Ez 38
38
Ri xtibanatej pa ruwi' ri rey Gog
1Ri Jehová xch'on chik wik'in y xubij chuwe: 2Rat Ezequiel, kach'on pa nubi' yin rik'in ri Gog rey richin ri tinamit Mésec y ri Tubal chupan ri ruwach'ulew Magog. 3Y taya' k'a re jun rutzijol re' chire: Yin Jehová in yakatajineq chawij. 4Y roma ri' xtinya-el jun chapbel-ti'ij pan akaxtate' richin xkatuk'uex-el xabakuchi. Y k'ari' xkatinwelesaj-el rat y konojel ri awinaq ri yech'oke' chirij kiej y ri achi'a' ri yebe chi kaqen, stape' k'o rutobal ruwa-kik'u'x, ki-espada y jalajoj ruwech kitobal. 5Kan xkekachibilaj k'a pe aj-labal aj-Persia, aj-Etiopía y aj-Libia; konojel rije' kik'ualon kitobal y rutobal-kijolon. 6Chuqa' yekachibilaj-pe ri aj-labal aj-Gómer y aj-Bet-togarmá, ri k'o pa xaman. Y ri e aj-labal re' xkek'iyer janila, koma re winaqi' re'.
7Tabana' achojmil rat y konojel ri ek'o awik'in y chi'iwonojel rix xkixk'oje' chuxe' nutzij yin. 8Y toq q'axineq chik k'iy juna' xtak'ul jun rutzijol richin namej ri ruwach'ulew Israel, ri chaq xaxe labal xban rik'in ojer kan, jak'a xa kan xtitikir chik xtiyakatej-q'anej. Y ri ruwinaq xa xketzolej chik richin xkek'ase' chik pa taq juyu' richin ri kiruwach'ulew, ri wulatejineq kan. Y konojel re winaqi' re' xkek'ase' rik'in uxlanibel-k'u'x. 9Jak'a rat Gog, ri aj-labal y ri ch'aqa' chik winaqi' xkixapon kik'in ri israelita richin yixyakatej chikij, achi'el nibiyin jun kaq'iq'-job y achi'el nibiyin jun q'eqelej-sutz'.
10Yin Jehová ri yibin ronojel re'. Chupan k'a ri q'ij ri', rat kan xke'ach'obola' k'a janila itzel taq banobel. 11Y xtich'ob richin yixok chupan ri kitinamit ri winaqi' israelita ri kikuquban kik'u'x y man jun nikimey. Man jun tz'aq kiya'on chikij ri kitinamit, ni man kiya'on ta nima'q taq ch'ich' chirij ri ruchi' ri kachoch. 12Rije' xtikiyek chik q'anej ri kitinamit y xa xtikimol chik ki' pa taq jalajoj ruwach'ulew. Xkek'oje' chuqa' kawej y kibeyomel, y xkek'oje' pa ruk'u'x ri ruwach'ulew. Jak'a rat xtach'ob chi xkayakatej chikij richin xtak'uaj k'a el ronojel re'. 13Chuqa' xkepe ri winaqi' richin ri ruwach'ulew Sabá y ri Dedán y ri k'ayinela' richin ri ruwach'ulew Tarsis y konojel ri ruwinaq, richin xtikimej chuwi-kiq'a' ri k'o rejqalen: Ri q'anapueq, ri saqipueq, ri awej y ri ch'aqa' chik ri kichin rije'.
14Roma ri' kach'on pa nubi' yin rik'in ri Gog y kere' k'a tabij chire: Toq ri nutinamit Israel jebel rukuquban ruk'u'x, jari' toq xkayakatej k'a pe rat chirij. 15Kan xkatel k'a pe pan aruwach'ulew ri k'o pa xaman, kan e awachibilan-pe ri e nima'q taq tzobaj achi'a' yech'oke' chirij kiej. 16Rat Gog y ri aj-labal kan anineq k'a xkixpe y man jun xtipaban iwichin, achi'el toq man jun nipaban richin jun sutz'. Re' xtibanatej pa ruk'isibel taq q'ij toq xtinben k'a chawe richin xkayakatej chirij ri nutinamit. Y chupan ri q'ij ri' ri ch'aqa' chik ruwach'ulew xtiketamaj chi ja yin ri in Loq'olej Jehová.
Ri rutojbalil rumak ri rey Gog
17Yin Jehová ninbij: Chawij k'a rat in ch'owineq-pe ri ojer kan toq yech'on pa nubi' ri e q'alajirisey nuch'abel ri ek'o chiri' pan Israel. Rije' kan xkiya' k'a rutzijol ri ojer kan chi xtinben chawe richin no'achapa-el ri nutinamit Israel. 18Toq rat xtak'en kan ri ruwach'ulew Israel, kan xtiyakatej k'a janila woyowal chawij. Yin Jehová ri ink'o pa ruwi' ronojel ri yijikiban. 19Rik'in ri ruq'aq'arinen ri woyowal kan ninya' nutzij chi chupan ri q'ij ri' xtinbenbana' jun nimalej silonel ri chiri' pa ruwach'ulew Israel. 20Ri ker ri ek'o chupan ri palou, ri aj-xik' taq chikopi', ri k'uxunela' taq chikopi', ri yejepejot yebiyin; konojel k'a re' kan xkebaybot chinuwech. Chuqa' konojel winaqi' ri e richin ri ruwach'ulew keri' xtikiben. Ronojel juyu' xkewuluwu', ri nimalej taq abej xketzaq y ronojel tz'aq xkewulatej. 21Chupan ri q'ij ri' xtinteq k'a pe chawij rat Gog, kamik rik'in espada chupan chijun ruwach'ulew. Chuqa' xtinben chi xtisach kik'u'x ri aj-labal richin xtikikamisaj-qa-ki' chikiwech rije'. 22Kan xtinya' k'a rutojbalil-mak pan awi' y xtinteq-pe nimalej taq yabil chiwij rix y ri ch'aqa' chik winaqi'. Chuqa' kan e k'iy chiwe rix ri xkixinkamisaj. Xtinben k'a chi xtipe jun nimalej kamik job, saqboch rik'in q'aq' y chuwilej-abej ri xtiqaqa-pe chila' chikaj. 23Keri' xtink'ut k'a chikiwech ri ch'aqa' chik ruwach'ulew chi yin kan in loq'olej y kan nimalej nuq'ij. K'ari' k'a xtiketamaj konojel chi ja yin Jehová ri ink'o pa ruwi' ronojel.
Currently Selected:
Ez 38: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
