Ez 35
35
Ri xtuk'uluwachij ri ruwach'ulew Seir
1Ri Jehová xch'on chik wik'in y xubij chuwe: 2Rat Ezequiel, katzu'un kela' pa ruwach'ulew Seir,*f12* y tabij chike ri achike ri xtiqaqa pa kiwi'. 3Y jare' k'a ri rutzijol: Yin, ri Jehová, kan in yakatajineq chiwij, y xtinq'alajirisaj chiwe ri xtibanatej pan iwi'. Xtintzeqej k'a ri nuq'a' pan iwi' y xtinben jun tz'iran chire ri iruwach'ulew y xtitole' kan. 4Kan xkewuluwu' kan ri itinamit, y xkemalin kan. K'ari' xtiwetamaj chi ja yin Jehová.
5Xa kan jantape' ik'ulula'an-pe ri nutinamit Israel y rix xiya' q'ij chi rije' xech'akatej toq nikik'ul ri rutojbalil ri kimak. 6Jak'a yin Jehová, kan ninya' nutzij chi kan xkixinjech pa ruq'a' ri kamik y ri kamik kan xkixrutzeqelibej. Roma rix kan xe'iwetzelaj ri iwach'alal, ri kamik kan xkixrutzeqelibej. 7Kan xtinwulaj k'a ri iruwach'ulew y xtinben k'a tz'iran chire. Y man xtinya' ta q'ij chi ek'o ta chik winaqi' xkeq'ax chiri'. 8Xke'ilitej k'a kaminaqi' xabakuchi, roma xtintaluj ri ich'akul pa ruwi' juyu', kojol taq juyu' y pa taq siwan. 9Yin xtinben k'a chire ri iruwach'ulew richin xtitole' kan richin jantape' y kan man jun bey chik xkeyakatej-q'anej ri nima'q taq itinamit. K'ari' xtiwetamaj k'a chi ja yin Jehová.
10Rix kan xich'ob k'a chi ri ruwach'ulew Israel y ri ruwach'ulew Judá, xke'ok iwichin ri chi e ka'i' ajawaren ri'. Y stape' yin kan ink'o ri chiri', kan man xiya' ta wejqalen. 11Rix kan xe'iwetzelaj, kan xiwajo' xk'oje' iwik'in ri xk'oje' kik'in rije'. Roma ri', yin Jehová kan ninya' k'a nutzij chi kan xtinya' ruk'exel chiwe. Toq yin xtinya' ri rutojbalil pan iwi', k'ari' xtretamaj ri nutinamit chi ja yin ri' ri in Jehová. 12K'ari' k'a xtiwetamaj rix aj-Edom chi yin Jehová xinwak'axaj chi xixch'on itzel chikij rije', roma xich'ob chi ri kiruwach'ulew rije' jachon chik chiwe richin niwichinaj. 13Rik'in k'a ri ich'abel kan xinimirisaj k'a iwi' y kan janila k'a itzel xixch'on chuwij. Y yin kan xinwak'axaj ronojel. 14Y roma ri' yin Jehová ri ink'o pa ruwi' ronojel, ninya' k'a nutzij chi chijun k'a ri ruwach'ulew xkekikot chiwij toq xtikak'axaj chi yin xkixink'is. 15Achi'el xixkikot rix chikij ri nuwinaq israelita toq xwulatej ronojel kichin rije', keri' chuqa' xtinben chiwe rix chi xtitole' kan ri juyu' richin Seir y chijun chuqa' ri ruwach'ulew Edom. K'ari' xtiketamaj konojel winaqi' chi ja yin Jehová, xcha'.
Currently Selected:
Ez 35: KQC
Highlight
Share
Compare
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
