Ez 21

Ri oyowal pa ruwi' ri Jerusalem

1Ri Jehová xch'on chik wik'in y xubij chuwe: 2Rat Ezequiel, katzu'un kela' pa Jerusalem y kach'on chikij ri akuchi nikiya' kiq'ij ri ki-dios y chirij chijun ruwach'ulew. 3Yin kan xkinok k'a etzelanel kichin y xtinwelesaj ri nu-espada chikij y kan xkenkamisaj konojel ri winaqi', ri choj kik'aslen y ri aj-maki'. 4Ja', yin kan xkenkamisaj konojel ri choj kik'aslen y ri man choj ta ri kik'aslen, nitiker-pe pa xaman y napon k'a pa xokon. Y ri nu-espada man nitane' ta chire ri kamik. 5Y chijun k'a ri ruwach'ulew xtiketamaj chi ja yin Jehová ri in yakatajineq chikij rik'in espada y man xtinyek ta qa pa ruk'ojelibal. 6Y rat Ezequiel, kan katoq' k'a rik'in janila bis y q'axo'n. 7Y wi ta xtikik'utuj chawe chi achike roma yatoq', rat xtabij chike chi roma k'o jun ri xtibebanatej. Y toq xtoqaqa xtuben k'a chire chijun ri ruwach'ulew chi ri winaqi' xtikimalij kik'u'x y xtik'is k'a kuchuq'a' y konojel xkebaybot roma xibinri'il. Kan xtapon yan k'a ri ramaj richin xtibebanatej re', xcha'.

8Ri Jehová xch'on chik jun bey wik'in y xubij chuwe: 9Rat Ezequiel, kan taq'alajirisaj k'a ri nuch'abel.

Ri nu-espada kan jebel chik banon rey

y chuqa' jebel chik josq'in.

10Xban yan k'a rey richin nibekusex richin nibekamisan

Kan xjosq'ix yan k'a jebel, y kan achi'el koyopa' ri xtuben.

Y kan ya'on chik richin nikamisan.*f5*

11Xjosq'ix yan k'a jebel richin chi k'o jun nuk'uan.

Ri espada xban yan k'a rey y kan xjosq'ix yan,

richin xya'ox pa ruq'a' ri kamisanel.

12Y rat Ezequiel, kasik'in k'a chi oq'ej rik'in janila bis,

roma re espada re' kan k'o chik pa kiwi' ri awinaq.

Chuqa' richin xkerukamisaj konojel ri e q'atoy taq tzij ri ek'o pa Judá.

Y junan k'a xkeken kik'in ri ch'aqa' chik winaqi'.

Roma ri' takajila' k'a ruwa-ak'u'x roma bis.

13Yin ninbij chi kan nibanatej-wi,

roma ri rey kan nik'uluman chuqa'.

Yin Jehová ri ink'o pa ruwi' ronojel ri yibin.

14Y rat Ezequiel, taq'alajirisaj k'a ri nuch'abel,

k'ari' xtapaq'apa' ri aq'a' retal richin k'o ch'akonik.

Ri espada kan man xtitane' ta qa richin nikamisan,

y kan yerukamisaj konojel winaqi' ri ek'o xabakuchi.

15Roma ri' kan xtimayamo-qa ri kánima;

kan janila k'a e k'iy ri xkeken.

Pa taq ronojel jay xtapon ri kamik,

ja espada re' ri josq'in chik jebel richin nuk'eq koyopa',

y e k'iy k'a ri xkerukamisaj.

16Ri espada ri' kan jebel k'a xtiqupin pa rijkiq'a' y pa rajxokon.

Xabakuchi k'a nibe-wi, kan nikamisan.

17Yin chuqa' kan xtinpaq'apa' k'a nuq'a' roma ri ch'akonik ri',

y xtiqaqa ruwi' ri woyowal.

Yin Jehová ri yibin, xcha'.

