Ez 32
32
Ri rey richin Egipto nijunamex rik'in jun chikop aj pa ya'
1Toq xtz'aqet yan kablajuj juna' chi xojk'amer-pe pa Babilonia, chupan ri nabey q'ij chire ri ik' kablajuj, ri Jehová xch'on chik wik'in y xubij chuwe: 2Rat Ezequiel, tabixaj re jun chik bix re' richin bis chire ri rey richin ri ruwach'ulew Egipto. Y kere' tabij: Rat rey at achi'el jun koj ri nibiyaj pa ruwi' chijun re ruwach'ulew. Rat chuqa' at achi'el jun nimalej ayin ri atk'o pa taq palou y ri pa raqen taq ya'. Y rik'in ri awaqen natuk ruxe' ri ya' y ch'abeq-ch'abeq nuben ruwech ri ya'.
3Roma ri' yin Jehová ninbij chi xkenk'en-pe k'iy tzobaj winaqi' richin xtikik'eq jun ya'l pan awi' richin xkatkichop. 4Xkenqirirej-el ri awinaq chuwech re ruwach'ulew y xkenpunuba' kan chiri'. Ri aj-xik' taq chikopi' xkechake' chiwij richin yixkitej, y ri chikopi' ri ek'o pa k'echelaj janila xtinoj kipan rik'in ri ich'akul. 5Y keri' rije' xtikitaluj ri ich'akul pa ruwi' taq juyu' y ri taq'aj kojol taq juyu'. 6Y kan xtibiyin k'a ri ikik'el chuwech ri ruwach'ulew y napon k'a pa k'echelaj. Y kan xkenoj k'a ri akuchi nuk'ul-wi-ri' ri ch'uti'n raqen taq ya'.
7Xkixink'is k'a achi'el toq nichup jun q'aq'. Y chuqa' xtibeq'equmatej ruwech ri kaj richin man yesaqirisan ta ri ch'umila'. Xtintz'apej ruwech ri q'ij rik'in sutz' y chuqa' ri ik' man xtisaqirisan ta chik. 8Awoma k'a rat xtinben chi xkechuputej konojel ri ek'o chuwech ri kaj ri yesaqirisan pa ruwi' ri ruwach'ulew. Y keri' kan xtibeq'equmatej ri aruwach'ulew. Yin Jehová ri yibin.
9Toq xtapon atzijol pa taq ruwach'ulew chi xak'is, kan xkebison k'a e k'iy tinamit ri man jun bey xawetamaj kiwech. 10Awoma k'a rat xtipe xibinri'il pa kiwi' ch'aqa' chik tinamit y ri e q'atoy taq tzij kan janila xtikik'en rukiy toq xkatzaq. Rije' xkebaybot roma xibinri'il, roma xtintzinuj ri nu-espada chawij.
11Kere' ninbij yin Jehová: Ri ru-espada ri rey richin ri Babilonia jari' ri xtiqaqa pan awi'. 12Xtinben k'a chi ri janila chi winaqi' xketzaq chi espada pa kiq'a' ri más e itzel taq aj-labal. Y rije' k'o janila kuchuq'a' chikiwech ri ch'aqa' chik ruwach'ulew. Y roma ri' kan xtikiqasaj k'a ri runimirinen ri aruwach'ulew Egipto y xkekik'is ri janila chi awinaq. 13Kan xkenk'is konojel ri awawej ri ek'o chuchi' ri raqen ya' y roma ri' man jun bey chik xtikitz'ilobisaj ri ya' rik'in kaqen; ni ta ri winaqi', ni ta ri chikopi'. 14K'ari' xtinben chike ri ya' chi xtok chik ch'ajch'oj y ri raqen taq ya' xkebiyin eqal-eqal achi'el toq nibiyin ri aceite. Yin Jehová ri yibin. 15K'ari' xtiketamaj ri awinaq aj-Egipto chi ja yin ri' ri in Jehová, toq xtinben chire ri iruwach'ulew chi xtok kan tz'iran y xtuk'uex-el ronojel ri ek'o chiri' y toq konojel winaqi' xkek'is.
16Re jun bix re' richin bis y kan kere' k'a rubixaxik ri xtikibixaj ri ixoqi' richin e k'iy ruwach'ulew. Re jun bix re' richin ri ruwach'ulew Egipto y kichin ri e janila chi winaqi' aj chiri', yin Jehová ri yibin.
