Ez 24
24
Ri k'ambel-tzij chirij jun bojo'y
1Toq xtz'aqet yan beleje' juna' chi oj uk'uan-el pa Babilonia, chupan ri q'ij lajuj chire ri ik' lajuj, jari' toq ri Jehová xubij chuwe: 2Rat Ezequiel, tatz'ibaj k'a re rajlabal re q'ij re' roma ri rey richin Babilonia xa xuteq rubixik chi tichapatej ri oyowal chiri' pa tinamit Jerusalem. 3Kach'on rik'in k'ambel-tzij kik'in ri awinaq roma e yakatajineq chuwij y tabij chike chi tikiya' pa q'aq' jun bojo'y ri banon rik'in q'eqapueq, ri ruchulun-ri'. K'ari' tikiya' ya' chupan. 4-5Tibekik'ama-pe jun ti jebelej karne'l, tikikamisaj y tikibana' ruchojmil pa peraj. K'ari' ri jebelej taq peraj ti'ij tikiya-qa pa bojo'y. Tikiya-qa ri ra' y ri rij racheq ri chikop y chuqa' tikiya-qa ri jebelej taq baq. K'ari' tikibana' k'iy q'aq' chuxe', richin chi niroqo jebel ri baq rik'in.
6Yin Jehová ri yibin. Toq'ex ruwech ri tinamit Jerusalem roma ek'o janila kamisanela' chiri'. Ri tinamit ri' achi'el xa ta jun bojo'y ri banon rik'in q'eqapueq y ruchulun-ri' ri kan man nel ta chik. Y ri winaqi' xke'elesex-el chupan ri Jerusalem achi'el niban rik'in ri ti'ij toq nelesex-el chupan ri bojo'y y ri bojo'y nik'oje' kan keri'. 7Y ri kamisanela' kan xaxe nikiben ri kamik y kan man nikich'ob ta juba' yekewaj kan, achi'el toq nikamisex jun chikop pa ruwi' jun abej ri kan nibiyin kan rukik'el y man nikamisex ta pan ulew richin nimuq ta kan juba' ri kik'. 8Yin xinya' q'ij richin xk'oje' kan ri kik' pa ruwi' ri abej y man xmuq ta kan. Y re' kan xtik'atzin richin natabel chi xiyek woyowal y richin ninya' rutojbalil pan iwi'.
9Roma ri' kere' k'a ninbij yin: Toq'ex ruwech ri tinamit kamisanel, roma ri' yin xtinya' k'iy si' chuchi' ri tinamit richin nujin q'aq'. 10Kan xtinya' k'a k'iy si' chuxe' ri bojo'y richin keri' kan nichaq'aj jebel ri ti'ij k'a toq xtik'is na ri ruya'al y k'a xkek'at na ri baq. 11Toq man jun chik k'o chupan ri bojo'y kan tik'oje' kan pa ruwi' q'aq', k'a toq ri kaqapueq xtikaqer na pa q'aq'. K'ari' xtich'ajch'ojir kan jebel y xtel-el ri ruchulun-ri'. 12Xa man jun xuq'ajuj xch'ajch'ojirisex ri bojo'y ri', roma ni ta pa q'aq' man xch'ajch'ojir ta.
13Kan nutijon-pe nuq'ij iwik'in rix aj-Jerusalem richin nich'ajch'ojirisaj-iwi' chire ronojel ri imak, jak'a rix man iya'on ta q'ij. Jak'a toq xtiqaqa ri woyowal pa ruwi' ri itinamit, k'ari' xkixch'ajch'ojir. 14Ja yin Jehová ri yibin y kan xtinbenbana' ri xinbij. Kan xapon yan ri q'ij richin ninben. Kan man jun k'a xtinjoyowaj ruwech y man xtintzolij ta wi' chuwij roma ri itzel rubanobal. Yin xtinbenya' ri rutojbalil-mak pa ruwi', yin Jehová ri yibin, xcha'.
Ri rukamibal ri rixjayil ri Ezequiel
15Chirij ri', ri Jehová xch'on chik wik'in chiri' pa Babilonia y xubij chuwe: 16Rat Ezequiel, wakami xtinwelesaj-el ruk'aslen ri awixjayil, ri kan janila nawajo'. Jak'a rat kan man xkatoq' ta chirij, kan man xtibiyin ta ri ruya'al runaq'-awech roma rija'. 17Jak'a pan ewel ninya' q'ij chawe chi yajiq'ijo'x chirij. Man tak'ut chi yabison ni man tawelesaj ri kuchubel-ajolon, ni ri axajab. Chuqa' man tatz'apej apalej, ni man tatej q'utun richin bis, xcha' ri Jehová chuwe.
18Ronojel k'a ri xbix chuwe, yin xintzijoj chike ri nuwinaq ri nimaq'a', jak'a ri tiqaq'ij xken-qa ri wixjayil. Y ri pa ruka'n q'ij chire ri rukamik ri wixjayil, yin xinben k'a ronojel achi'el ri rubin ri Jehová chuwe.
19K'ari' ri nuwinaq xkik'utuj chuwe ri achike nel chi tzij ronojel re' y achike nuk'en-pe chike ri yitajin chubanik. 20Y yin xinbij chike, ri Jehová kere' xubij chuwe: 21Stape' janila nikajo' ri wachoch ri k'o pa Jerusalem y kan janila kikuquban kik'u'x rik'in, yin kan xtinya' jun nimalej ruk'ayewal pa ruwi'. Y ri imi'al y ri ik'ajol ri xe'iya' kan pa Jerusalem xa xkekamisex. 22Y rix xtibebana' achi'el ri xinben yin chire ri Ezequiel: Man xtitz'apej ta ri ipalej retal richin bis, ni man xtitej ta q'utun richin bis. 23Man xtiwelesaj ta ri kuchubel-ijolon, ni ta ri ixajab. Chuqa' man xtijiq' ta oq'ej. Xa kan xkixbek'is roma ri imak y kan junan k'a xkixjilon chi'iwonojel. 24Ri xinben rik'in ri Ezequiel, re' kan xtok k'a jun retal chiwe rix y rix kan xtiben k'a ronojel ri xuben rija'. Y toq ronojel k'a re' xtik'uluwachitej, k'ari' xtiwetamaj chi ja yin Jehová ri ink'o pa ruwi' ronojel, xcha' ri Dios.
25Y ri Dios xubij chuwe chi xtrelesaj-el ri rachoch ri achoq ik'in kikuquban kik'u'x ri nuwinaq y achoq ik'in yekikot-wi. Chuqa' xtrelesaj k'a ri kik'aslen ri kimi'al-kik'ajol. 26Chupan k'a ri q'ij ri' xtipe jun nuwinaq aj-Jerusalem ri animajineq-pe richin xtoruya' rutzijol chuwe. 27Chuqa' xubij chuwe chi yin xkik'atzin chik richin jun retal y man xkitikir ta xkich'on. Jak'a chupan ri q'ij ri' xkitikir xkich'on chik jun bey y xkitikir k'a xkitzijon rik'in ri ya'ol rutzijol. Y rik'in ri' ri nuwinaq ri ek'o wik'in chiri' pa Babilonia xtiketamaj k'a chi ja ri Jehová ri qajaw.
Currently Selected:
Ez 24: KQC
Highlight
Share
Compare
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