Ri rey richin Babilonia y ri ru-espada

18Ri Jehová xch'on chik k'a jun bey wik'in y xubij: 19Rat Ezequiel, taya' k'a ketal ka'i' bey richin keri' ri rey richin ri Babilonia nitikir nucha' jun chike ri ka'i' bey ri' ri akuchi xtapon-wi, roma nipe yan rik'in ri ru-espada. Y akuchi nuch'er kan ri' ri ka'i' bey taya' jun retal akuchi nibe-wi ri jun bey y akuchi nibe-wi ri jun chik. 20Y jun chike re bey re' napon pa tinamit Rabá ri k'o pa ruwach'ulew Amón. Y ri jun chik napon pa Jerusalem chupan ri ruwach'ulew Judá. 21Toq ri rey richin Babilonia xtapon akuchi nuch'er kan ri' ri bey, jari' toq xtuch'ob k'a ri achike bey xtuk'uaj. Xtuk'ulubej k'a ri wachibel, xtrelesaj k'a jun ch'ab pa ruk'ojelibal richin nretamaj ri bey y xtukamisaj jun chikop richin jebel xtunik'oj ri rusase' richin nretamaj akuchi nibe-wi. 22Y toq xtrelesaj ri ch'ab, kan k'o-pe ri retal chirij richin ja ri Jerusalem niberuchapa' chi oyowal. Y toq xtapon chiri', xtubij chi tikichojmirisaj ri che' richin nikitzeq ruchi' ri tinamit. Xkeruteq richin nibekibana' kamik y xtureq k'a ruchi' richin nichap ri labal. Chuqa' xtubij chi tiq'ijux ri ruchi' ri tinamit, tikibana' jun raq'arik bey chirij ri tz'aq richin xke'ok chupan y tikibana-q'anej ri tz'aq ri banon rik'in ulew richin nikewaj-ki'. 23Jak'a ri winaqi' ri ek'o chupan ri tinamit man xtikinimaj ta, roma rije' xjunamatej-kiwech roma kibanon jun jikibel-tzij kik'in ri aj-Babilonia. Jak'a ri rey nunataj chike ri kimak ri kibanon y chirij ri' k'ari' xke'uk'uex-el.

24Roma ri' tabij chike ri awinaq chi yin Jehová kan wetaman ri kiyakatajinenri'il y kan janila k'a niq'alajin chinuwech. Chuqa' niq'alajin chinuwech ronojel ri kimak y roma ri' rije' k'o chi xke'uk'uex-el. 25Chuqa' tabij chire ri rey richin Judá chi rija' jun banoy etzelal y kan man nuya' ta nuq'ij y chi kan ninaqajub yan k'a ri ramaj richin xtuk'ul ri rutojbalil rumak. 26Kan xtelesex k'a chire ri nimalej sacerdote ri kuchubel-rujolon ri retal rusamaj y chuqa' xtelesex k'a el ri ru-corona ri rey. Rije' xtiqasex kiq'ij y ri ch'aqa' chik winaqi' xtinimirisex-q'anej kiq'ij rik'in ri kisamaj. 27Y keri' xtibanatej, k'a toq xtipe na ri qitzij q'atoy-tzij k'a chire rija' xtinjech-wi.

Ri rutojbalil-mak pa kiwi' ri aj-Amón

28Rat Ezequiel, taq'alajirisaj ri nuch'abel yin Jehová pa kiwi' ri aj-Amón ri xetze'en chikij ri awinaq aj-Israel y tabij chike:

Ri espada kan eleneq chik pa ruk'ojelibal richin niberubana' kamik.

Kan jebel chik banon rey richin nikamisan.

Xjosq'ix yan y kan nirepelun chik.

29Rix amonita kan ikuquban ik'u'x kik'in ri yeq'alajirisan chiwech ri man e qitzij ta y nikibananej chi nikil ri xa tz'ukun-tzij. Jak'a ri espada kan naqaj chik k'o-pe chiwij richin yixken, roma xa xapon yan ri q'ij richin ninya' rutojbalil-mak pan iwi'. 30Tiyaka-qa pa ruk'ojelibal ri i-espada, roma yin xtinq'et-tzij pan wi' chiri' ri akuchi xixalex-wi. 31Kan xtinwelesaj k'a woyowal chiwij. Rik'in ri ruq'aq'arinen ri woyowal kan xtitzijtej q'aq' chiwij y xkixinjech k'a pa kiq'a' ri e itzel taq winaqi' ri xkewulan ronojel. 32Kan xkixk'at y ri ikik'el kan xtibiyin chuwech re ruwach'ulew y kan man jun chik xtinatan iwichin. Yin Jehová ri yibin, xcha'.

Currently Selected:

Ez 21: KQC

Highlight

Copy

Compare