Esd 4
4
Ri achi'a' ri nikajo' nikiq'et ri samaj
1Toq ri achi'a' ri e etzelanel kichin ri aj-Judá y ri aj-Benjamín xkak'axaj chi rije' nikipaba' chik q'anej ri rachoch ri Jehová, ri ki-Dios, 2jari' toq xebe rik'in ri Zorobabel y kik'in ri e aj-raqen kichin ri winaqi' y xkibij chike: Tiya' q'ij chiqe richin yixqato', roma roj chuqa' niqakanoj ri i-Dios rix. Y chuqa' kan jantape' qasujun-pe kamelabel chire ri Dios, chupan-pe ri q'ij toq xojoqaqa wawe', toq xojruteq-pe ri Esarhadón rey richin Asiria, xecha'.
3Jak'a ri Zorobabel, ri Josué y ri ch'aqa' chik aj-raqen xkibij chike: Man ruk'amon ta richin niqapaba-q'anej ri rachoch ri Dios junan iwik'in rix. Kan qayon roj xtiqapaba-q'anej ri rachoch ri Jehová, ri qa-Dios, roma kan keri' xubij chiqe ri Ciro rey richin Persia, xecha'.
4K'ari' ri etzelanel kichin xkiben chike ri winaqi' aj-Judá chi xmayamo-qa ri kánima, y chuqa' xkiben chike chi xpe xibinri'il chike richin man nikipaba' ta chik q'anej ri rachoch ri Jehová. 5Xekipuaqij k'a jujun achi'a' ri ek'o pa q'atbel-tzij, richin chi tikibana' chike ri winaqi' ri xetzolin-pe chi tikimalij kik'u'x y man nikiben ta q'anej ri samaj. Keri' k'a xkiben ri winaqi' ri' janipe' xq'aton-tzij ri rey Ciro y chuqa' toq xq'aton-tzij ri Darío rey richin Persia.*f1*
6Y toq k'iy yan juna' tiq'ax kan richin nuq'et-tzij ri Darío, jari' toq xuchop nuq'et-tzij ri rey Asuero. Y chupan ri q'ij ri' xban k'a jun sujunik chikij ri winaqi' aj-Jerusalem y ri aj-Judá.
7Y toq q'axineq chik k'a k'iy juna', toq niq'aton-tzij ri rey Artajerjes ri chiri' pa ruwach'ulew Persia, jari' toq ek'o jujun aj-raqen aj-Persia ri ek'o chiri' pan Israel, ri kibini'an Bislam, Mitrídates y ri Tabeel. Y rije' y ri ch'aqa' chik kachibil xkitz'ibaj jun wuj chire ri rey ri', y ri wuj ri' pa ch'abel arameo xkitz'ibaj-wi.
8Chuqa' jun aj-raqen pa kiwi' ri aj-labal rubini'an Rehúm, y jun aj-tz'ib rubini'an Simsai xkitz'ibaj jun chik wuj chire ri rey, ri nich'on itzel chikij ri winaqi' aj-Jerusalem. 9Y toq ri Rehúm y ri Simsai xkitz'ibaj ri wuj ri', chuqa' kan ek'o chik ch'aqa' winaqi' ri xkitz'ibaj-el: Ri ch'aqa' chik e kachibil, ri to'onela', ri ch'aqa' chik aj-raqen pa kiwi' ri winaqi' ri e apowineq chiri' pa Persia, pan Erec, pa Babilonia, pa Susa, pan Elam, 10y ri ch'aqa' chik winaqi' ri xeruk'en-pe ri rey Asnapar ojer kan toq xuben chike chi xek'oje' pa tinamit Samaria y ri ch'aqa' chik taq tinamit ri ek'o pa qajbel-q'ij chire ri raqen-ya' Éufrates. 11Y ja wuj re' ri xkiteq-el y kere' nubij: Niqateq rutzil awech rat rey Artajerjes. Roj ri oj asamajela' ri ojk'o wawe' pa qajbel-q'ij chire ri raqen-ya' Éufrates. 