Ex 9
9
Ri ruk'ayewal ri xqaqa pa kiwi' ri chikopi'
1K'ari' ri Jehová Dios xubij chik chire ri Moisés: Katapon chik jun bey rik'in ri rey y tabij chire: Ri qa-Dios roj ri oj israelita nubij chi taya' q'ij chiqe richin yojbe, richin chi roj nibeqasamajij. 2Roma wi man naya' ta q'ij richin yojbe y xa kan xaxe yojaq'et-qa, 3ri Jehová kan xtuya' jun nimalej yabil pa kiwi' ri iwawej, ri ek'o pa taq juyu'; pa kiwi' ri kiej, ri kowilej taq kiej, ri camello, ri wákix y pa kiwi' ri karne'l. 4Jak'a ri Jehová kan xtuben rukojolil rik'in ri kawej ri israelita, rik'in ri kawej ri aj-Egipto. Y roma ri' man jun chire ri kawej ri israelita ri xtiken ta, kacha' chire, xcha' ri Jehová. 5Y ri Jehová kan xujikiba' k'a: Chua'q xtibanatej re' chuwech re ruwach'ulew.
6Y ri pa ruka'n q'ij, ri Jehová kan xuben-wi ri xubij: Xeken k'a ronojel ri kawej ri aj-Egipto, jak'a chike ri kawej ri winaqi' israelita man jun ri xken ta. 7Y jari' toq ri rey xeruteq k'a jujun achi'a' chutz'etik wi k'o xbanatej ri chiri' kik'in ri kawej ri israelita y xkitz'et chi xa man jun chire ri kawej ri israelita ri xken ta. Man rik'in ri' ri rey xukowirisaj chik ri ránima y man xuya' ta q'ij richin xel-el ri tinamit Israel.
Toq xpe ch'a'k chikij ri winaqi' y ri chikopi'
8Ri Jehová xubij chire ri Moisés y chire ri Aarón: Tik'uaj-el jujun moq' aq'ab pan iq'a' y toq yixapon chuwech ri rey, rat Moisés kan tak'aqa' k'a ri aq'ab chikaj. 9Y ri aq'ab ri' kan kok'-kok' k'a xtuben y xtutaluj-ri' pa ruwi' chijun ri ruwach'ulew Egipto y re' xtuben chike chi xtipe ruk'aqatil ri kich'akul y xtich'akan. Keri' chikij ri winaqi' y chikij chuqa' ri kawej, xcha'.
10K'ari' ri Moisés y ri Aarón kan xkimoq'ej k'a el ri aq'ab pa taq kiq'a' y xebe rik'in ri rey. Y chiri' ri Moisés xujopij ri aq'ab chikaj y kan xpe k'a ch'a'k chikij ri winaqi' aj-Egipto y chikij ri kawej. 11Y chupan ri q'ij ri' ri aj-itza' kan man xetikir ta chik xe'apon toq xapon ri Moisés, roma rije' xa k'o chik k'a ch'a'k chikij. Ri ch'a'k ri' kan xqaqa k'a chikij ri aj-itza' y chikij konojel ri winaqi' aj-Egipto. 12Y ri Jehová xukowirisaj chik k'a jun bey ri ránima ri rey y roma ri' man xerak'axaj ta ri Moisés y ri Aarón kan achi'el ri bin chik chike.
Ri ruk'ayewal roma ri saqboch
13Ri Jehová xch'on chik k'a jun bey rik'in ri Moisés y xubij: Chua'q kayakatej nimaq'a' yan y kach'on k'a rik'in ri rey y tabij chire chi yin Jehová ri i-Dios rix israelita ninbij: Taya' q'ij chire ri nutinamit richin nel-el richin yirusamajij. 14Roma wi man keri' ta xtaben, wakami yin xtinteq-pe ronojel ruwech nima'q taq ruk'ayewal pan awi' rat, pa kiwi' ri aj-raqen y pa kiwi' konojel ri awinaq, richin chi tawetamaj chi kan man jun chik Dios k'o chuwech re chuwach'ulew, ri achi'el yin. 15Wi ta yin wajowan, xatinkamisaj yan ta rik'in ri nima'q taq ruk'ayewal y xaken yan ta rat y konojel ri awinaq y kan xixk'is yan ta el chi'iwonojel chuwech re ruwach'ulew. 16Jak'a yin kan qitzij ri ninbij chawe chi kan nuya'on-wi ri ak'aslen, richin chi ri nibanatej awik'in, xtuben chi niq'alajin ri wuchuq'a' yin; y keri' kan xtinimirisex k'a ri nubi', chuwech chijun re ruwach'ulew. 17Man rik'in ri' rat kan k'a animirisan na awi' y man naya' ta q'ij chi ri nuwinaq ye'el-el. 18Tatz'eta' na pe, ke taq wa' chua'q, yin xtinteq-pe nimalej taq saqboch pan awi' ri janila ralal, ri kan man jun bey qajineq pa ruwi' ri Egipto jampe' tz'ukutajineq-pe. 19Roma ri' tataqa' kik'amik konojel ri awawej y ronojel ri e awichin rat ri ek'o pa taq juyu', roma xabachike wineq o chikop ri k'a k'o na kan pa juyu', toq xtiqaqa ri saqboch, xa xkeken, xkacha' chire ri rey, xcha' ri Jehová.
