Esd 1
1
Ri ruchojmilal ri xuya' ri rey Ciro
1Chupan ri ruwach'ulew Persia, k'o k'a jun rey rubini'an Ciro. Chupan ri nabey juna' chire ri ruq'atbal-tzij, ri Jehová xusiloj ri ránima richin xuteq wuj chupan ronojel ri ruwach'ulew ri k'o pa ruq'a'. Ronojel re' xuben richin xbanatej achi'el xubij ri Jehová chire ri Jeremías toq k'a k'es na. Ri Ciro xerutaqala' wuj ri chiri', y kere' xubij: 2Kere' k'a ri ninbij yin, Ciro, rey richin Persia: Ri Jehová, ri Dios richin ri kaj, xuya' ronojel ri q'atbel-tzij pa nuq'a' richin chijun ruwach'ulew. Y ri Dios xubij chuwe chi tinpaba-q'anej jun rachoch pa tinamit Jerusalem, ri k'o chiri' pa ruwach'ulew Judá. 3Chi'iwonojel k'a rix ri ix ruwinaq ri Jehová, ja ri Dios xtito'on iwichin. Y rik'in ri ruto'onik rija' xkixbe pa Jerusalem, richin nibepaba-q'anej ri rachoch ri Jehová, ri Dios ri iwichin rix israelita, roma ja rija' ri Dios ri niya'ox ruq'ij ri chiri' pa Jerusalem. 4Iwonojel k'a rix ri man yixtzolin ta chik ri xabakuchi ixk'o-wi, kixto'on k'a kik'in ri iwinaq ri yetzolin. Kixto'on-el rik'in saqipueq, q'anapueq y ri achike nik'atzin chike, chuqa' rik'in kawej. Y man xaxe ta k'ari', chuqa' tiya-el rik'in ronojel iwánima sipanik richin ri rachoch ri Dios, ri k'o pa Jerusalem, xcha-el chupan ri wuj.
Toq xetzolej pa Jerusalem ri israelita
5K'ari' xeyakatej-q'anej konojel ri aj-raqen kichin ri tzobaj ri Judá y ri Benjamín, y chuqa' ri e sacerdote y ri ch'aqa' chik levita. Kan konojel k'a rije', ri Jehová xuben chike richin xusiloj ri kánima richin xkipaba' chik q'anej ri rachoch rija', ri k'o pa Jerusalem. 6Y konojel k'a ri ek'o chikinaqaj kan janila xekito-el. Xkiya' k'a el saqipueq, q'anapueq y ri achike nik'atzin chike, y xekiya' chuqa-el kawej y jebelej taq k'ojelibel chike. 7Y ri rey Ciro xrelesaj-pe ronojel ri samajibel richin ri rachoch ri Jehová. Y re samajibel re' ruk'amon-pe ri rey Nabucodonosor toq xuben oyowal chiri' pa Jerusalem, ri e ruya'on chupan ri rachoch ri ru-dios rija'. 8K'ari' ri Ciro xuya' k'a el pa ruq'a' ri Mitrídates ri yakol méro. Y rija' kan xrajlaj-el y k'ari' xujech pa ruq'a' ri Sesbasar, ri tata'al richin ri ruwach'ulew Judá. 9Y jare' k'a ri rajlabal ri leq:
Juwineq lajuj nima'q taq leq ri banon rik'in q'anapueq,
1,000 leq ri banon rik'in saqipueq,
Juwineq beleje' qupibel,
10Juwineq lajuj qumbel banon rik'in q'anapueq,
410 qumbel banon rik'in saqipueq
y jun chik 1,000 jalajoj ruwech taq qumbel.
11Y ronojel ri samajibel ri banon rik'in q'anapueq y saqipueq e 5,400. Ronojel re' xeruk'en-pe ri Sesbasar toq xe'el-pe pa ruwach'ulew Babilonia, richin xepe pa Jerusalem.
Currently Selected:
Esd 1: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