12Niqaq'alajirisaj chawe rey, chi ri judío ri xe'el-pe pan aruwach'ulew, ri xepe chik wawe' pa Jerusalem nikich'ob nikipaba' chik q'anej jun bey ri nimalej tinamit ri'. Y rije' janila e itzel y kan nikajo' yeyakatej chawij, y roma ri' nikiben ruchojmil ri ruxe' y xkichop yan q'anej rubanik ri tz'aq. 13Wakami k'a rey, tawetamaj chi wi ri tinamit xtiyak chik q'anej, y ri tz'aq xtipabex chik el jun bey, man xtikitoj ta chik ri kan k'o chi nikitoj chawe: Ri nitoj roma ri ulew, ri jay y ri nitoj roma ri k'ayij; y keri' kan xtik'is k'a qa ri abeyomel. 14Y roma kan yojsamej awik'in, kan man ruk'amon ta k'a chi choj yeqatzu' ri nikiben. Y roma ri' niqateq-el rubixik chawe, 15richin chi titz'et chupan ri wuj ri akuchi tz'iban-wi ri xbanatej kik'in ri ate-atata'. Y chiri' xtatz'et chi rije' kan jun tinamit ri k'o yakatajinenri'il kik'in, y kan e banoy ch'a'oj chike ri e rey y chike ri ch'aqa' chik tinamit. Y ojer kan, xkimol-ki' y xeyakatej chirij ri q'atoy-tzij y roma ri' kan xk'is ri kitinamit Jerusalem. 16Roma ri' niqabij chawe, wi re tinamit re' xtipabex chik q'anej jun bey, y xtik'achoj-q'anej ri tz'aq, ri ruwach'ulew ri k'o wawe' pa qajbel-q'ij chire ri raqen-ya' Éufrates kan man xtok ta chik awichin rat.
17K'ari' ri rey Artajerjes xuteq rubixik chike: Ri Rehúm ri aj-raqen pa kiwi' ri aj-labal, y chuqa' chire ri Simsai ri aj-tz'ib y chike ri e kachibil ri ek'o pa Samaria y ri ch'aqa' chik tinamit ri ek'o pa qajbel-q'ij chire ri raqen-ya' Éufrates. Ja ri raxnaqil y ri uxlanibel-k'u'x tik'oje' iwik'in. 18Ri wuj ri xiteq-pe chuwe kan xq'axex chinuwech pa nuch'abel. 19Roma ri' xinbij chi titz'et ri wuj akuchi tz'iban-wi ri xbanatej, y kan xilitej chikij chi ri tinamit ri' kan k'iy mul xeyakatej chikij ri ch'aqa' chik rey. 20Y kan xek'oje' rey pa Jerusalem, ri kan janila kiq'ij, ri xek'oje' pa ruwi' ri ruwach'ulew ri k'o pa qajbel-q'ij chire ri raqen-ya' Éufrates. Y chike k'a rije' xtoj-wi ri méro ri kan k'o chi nitoj chire ri rey: Ri nitoj roma ulew, ri jay y ri nitoj roma ri k'ayij. 21Roma ri', tibij chike ri winaqi' ri' chi man chik tikiben ri samaj ri', y kan k'a xtinbij na yin, k'ari' xtiban chik q'anej. 22Y kan titz'eta' k'a jebel, roma wi chaq k'a nikiben re samaj re' kan k'iy ruk'ayewal xtipe pa qawi' roj, xcha-el.
23K'ari' ri wuj ri taqon-el roma ri rey Artajerjes xq'axex chikiwech pa kich'abel ri Rehúm, ri Simsai ri aj-tz'ib y ri e kachibil, jari' toq xebe k'a chi'anin pa Jerusalem kik'in ri judío. Y rik'in uchuq'a' xkiben chike chi tikitanaba' kan ri samaj ri'.
Toq xban-q'anej jun bey chik ri rachoch ri Dios
24Rokik ri rey Darío k'a k'es na y chupan ri ruka'n juna' chire ri ruq'atbal-tzij, ri judío xkichop chik rubanik ri samaj ri kichapon chire ri rachoch ri Dios chiri' pa Jerusalem.
Currently Selected:
Esd 4: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