20Ek'o k'a jujun chike ri aj-raqen aj-Egipto, ri xkik'en rukiy ri ruch'abel ri Jehová. Roma ri' kan xeparel k'a y xekik'ol ri kawej y ri kisamajela', richin xekik'en-pe pa jay. 21Jak'a ri aj-raqen, ri aj-Egipto, ri man xeniman ta chire ri ruch'abel ri Jehová, xa xekiya' kan ri kawej y ri kisamajela' ri pa taq juyu'. 22Y jari' toq ri Jehová xubij chire ri Moisés: Tatzeqej la ach'ame'y chikaj richin keri' kan xtibeqaqa-pe ri saqboch chikaj pa kiwi' ri winaqi' aj-Egipto, pa kiwi' ri kawej y pa ruwi' ronojel ri kitiko'n, xcha'.
23Ri Moisés kan xutzeqej k'a ri ruch'ame'y chikaj y jari' toq ri Jehová xuben chi xpe koqolajay, koyopa' y saqboch y xuben chi chijun Egipto xqaqa ri saqboch y q'aq' pa ruwi'. 24Ri ruq'aq'al ri koyopa' y ri saqboch xqaqa k'a pa ruwi' chijun Egipto y ri saqboch kan janila k'a kalal. Ri chiri' kan man jun bey k'a qajineq ta saqboch achi'el re', jampe' ek'o-pe winaqi'. 25Ri chiri' pan Egipto, kan ronojel k'a xk'is pa ruq'a' ri saqboch. Xek'is ri winaqi', ri chikopi', ri xek'oje' kan pa taq juyu' y chuqa' xek'is ri tiko'n, ronojel kiwech che' y chuqa' ri q'ayis. 26Y xaxe k'a chupan ri ruwach'ulew Gosen ri akuchi ek'o-wi ri winaqi' israelita, man jun saqboch xqaqa.
27K'ari' ri rey xuteq koyoxik ri Moisés y ri Aarón y xubij chike: Wakami ninna' chi ximakun, roma ri Jehová kan janila choj ri nuben, jak'a yin y ri nuwinaq xa oj itzel taq winaqi' chuwech. 28Kixch'on k'a rik'in ri Jehová pa qawi' roj, roma xa man niqajo' ta chik koqolajay ni saqboch. Yin xa man ninwajo' ta chik yixk'oje-qa wawe', xcha' ri rey chike.
29Y ri Moisés xubij: Kan xaxe k'a xkinel-el chuchi' re nima-tinamit re', xtinyek ri nuq'a' chikaj, y xtink'utuj k'a chire ri Jehová, y kan xtitane' k'a ri koqolajay y ri saqboch, richin keri' nawetamaj chi ja ri Jehová rajaw re ruwach'ulew. 30Y yin kan wetaman k'a chi chawech rat y chikiwech ri aj-raqen maneq rukiy ri Jehová Dios chiwech, xcha' ri Moisés.
31Ri q'ij ri' ri cebada y ri lino xek'is pa ruq'a' ri saqboch y ri cebada xa jebel chik rubanon ri ruwi' y ri lino nisijan chik. 32Jak'a ri trigo y ri jun chik ruwech tiko'n rubini'an centeno, roma xa k'arunaj ye'el-pe, ri saqboch man jun xuben chike.
33Y toq ri Moisés xel-el chupan ri tinamit toq k'a juba' tich'on kan rik'in ri rey, jari' toq xuyek ri ruq'a' chikaj y xch'on rik'in ri Jehová y jari' toq xtane-qa ri koqolajay, ri saqboch y xtane' chuqa' ri job ri najin pa ruwi' ri ruwach'ulew. 34Jak'a toq ri rey xutz'et chi ri job, ri saqboch y ri koqolajay xetane', kan xmakun chik k'a jun bey. Rija' y ri aj-raqen kan xkikowirisaj k'a ri kánima. 35Y keri', ri rey kan xukowirisaj chik k'a ri ránima y man xuya' ta q'ij chi ri e rijatzul kan ri Israel, xebe ta. Kan xbanatej k'a achi'el ri ruq'alajirisan ri Jehová chire ri Moisés.
Currently Selected:
Ex 9: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
