Ex 38
38
1Chuqa' xuben jun porobel richin nisuj kamelabel rik'in che' acacia. Ri raqen ri porobel jun jaj rik'in ka'i' q'a'aj y kan keri' chuqa' ri ruwech, jak'a ri rujotolen nik'aj jaj. 2Ri pa taq rutza'n ri porobel ri' xuben k'a kan jujun kiwachibel uk'a'. Re kiwachibel uk'a' re' y ri porobel kan kich'akulan k'a ki'. Y xuq'olij-kij rik'in ri q'enq'oj-pueq. 3Ronojel ri samajibel ri nik'atzin chire ri porobel, xeruben rik'in q'enq'oj-pueq, achi'el ri k'ulbel-chaj, ri chapbel-q'aq', ri chapbel-ti'ij, ri nima'q taq leq, ri jik'bel-ti'ij y ri akuchi nik'oje-wi ri racheq-q'aq'. 4Chuqa' xuben jun k'arak'ik ch'ich' ri banon rik'in q'enq'oj-pueq y xuya' chupan ri porobel, oxi' k'a q'a'aj xk'oje' kan chukojolil ri ruwi' ri ulew rik'in ri ch'ich' ri'. 5Y chuqa' xuben kaji' argolla rik'in q'enq'oj-pueq ri ya'erisan pa q'aq' y xuya' jujun pa taq ruxikin, ri pa taq rutza'n. 6Chuqa' xuben ri baloj che' rik'in che' acacia y re' xuq'olij rik'in q'enq'oj-pueq. 7Re baloj re' xuju' chupan ri argolla ri ek'o pa taq ruxikin ri porobel. Ri porobel xuben rik'in tz'alem y wokowik rupan.
Ri yakbel-ya' banon rik'in q'enq'oj-pueq
(Ex 30:18)
8Chuqa' xuben ri yakbel-ya' y jun ruch'okolibal, rik'in ri espejo ri banon rik'in ri q'enq'oj-pueq ri kichin ri ixoqi' ri yesamej chiri' chuchi' ri rachoch ri Dios.
Ri ruwa-jay richin ri rachoch ri Dios
(Ex 27:9-10)
9Ri Besalel xuben jun nimalej peraj tzieq, ri nusutij-rij ri rachoch ri Dios. Jari' xukusex pa xokon chire ri ruwa-jay ri'. Xutzeqeba' k'a ri peraj tzieq richin xutz'apej rij. Ri peraj tzieq ri' banon rik'in betz' lino ri jebel batz'in y ri raqen juwineq wuqu' jaj. 10Richin ri', xeruben k'a juwineq xata't rachibilan ri kich'okolibal ri xeruben rik'in q'enq'oj-pueq. Ri xata't ri' xkik'uaj tzeqebel-tzieq y ri k'an banon rik'in saqipueq, ri xebe chikikojol ri xata't. 11Chuqa' ri pa xaman chire ri ruwa-jay xuya' juwineq wuqu' jaj peraj tzieq, chuqa' xuk'uaj juwineq xata't y kich'okolibal. Ri xata't ri' xkik'uaj k'a tzeqebel-tzieq y ri k'an banon rik'in saqipueq, ri yebe chikikojol ri xata't. 12Ri pa qajbel-q'ij chire ri rachoch ri Dios xutzeqeba' jun peraj tzieq, ri k'o oxlajuj jaj rik'in nik'aj raqen. Re' xutz'apej-rij ri ruwa-jay y richin ri' xuben lajuj xata't y lajuj kich'okolibal. Ri retz'aba'l ri xata't y ri tzeqebel-tzieq xeruben rik'in saqipueq. 13Chuqa' richin ri chiri' pa relebel-q'ij chire ri ruwa-jay, ri akuchi nibek'ulun-wi-pe ri q'ij, xuben jun peraj tzieq ri oxlajuj jaj rik'in nik'aj ri raqen. 14Pa jun chike ri ruxikin ri akuchi k'o-wi ri okibel, xutzeqeba' k'a jun peraj tzieq ri kaji' jaj rik'in jun q'a'aj raqen. Ri peraj tzieq ri' nitzeqe' pa kiwi' oxi' xata't, ri e tikil pa kiwi' ri kich'okolibal. 15Y ri pa jun chik ruxikin ri akuchi xk'oje-wi ri okibel, xutzeqeba' k'a jun chik peraj tzieq ri kaji' chuqa' jaj rik'in jun q'a'aj raqen. Ri peraj tzieq ri' nitzeqe' pa kiwi' oxi' xata't, ri e tikil pa kiwi' ri kich'okolibal. 16Ronojel ri peraj tzieq ri' ri nikisutij-rij ri ruwa-jay xeruben rik'in jebelej lino batz'in. 17Ronojel ri ruch'okolibal ri xata't ruyon rik'in q'enq'oj-pueq xeruben-wi. Ri tzeqebel-tzieq y ri taq k'an ri yebe chikikojol ri xata't xeruben rik'in saqipueq, ri ketz'aba'l ri kiwi' ri xata't xuq'olij-kij chi saqipueq. Y keri' ronojel ri taq k'an ri xebe chikikojol ri xata't, xeruben rik'in saqipueq.
