Ez 30
30
Ri rutojbalil pa ruwi' ri ruwach'ulew Egipto
1Ri Jehová xch'on chik wik'in y xubij chuwe: 2Rat Ezequiel, taq'alajirisaj re jun rutzijol re' y tabij chi kere' ninbij yin:
Kan xkixsik'in k'a, toq xtapon ri q'ij ri'.
3Noqaqa yan k'a ri q'ij wichin yin, ri Jehová.
Y ri q'ij ri' kan muqul.
Kan ruk'amon-pe xibinri'il chike ri winaqi' richin ch'aqa' chik ruwach'ulew.
4Kan xtipe k'a labal chikij ri winaqi' aj-Egipto,
kan e k'iy winaqi' xkekamisex,
xtelesex ronojel kibeyomel,
y xtiwulex kan jumul ri ruwach'ulew Egipto.
Chuqa' ri ruwach'ulew Etiopía kan janila xtibaybot roma xibinri'il.
5Chuqa' xkech'akatej k'a kan ri aj-labal ri e richin ri Etiopía, ri Libia, ri Lidia, chijun Arabia, ri Cub y ri e kichin ch'aqa' chik tinamit ri kibanon jun tununri'il kik'in. 6Yin Jehová ninbij chi konojel ri yeto'on richin ri Egipto kan xkek'is pan oyowal, xtitikir k'a pe pa tinamit Migdol y napon k'a pa tinamit Asuán. Y ri runimirinen ri ruchuq'a' ri Egipto kan xtiqasex k'a ruq'ij. Yin Jehová ninya' nutzij chi xtibebanatej. 7Ri ruwach'ulew Egipto ja rija' ri más xtitole' kan chikiwech ri ch'aqa' chik ruwach'ulew y ri e rutinamit kan xkewuluwu' k'a kan. 8K'ari' xtiketamaj k'a chi ja yin Jehová ri ink'o pa ruwi' ronojel toq xtinya-pe q'aq' pa ruwi' ri ruwach'ulew Egipto y kan xkek'is y chuqa' konojel ri tinamit ri yeto'on richin.
9Toq xtapon ri q'ij ri' xkenteq k'a el taqonela' chuchi' ri palou, richin nibekiya' rutzijol chike ri aj-Etiopía; roma rije' xa man jun nikimey. Roma ri' kan xtikik'en janila rukiy. Kan xtapon yan k'a ri q'ij richin xtibebanatej. 10Roma ri' yin Jehová kan xkenjech k'a ri aj-Egipto pa ruq'a' ri rey richin ri ruwach'ulew Babilonia richin xkeruk'is konojel ri aj chiri'. 11Ri aj-labal aj-Babilonia, rije' kan man jun joyowanik kik'in. Y xkek'amer k'a pe richin xtikiwulaj kan ri ruwach'ulew Egipto. Xtikelesaj k'a ri ki-espada pa ruk'ojelibal y ri ruwach'ulew kan xtinoj kik'in kaminaqi'. 12Xtinchaqirisaj k'a ri kokoj raqen taq ya' richin ri Nilo y k'ari' xtinjech k'a ri kulew ri aj-Egipto pa kiq'a' ri e itzel taq winaqi'. Y xtinben chike ri winaqi' ri' richin xtikiwulaj kan ri ruwach'ulew y xtikik'uaj-el ronojel ri k'o chiri'. Yin Jehová ri yibin.
13Kan xkenwulaj ronojel wachibel, xkenwulaj chuqa' ri ki-dios ri tinamit Menfis. Chuqa' chupan ri ruwach'ulew Egipto kan man jun chik wineq ri nino'on ta richin xtiq'aton-tzij pa ruwi' y roma ri' ri winaqi' janila kixibin-ki'. 14Kan xkek'is k'a ri tinamit ri ek'o pa xokon y napon k'a pa xaman. Xtinya' ruq'aq'al ri tinamit Soan y xtinq'et k'a tzij pa ruwi' ri tinamit Tebas. 15Xtinwelesaj k'a ri woyowal chirij ri tinamit Sin ri akuchi ek'o-wi ri aj-labal. Chuqa' e k'iy xkeken chiri' pa tinamit Tebas. 16Xtinya' k'a ruq'aq'al chijun ri ruwach'ulew Egipto. Ri tinamit Sin kan janila ruk'ayewal xtipe pa ruwi', xtikiwulaj k'a ri tz'aq richin ri tinamit Tebas, y ri winaqi' aj-Menfis kan chaq koyoben janipe' napon ri oyowal kik'in. 17Konojel ri aj-labal richin ri tinamit On y ri tinamit Bubastis y ri ch'aqa' chik winaqi' e richin ri tinamit ri' xa xke'uk'uex chik el juk'an ruwach'ulew. 18Ri aj-Egipto janila kinimirisan-ki' roma ri kuchuq'a'. Jak'a yin xtinwelesaj ri uchuq'a' y ri nimirisanen ri k'o kik'in. Ri chiri' pa tinamit Tafnes kan xtibeq'equmatej roma ri sib. Y chuqa' pa ruwi' chijun ri ruwach'ulew Egipto kan xtibemuqumu', rokik ri winaqi' xke'uk'uex-el pa ximonri'il. 19Richin keri' yin kan xtinya' rutojbalil-mak pa kiwi' ri winaqi' aj-Egipto y jari' xtiketamaj chi ja yin Jehová ri ink'o pa ruwi' ronojel.
Ri uchuq'a' ri k'o pan Egipto kan xtelesex
20Toq xtz'aqet yan julajuj juna' chi xojk'amer-pe pa Babilonia, chupan ri ruwuq q'ij chire ri nabey ik', ri Jehová xch'on chik wik'in y xubij chuwe: 21Rat Ezequiel, tawak'axaj re'. Yin xinq'ej jun ruq'a' ri rey richin Egipto, y kan man aq'oman ta juba'. Roma ri' man nitikir ta nuben oyowal rik'in ri ru-espada. 22Wakami yin Jehová ninya' rutzijol chi in yakatajineq chirij rija'. Y roma ri' kan xtinq'ej k'a ri jun chik ruq'a', richin chi xtitzaq-el ri ru-espada pa ruq'a'. 23Yin kan xkenwelesaj-el ri aj-Egipto y xkentaluj-el pa taq ch'aqa' chik ruwach'ulew. 24Jak'a ri rey richin Babilonia xtinya' uchuq'a' rik'in, richin ja rija' xtibeq'aton-tzij pa nuk'exel. Richin keri' xtinya' q'ij chire richin xtuk'is ruchuq'a' ri rey richin Egipto. Y rija' kan janila xtijilon chikiwech ri aj-Babilonia achi'el nuben jun wineq toq niken yan qa roma rukiy ri sokotajik. 25Yin kan xtinya' ruchuq'a' ri rey richin Babilonia, jak'a ri ruq'a' ri rey richin Egipto xketuqutu-qa roma maneq chik kuchuq'a'. Y toq xtinya' ri nu-espada chire ri rey ri', richin xtiyakatej chikij ri aj-Egipto; k'ari' xtiketamaj chi ja yin Jehová ri ink'o pa ruwi' ronojel. 26Kan xkentaluj k'a ri aj-Egipto chikikojol ri ch'aqa' chik tinamit y ruwach'ulew y k'ari' xtiketamaj chi ja yin Jehová.
Currently Selected:
Ez 30: KQC
Highlight
Share
Compare
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
