri Adonicam e kachibilan e oxk'al achi'a'; 14y ri Utai y Zabud, ri e rijatzul kan ri Bigvai e kachibilan e oxk'al achi'a'.
Ri samajela' pa rachoch ri Dios
15Xenmol k'a chuchi' ri raqen-ya' ri peteneq pa tinamit Ahavá chiri' pa Babilonia, y xojk'oje-qa chiri' oxi' q'ij. Y xinkanoj k'a chikikojol ri nuwinaq y chikikojol ri sacerdote, y man xenwil ta ch'aqa' chik levita. 16K'ari' xenteq-el ri Eliézer, Ariel, Semaías, Elnatán, Jarib, jun chik Elnatán, Natán, Zacarías y ri Mesulam; konojel ri achi'a' ri' kan k'o janila kiq'ij. Y keri' chuqa' xenteq-el ri Joiarib y jun chik Elnatán, achi'a' ri kan e aj-na'oj. 17Xenteq-el k'a el rik'in ri Idó, jun aj-raqen ri chiri' chupan ri tinamit Casifiá, y xinbij k'a el chike ri achike ch'abel ri k'o chi nikibij chire ri Idó, y chike ri kijatzul ri samajela' ri xesamej chupan ri rachoch ri Dios, richin chi yekik'en ta pe samajela' ri yesamajin ri Dios ri chiri' pa Jerusalem. 18Ri rutzil ri Dios k'o pa qawi', y roma ri' xkik'en-pe jun achin ri aj-na'oj rubini'an Serebías. Rija' ruk'ajol ri Mahli, jun chike ri rijatzul ri Leví, ri rijatzul kan ri Israel. Chuqa' xekik'en-pe ri e ruk'ajol y ri e rach'alal; konojel rije' e waqxaqlajuj. 19Chuqa' xekik'en-pe ri Hasabías, ri Isaías rijatzul ri Merarí, y ri ruk'ajol y ri rach'alal, konojel rije' e juwineq. 20Y chuqa' xekik'en-pe e 220 kijatzul ri samajela' ri xesamej pa rachoch ri Dios, ri xeya'ox ojer kan koma ri David y ri tata'al, richin xe'ok samajela' kichin ri levita. Y k'ari' xtz'ibex kan ri kibi' ri e 220.
21Y chiri' chunaqaj ri raqen-ya' Ahavá, xinbij chi tiqach'ara' jun q'ij richin yojmewayin, richin chi niqaqasaj-qi' chuwech ri qa-Dios, y richin niqak'utuj chire chi utz ta yojbe, y keri' ri qalk'ual chuqa', y keri' rik'in chuqa' ri k'o qik'in. 22Xqaben keri' roma yin kan xik'ix k'a richin nink'utuj chire ri rey, richin yeruteq achi'a' ri yech'oke' chikij kiej, richin chi yojkito' chikiwech ri e etzelanel qichin chupan ri bey. Y chuqa' roma xa kan xqabij yan chire ri rey chi ri Dios kan yojruto' qonojel ri yojkanon richin. Jak'a ri nimalej ruchuq'a' y ri labal kan k'o pa kiwi' ri winaqi' ri nikimalij kan rija'. 23Roma ri' xojmewayin k'a y xqak'utuj chire ri qa-Dios pa ruwi' ronojel re', y rija' kan xojruk'uluba-pe.
24K'ari' xencha' k'a e kablajuj sacerdote ri k'o más kiq'ij, y chuqa' ri Serebías y ri Hasabías, y e lajuj kach'alal. 25Y xinwetaj k'a ri saqipueq, ri q'anapueq y ronojel ri samajibel ri xkiya-apo ri rey, ri rupixabanela' y ri e tata'al, y konojel israelita ri ek'o-apo chiri', richin niban-q'anej ri rachoch ri qa-Dios. 26Xinwetaj k'a y xinjech-apo chike 490 quintal saqipueq, leq ri banon rik'in saqipueq ri ralal oxk'al wolajuj quintal, oxk'al wolajuj quintal q'anapueq, 27y chuqa' juwineq leq ri banon rik'in q'anapueq ralal más juba' waqxaqlajuj libra y ka'i' samajibel ri banon rik'in q'enq'oj-pueq ri kan jebel banon chire y kan janila rejqalen, y nitzu'un achi'el xa ja ri banon rik'in q'anapueq.
28Y chuqa' xinbij chike: Rix kan ix ch'aron chire ri Jehová y chuqa' re samajibel re', re saqipueq y re q'anapueq. Re sipanik re' kan xkiya' rik'in ronojel kánima chire ri Jehová Dios, ri qa-Dios y ri ki-Dios ri qati't-qamama'. 29Tichajij jebel y tiyaka' k'a, k'a xkixapon na pa Jerusalem. K'ari' xtiwetaj pa rachoch ri Jehová chikiwech ri tata'al kichin ri sacerdote, ri e levita y ri aj-raqen pa kiwi' ri taq tzobaj ri ek'o pa Jerusalem, xicha'. 30Keri' ri e sacerdote y ri e levita xkik'ul ri saqipueq y ri q'anapueq y ri samajibel, richin nikik'uaj pa Jerusalem richin nibekiya' pa rachoch ri Jehová ri qa-Dios.
Ri e sacerdote y ri e levita xetzolin pa Jerusalem
31Y xojel-pe chiri' rik'in ri raqen-ya' Ahavá chupan ri q'ij kablajuj richin ri nabey ik' chire ri juna', richin xojbe pa Jerusalem. Ri ruq'a' ri Jehová ri qa-Dios k'o k'a pa qawi', y xojrukol pa kiq'a' ri eleq'oma' ri ye'el-pe pa taq bey y chuqa' ri e etzelanel qichin. 32Y xojapon k'a pa Jerusalem, y xojuxlan k'a oxi' q'ij.
33Chupan ri rukaj q'ij, xetex chik k'a ri saqipueq, ri q'anapueq y ri samajibel, chupan ri rachoch ri Jehová ri qa-Dios. Xqajech k'a pa ruq'a' ri sacerdote Meremot ruk'ajol ri Urías, y rik'in rija' k'o k'a ri Eleazar ruk'ajol ri Finees, y chuqa' ka'i' levita: Ri Jozabad ruk'ajol ri Josué, y ri Noadías ruk'ajol ri Binuy. 34Chupan k'a ri q'ij ri' xetex y xajlex, y ronojel xqajech kan, y ronojel xtz'ibex k'a kan.
35K'ari' qonojel ri oj uk'uan-el xojtzolin pa Jerusalem, xqasuj chikop richin niporox chire ri qa-Dios. Y xqasuj kablajuj nima-alaji' achija' taq wákix, jumuch' waqlajuj achija' taq karne'l, oxk'al wuqlajuj alaji' achija' taq karne'l y kablajuj achija' tzuntzun richin nikuyutej qamak. Ronojel re' xeporox richin xqasuj chire ri Jehová. 36Y xkijech k'a ri pixa' ri ruya'on-pe ri rey chiqe, y xkijech chike ri aj-raqen y chike ri yeq'aton-tzij pa ruwi' ri ruwach'ulew ri k'o pa qajbel-q'ij chire ri raqen-ya' Éufrates. Y rije' kan xeto'on qik'in y rik'in ri rachoch ri Dios.
Currently Selected:
Esd 8: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
