Ex 28
28
Ri kitziaq ri sacerdote
1Chikikojol ri awinaq israelita, xtawoyoj k'a ri animal Aarón e rachibilan ri e ruk'ajol rija', ri Nadab, ri Abihú, ri Eleazar y ri Itamar; richin chi je rije' xke'ok kan nu-sacerdote. 2Xtikiben k'a rutziaq ri animal Aarón, richin chi jari' ri nukusaj toq yirusamajij. Ri tzieq ri' k'o chi nuben chire ri Aarón chi kan k'o ruq'ij y kan ruk'amon richin nukusaj. 3Kach'on k'a kik'in ri achi'a' ri kan ketaman nikiben re tzieq re', ri kan nuya'on na'oj chike richin nikiben re jun ruwech samaj re', richin chi je rije' ri kebanon ri rutziaq ri Aarón, ri xtukusaj chupan ri q'ij toq xtinch'er richin chi nok nu-sacerdote. 4Jare' ri tzieq ri k'o chi nikiben: Ri ti peqes ri nuk'uaj chuwa-ruk'u'x, ri tzieq efod, ri ko'ol raqen rutziaq, ri nim raqen rutziaq ri tz'ison ruwech, jun kuchubel-rujolon retal ri rusamaj y ri ximibel-rupan. Je rije' k'a ri xkebanon re jalajoj kiwech tzieq re', richin ri Aarón, kichin ri e ruk'ajol, richin jari' ri xtikikusaj richin nikiben ri rusamaj jun sacerdote. 5Y ri betz' ri xtikikusaj banon k'a rik'in q'anapueq y lino jebel batz'in raxroj, q'eqq'oj-keq y keq.
6Xtikiben k'a ri efod rik'in q'anapueq y lino ri jebel rubatz'ixik, ri raxroj, ri q'eqq'oj-keq y ri keq yetzu'un. Y re' kan xtiban k'a roma jun achin ri kan jebel retaman ri rusamaj. 7Xtikiben k'a ka'i' ripireq taq tzieq, ri k'o taq kiximibal ri pa taq kitza'n, richin xkebe chuwi-rutele'n ri efod. 8Ri ruximibal ri efod k'o chi nitz'is ruwech rik'in q'anapueq y lino; y xtikikusaj chuqa' ri betz' raxroj, q'eqq'oj-keq y keq.
9Tabij k'a chi tiban ka'i' taq tz'alem abej ónike, richin chi chikiwech ri' xtiban-wi kibi' ri e ruk'ajol ri Israel. 10Waqi' bi'aj nibe chuwech jun abej y waqi' chuwech ri jun chik; nitiker-el rik'in ri nimalaxel k'a rik'in ri ch'i'p. 11Y ri niya'on ri bi'aj chuwech ri abej ri', k'o chi jun achin ri kan jari' ri rusamaj. Y chikijujunal ri ka'i' abej ri' xtibe q'anapueq ri chi kichi'. 12Re ka'i' abej re' xkeya' chuwi-rutele'n ri efod ri banon rik'in lino, richin jun natabel kichin ri winaqi' israelita. Ri Aarón xkeruk'uaj k'a ri chuwi' taq rutele'n, richin chi yin nintz'et y xke'oqaqa chi nuk'u'x. 13Ri q'anapueq ri xtibe chi kichi' ri abej ri', richin chapbel richin. 14Y chuwech ri chapbel ri' xkeya' ka'i' cadena ri e pach'un y e banon rik'in q'anapueq ri jebel ch'ajch'oj.
15Chuqa' xtiban ri ti peqes ri nuk'uaj chuwa-ruk'u'x ri Aarón, richin ri ruq'atbal-tzij ri Jehová. Y ri ti peqes ri' banon rik'in q'anapueq y lino, ri betz' ri xtikusex ja ri raxroj, q'eqq'oj-keq y keq. Y kan xtikitz'is k'a, achi'el rutz'isik ri xban rik'in ri efod. 16Ri retabal jun q'a'aj chi kaji' ruchi' y ka'i' ruwech tzieq ri rupimil. 17Ri chuwech xtiya' k'a jebelej taq abej y kaji' cholaj niben chire. Ri nabey cholaj niya' jun rubí, jun topacio y jun esmeralda; 18ri ruka'n cholaj niya' jun turqueza, jun zafiro y jun jade; 19ri rox cholaj niya' jun jacinto, jun ágata y jun amatista; 20ri rukaj cholaj niya' jun berilo, jun ónike y jun jaspe. Ronojel taq abej re' xke'iya' q'anapueq chapbel kichin ri chi taq kichi'. 21Y xtibe k'a kablajuj taq abej chuwech, jujun koma ri e kablajuj ruk'ajol kan ri Israel. Chikiwech chikijujunal ri taq abej xtiya' jujun bi'aj, ri kichin ri kablajuj tzobaj ri kibanon ri e rijatzul kan ri Israel. Ri kibi' ri xkebe chikiwech ri taq abej achi'el k'a rubanik ri sello.