Ri winaqi' aj-Egipto xkek'oje' pa ruk'ayewal
17Toq xtz'aqet wolajuj q'ij, ri Jehová xch'on chik wik'in y xubij chuwe: 18Rat Ezequiel, katoq' junan kik'in ri ixoqi' richin ch'aqa' chik ruwach'ulew ri kan k'o kiq'ij. Katoq' pa kiwi' ri janila chi winaqi' ri e richin ri ruwach'ulew Egipto ri xkebe pa jul richin muqbel kik'in ri e kaminaqi' chik el. 19Tak'utuj chike ri aj-Egipto wi kan más e jebel ok rije' chikiwech ri ch'aqa' chik. Tabij chike chi kebiyin kik'in ri e kaminaqi' chik el richin yek'oje' kik'in ri winaqi' ri maneq Dios chikiwech. 20Xa xtibekik'ulu' k'a ki' kik'in ri xekamisex pan oyowal. Ri espada kan banon chik rutzil, richin xkekamisex ri aj-Egipto junan kik'in ch'aqa' chik tzobaj winaqi'. 21Y ri chiri' chikikojol ri kaminaqi' ri xk'oje' kuchuq'a' pa labal toq k'a e k'es na xtikik'ul-ki' chiri'. Xkech'on chikij ri aj-Egipto y xtikibij: Re winaqi' re' ri maneq Dios chikiwech kan xepe yan k'a wawe' qik'in roj ri oj kaminaqi' chik, xkecha'.
22-23Chiri' k'a ek'o-wi ri aj-labal aj-Asiria. Ri ojer kan, kan janila xekixibij ri ch'aqa' chik winaqi', jak'a xa xeken chi espada. Y re wakami ek'o chikikojol ri kaminaqi'.
24-25Chiri' chuqa' ek'o-wi ri aj-labal aj-Elam ri xeken chi espada. Rije' chuqa' xekixibij ri ch'aqa' chik winaqi', jak'a re wakami, konojel k'a re winaqi' re', ri maneq Dios chikiwech, ek'o chikikojol ri xeken yan el. Y re wakami xa man jun ruwaq'ijaj ri xkik'ul, roma xa junan xek'oje' kik'in rije'.
26Chiri' chuqa' ek'o-wi ri aj-labal aj-Mésec y ri aj-Tubal ri xeken pa labal, ri xkiya' kan jun nimalej xibinri'il chikikojol ri winaqi'. Ri achi'a' ri' man xkiya' ta nuq'ij, 27e muqun junan kik'in ri e nima'q taq achi'a' ri k'o kiq'ij ri xek'oje' ojer kan, ri xa xemuq rik'in ri ki-espada chuxe' ri kijolon y ri kitobal xya'ox kan pa kiwi'. Y ri ojer kan xkiya' k'a jun nimalej xibinri'il chike ri winaqi'.
28Kan chiri' k'a xkabek'oje-wi rat rey richin Egipto chikikojol ri man xkiya' ta nuq'ij. Xkak'is k'a y xkamuq kik'in ri xeken pan oyowal.
29Chiri' chuqa' ek'o-wi ri aj-labal aj-Edom, junan kik'in ri e ru-rey y ri e ruq'atoy taq tzij. Stape' xk'oje' janila kuchuq'a', jak'a re wakami xa ek'o chikikojol ri winaqi' ri man xk'oje' ta Dios chikiwech, ri ek'o chiri' pa jul ri akuchi ek'o-wi ri xeken yan el.
30Chiri' ek'o-wi konojel ri e aj-raqen ri xek'oje' pa xaman y konojel ri winaqi' aj-Sidón. Stape' re winaqi' re' xkiya' jun xibinri'il chike ri ch'aqa' chik winaqi', jak'a re wakami xa ek'o chik chikikojol ri xeken pa labal y kan xqasex k'a kiq'ij. Re winaqi' re' man xkiya' ta nuq'ij y re wakami xa e muqun chik.
31Toq ri rey richin Egipto y ri aj-labal xtikitz'et ronojel re', xtikuqer k'a qa kik'u'x, roma ek'o ch'aqa' chik ri nikitej poqon junan kik'in. Yin Jehová ri yibin. 32Stape' rija' y ri aj-labal xkiya' nimalej xibinri'il chikikojol ri winaqi', xkemuq chikikojol ri ch'aqa' chik winaqi' ri man xkiya' ta nuq'ij, ri xeken pa labal, xcha' ri Jehová.
Currently Selected:
Ez 32: KQC
Highlight
Share
Compare
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