18Ri peraj tzieq ri k'o pan okibel chire ri ruwa-jay kan jebel k'a rutz'isik xuben chire y xukusaj betz' raxroj, q'eqq'oj-keq y keq y chuqa' xukusex lino ri jebel batz'in. Y xuben k'a chire chi wo'o' jaj rik'in ka'i' q'a'aj raqen y ri ruwech jun jaj rik'in ka'i' q'a'aj. Kan junan k'a rubanik ri rujotolen rik'in ri tzieq ri xya'ox chirij ri ruwa-jay. 19Xuben k'a kaji' xata't y kaji' kich'okolibal rik'in q'enq'oj-pueq. Ri tzeqebel-tzieq y ri k'an ri beneq chikikojol ri xata't xeruben rik'in saqipueq y ri retz'aba'l ri ek'o k'a pa kiwi-q'anej ri xata't, kan xuq'olij-kij rik'in saqipueq. 20Ronojel ri ch'ich' simej kitza'n ri chapayon ri rachoch ri Dios y ri ruwa-jay ri rusutin-rij, kan ruyon k'a rik'in q'enq'oj-pueq xeruben-wi.
Ri xe'ukusex chire ri rachoch ri Dios
21Ri Moisés xubij k'a chi titz'ibex ri janipe' xuk'is ri samaj richin xban ri jay ri akuchi k'o-wi ri káxa richin ri rujikibel-tzij ri Dios. Ri levita kan keri' xkiben y jak'a ri Itamar ri ruk'ajol ri sacerdote Aarón ri xk'oje' pa kiwi'.
22Ri Besalel, ri ruk'ajol ri Urí, rumam kan ri Hur, ri peteneq chupan ri tzobaj richin Judá, kan xuben k'a ronojel achi'el ri xubij ri Jehová chire ri Moisés. 23Y kan xto'ox k'a roma ri Oholiab, ri ruk'ajol ri Ahisamac, ri peteneq chupan ri tzobaj richin Dan, y re' kan retaman k'a nusamajij ri xabachike ruwech ch'ich', kan retaman k'a nikemon y kan nitikir k'a nutz'is ruwech xabachike ruwech tzieq rik'in betz' raxroj, q'eqq'oj-keq y keq y chuqa' rik'in lino ri jebel batz'in.
24Ronojel ri q'anapueq ri xukusex richin chi xban ri samaj, kan ruyon k'a sipanik kichin ri winaqi' y xuk'uaj k'a juwineq ka'i' quintal y re' xpaj k'a rik'in ri pajbel ri nikusex chupan ri jay richin ri Dios.
25Ronojel ri saqipueq ri xmolotej toq xe'ajlex konojel ri winaqi' xapon oxk'al wolajuj quintal rik'in nik'aj y re' xpaj k'a rik'in ri pajbel ri nikusex chupan ri jay richin ri Dios. 26Konojel k'a ri achi'a' ri xe'ok chupan ri ajlanik ja ri k'o juwineq kijuna' pa jotol, e 603,550 konojel y chikijujunal re achi'a' re' xkiya' ri k'o chi xkiya'. Y re' xetex k'a rik'in ri etabel ri nikusex chupan ri jay richin ri Dios. 27Xrukusaj chuqa' oxk'al wolajuj quintal saqipueq richin xeruben ri kich'okolibal ri xata't ri yek'atzin chire ri jay richin ri Dios y chuqa' ri kich'okolibal ri xata't, ri xtzeqebex ri peraj tzieq chuwech. Xeruben k'a wok'al ch'okolibel richin xata't y xukusaj jubama ox-ox arroba saqipueq chike chikijujunal ri ch'okolibel. 28Y chire ronojel ri saqipueq ri xmolotej, ka'i' arroba ri xukusex richin xeban ri tzeqebel-tzieq, ri ek'o pa kiwi' ri xata't y keri' chuqa' ri k'an ri xebe chikikojol ri xata't. 29Ronojel ri q'enq'oj-pueq ri xkiya' ri winaqi' richin sipanik chire ri Jehová xapon jubama kawineq oxlajuj quintal. 30Y rija' xukusaj k'a re q'enq'oj-pueq re' richin xeruben ri kich'okolibal ri xata't ri xeya' chiri' pan okibel chire ri rachoch ri Dios, ri richin molojri'il; chuqa' ri porobel y ri k'arak'ik ch'ich' ri xbe chupan y ronojel ri samajibel ri yek'atzin chire ri porobel, 31chuqa' ri kich'okolibal ri xata't richin chijun ri ruwa-jay y ri akuchi k'o-wi ri okibel, keri' chuqa' ronojel ri ch'ich' simej kitza'n, ri xukusaj chire ri rachoch ri Dios y ri xukusaj richin ri rij ri ruwa-rachoch ri Dios.
Toq xban ri tzieq kichin ri sacerdote
(Ex 28:1-43)
Currently Selected:
Ex 38: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