22Ri ti peqes xke'iben k'a ruximibal rik'in q'anapueq ri jebel ch'ajch'oj y achi'el e balon kibanik xtiben chike. 23Chuqa' xke'iben ka'i' taq argolla y k'ari' xke'iya' ri pa taq rutza'n-q'anej chire ri ti peqes. 24Y k'ari' ri ka'i' ruximibal ri achi'el balon kibanik, xtixim jun kitza'n chikij chikijujunal ri argolla. 25Y ri jun chik kitza'n ri ximibel ri' xkexim chuwi-rutele'n-q'anej ri efod, richin chi ri ti peqes xtitzeqe-qa chuwa-ruk'u'x. 26Chuqa' tibana' chik ka'i' argolla rik'in q'anapueq, y niya' jujun chuxe-ok ri ka'i' rutza'n, ri pa xulan-qa chire ri ti peqes. 27Chuqa' xtiben chik ka'i' argolla rik'in q'anapueq y xke'itz'is chuwech ri efod, chikixe-qa ri taq ruwi-rutele'n, jubama chunaqaj-qa ri akuchi nutun-wi-ri' ri ximibel-rupan ri efod. 28Ri ka'i' argolla ri ek'o pa taq rutza'n, ri pa xulan-qa chire ri ti peqes, xke'ixim rik'in ri ka'i' argolla ri e tz'ison chuwech ri efod pa ruwi' juba' ri ximibel-rupan. Ri ximibel ri xtikusaj jun raxroj betz' ri balon ruwech. Y keri' ri ti peqes nijitz'e' kan jebel y man xtisilon ta.
29Y keri' k'a, toq ri Aarón nok-apo chupan ri wachoch, ri kibi' ri e ruk'ajol kan ri Israel e beneq chikiwech ri taq abej chuwech ri ti peqes, chunaqaj ri ránima. Richin xtok jun natabel chuwe yin richin jantape'. 30Chupan ri ti peqes ri nibe chuwa-ruk'u'x, chupan ri' xtiya-wi-el ri ka'i' taq abej Urim y Tumim,*f13* richin kan chunaqaj ri ránima ri Aarón yek'oje-wi, toq nok-apo chinuwech yin. Y keri' ri ti peqes ri richin ri nuq'atbel-tzij yin, kan jantape' k'a xkebe chunaqaj ri ránima ri Aarón.
31Xtiben chuqa' jun chik rutziaq, ri man kan ta janila nim raqen, ri nibe-qa chuxe' ri efod. Re tzieq re' raxroj nitzu'un niben chire. 32Xtipoch' k'a ri ruqul y xtitz'is jun ti tzieq ti ko'ol ruwech, chuchi' chijun ri rusetelen richin man nijistej ta. 33Y ri chuqul-qa raqen ri tzieq ri', chijun ri ruchi', niben retz'aba'l rik'in kiwachibel granada y ja ri betz' raxroj, q'eqq'oj-keq y keq yetzu'un, ri xtikusaj. Chikikojol re wachibel re', ri k'a ri chuchi-qa xke'itzeqeba' taq campana ri e banon rik'in q'anapueq. 34Nel chi tzij chi nitzeqeba' jun ti campana y k'ari' nibe jun ruwachibel granada, xeri' nitzeqeba' jun chik ti campana y nibe chik jun ruwachibel granada y keri' xtiben chire chijun ri ruchi' ri tzieq. 35Ja tzieq re' ri xtukusaj ri Aarón toq xtok-apo chupan ri janila loq'olej chire ri wachoch, richin chi nuben ri rusamaj. Y keri' kan xtak'axatej k'a ri kich'ich'al ri taq campana, toq nok-apo y toq nel-pe. Jeri' ri yeya'on rutzijol chi k'a k'es na.
36Chuqa' tibana' jun ti tz'ajtz'ik q'anapueq, ri kan jebel ch'ajch'oj. Y chuwech ri' tibana-wi ri tzij ri nubij: RI KAN RICHIN RI JEHOVÁ. 37Xeri' re jun ti tz'ajtz'ik q'anapueq re' xtiya' chuwech jun ti ripirik tzieq, ri ti nim raqen, ri banon rik'in betz' raxroj. K'ari' xtixim-apo chuwech ri kuchubel-rujolon ri Aarón ri retal ri rusamaj. Nik'aj-ruwech k'a xtibe-wi ri ti tz'ajtz'ik q'anapueq ri'. 38Kan jantape' k'a xtik'oje' ri tz'ajtz'ik q'anapueq nik'aj-ruwech ri Aarón, toq xkerusuj kamelabel kichin ri winaqi' chinuwech yin Jehová. Kan jantape' xtuk'uaj ri tz'ajtz'ik q'anapueq ri nik'aj-ruwech, richin chi yin kan utz xkentz'et.
39Xtikem k'a jun nim raqen rutziaq ri Aarón rik'in betz' lino; rik'in chuqa' ri betz' ri' xtiben jun kuchubel-rujolon, retal rusamaj; y xtiben chuqa' jun ximibel-rupan rik'in retz'aba'l ruwech y kan jebejoj ok rutz'isik xtiben chire. 40Xtiben chuqa' ri nim raqen kitziaq ri e ruk'ajol ri Aarón, chuqa' ri ximibel-kipan y ri kuchubel-kijolon; re' kan nuk'ut chi k'o kiq'ij y kan ruk'amon richin nikikusaj.
41K'ari' rat xtawiq k'a ri Aarón y ri e ruk'ajol, y xtaqasaj aceite pa kiwi' y xke'aya' kan chupan ri kisamaj y xke'ach'er richin nikiben nusamaj y kan xke'ok k'a nu-sacerdote. 42Tibana' chuqa' rupan kitziaq richin nutz'apej ri kich'akul, ri nel-el xekipan y napon-qa pa kich'ek y re' kan ja ri lino ri jebel batz'in ruwech ri nikusaj chike. 43Ri Aarón y ri e ruk'ajol kan k'o k'a chi nikikusaj re jun rupan tzieq re' toq xke'ok chupan ri wachoch o toq ye'apon-apo rik'in ri porobel-pom richin yinkisamajij yin. Roma ri' kan tikikusaj-el ri tzieq ri' toq ye'apon pa wachoch, richin keri' man yemakun ta y man yeken ta. Y jare' ri pixa' re ninya' chire ri Aarón y chike ri e rijatzul richin jantape'.
Ri ruchojmilal richin ye'ok kan sacerdote
(Lev 8:1-36)
Currently Selected:
Ex 28: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
