Ex 23
23
Ri pixa' richin q'atoj-tzij
1Kan man jun bey k'a titz'uk-tzij. Man tito' jun wineq ri xa makuwineq y rix kan nibij chi man jun rumak. 2Man jun bey ke'itzeqelibej ri winaqi' roma e k'iy y xa man utz ta ri nikiben. Kan man jun bey k'a tixotoba' rubanik ri chojmilal, xaxe roma e k'iy chike ri winaqi' ri yebin. 3Y chuqa' man roma ta chi jun wineq man jun k'o rik'in, roma ta ri' nixotoba' rubanik ri ruchojmilal, xaxe richin nito-el rija'.
4Wi ta ri bóyix o ri bur ri richin ri etzelanel iwichin, sachineq y rix niwil-pe, tik'ama' k'a pe chire ri rajaw. 5Wi rix nitz'et ta chi ri bur ri richin jun etzelanel iwichin, tzaqineq chuxe' ri rejqa'n, man tiben chi choj yixq'ax-pe rik'in, xa kan tito' kan. 6Man jun bey tiben chi man niben ta jun chojmilej q'atbel-tzij rik'in jun wineq, xaxe roma nitzu' chi man jun ok k'o rik'in.
7Man tiju-iwi' chupan tz'ukuj taq tzij, ni man tiben chi nikamisex jun wineq ri xa man jun rumak o choj ruk'aslen. Roma ri wineq ri nibanon keri' chirij jun chik, xa kan aj-mak-wi.
8Man jun bey tik'ul méro toq ri winaqi' nikajo' yixkipuaqij, roma re' xa xtuben chiwe chi man yixtzu'un ta chik rik'in ruchojmilal y nuxotoba' rubanik ri iq'atbel-tzij ri kan ix choj.
9Man ke'iya' pa bis ri man e iwinaq ta ri ek'o chi'ikojol. Rix iwetaman ri nuna' ri kánima rije' roma ri man e iwinaq ta, roma xa kan xina' yan toq xixk'oje' pan Egipto.
Uxlanen kichin ri winaqi' y ri ulew
10Waqi' k'a juna' xtitik ruwech ri iwulew y k'o xtiwelesaj chuwech. 11Jak'a ri pa ruwuq juna' xtuxlan kan ri iwulew, richin chi ri iwinaq ri man jun ok k'o kik'in, chiri' ni pe wi ri kiway. Y ri k'a nik'oje' na kan jari' ri xtikitej ri juyubel taq chikopi'. Chuqa' keri' xtiben rik'in ri iwulew akuchi nitik-wi ri uva y ri olivo.
12Waqi' k'a q'ij yixsamej y chupan ri ruwuq q'ij kan xkixuxlan k'a, richin chi ye'uxlan chuqa' ri ibóyix y ri ibur. Y chuqa' richin ye'uxlan ri kalk'ual ri isamajela', ri e alaxineq pan iwachoch y ri man e iwinaq ta. 13Kan titaqej k'a ronojel re xinbij chiwe yin. Kan man jun bey k'a tik'utuj to'onik chike ch'aqa' chik dios, ni man tinataj ri kibi'.
Ri oxi' nimalej taq nimaq'ij
(Ex 34:18-26; Deut 16:1-17)
14Oxi' k'a mul pa jun juna' yininimaq'ijuj richin niya' nuq'ij. 15Xtinimaq'ijuj k'a ri q'ij richin ri kaxlan-wey ri maneq ch'amilej-q'or rik'in y wuqu' k'a q'ij xtitej re jun ruwech kaxlan-wey re', achi'el ri nubin chiwe. Xtiben k'a re nimaq'ij re' chupan ri ik' Abib, roma chupan ri ik' ri' toq xixel-pe pan Egipto. Y kan man jun k'a chiwe rix ri xtipe chinuwech yin y man jun sipanik ruk'amon-pe chuwe. 16Chuqa' xtiben ri nimaq'ij richin ri nabey ruwech ri itiko'n, ri niwelesaj chuwech ri iwulew. Y pa ruk'isibel, toq nik'is ri juna', xtiben chuqa' ri jun nimaq'ij richin toq nik'ol ronojel ruwech ri itiko'n ri xiben.
17Kan konojel k'a achi'a' nik'atzin chi ye'oqaqa chupan re oxi' nimaq'ij re', chupan jun juna', richin ye'oqaqa chinuwech yin Jehová ri iwajaw.
18Toq nisuj k'a ri kik' richin jun kamelabel, man tisuj junan rik'in ri kaxlan-wey ri ruk'uan ch'amilej-q'or. Chuqa' ri ruq'anal ri chikop ri richin ri kamelabel, man tiyek kan k'a richin ri ruka'n q'ij.
19Xtik'en k'a pe chupan ri wachoch yin, ri Jehová ri i-Dios, ri nabey jebelej taq ruwech ri itiko'n.
Y ri rutijul jun ti alaj tzuntzun, man jun bey tiroqowisaj chupan ri tz'umaj ri richin ri rute'.*f9*
Ri ángel ri xyuqen kichin ri israelita
20Yin kan xtinteq k'a el jun ángel chiwech rix, richin chi yixruchajij chupan chijun ri ibey y ja rija' ri xtuk'uan ri ibey k'a toq xkixapon na chupan ri ruwach'ulew ri nunaban chiwe. 21Rix, kan tichajij k'a iwi' rik'in ri ibanobal chuwech rija' y tiwak'axaj ri rutzij. Man kixyakatej chirij, roma rija' maneq kuyubel-mak chuwech, roma kan pan nubi' yin beneq-wi. 22Y wi rix kan ninimaj ri rutzij rija' y niben ronojel ri nubin chire rija' chi k'o chi niben rix, wi keri' yin kan xtinpaba-wi' chikiwech ri ye'etzelan iwichin y xtinya' tijoj-poqonal pa kiwi' ri yebanon chiwe richin nitej poqon. 23Roma ri' ri nu-ángel xtinabeyej-el chiwech y xkixruk'uaj chupan ri kiruwach'ulew ri amorreo, ri heteo, ri ferezeo, ri cananeo, ri heveo y ri jebuseo; konojel re winaqi' re' xkenk'is yin. 24Man k'a kixxuke' chikiwech ri ki-dios, ni man ke'isamajij, ni man titzeqelibej chuqa' achi'el ri nikiben ri winaqi' ri'. Xa kan ke'iq'umla' k'a el konojel ri wachibel ri e kibanon y ke'iwulaj jumul. 25Kan ja yin Jehová ri i-Dios ri kinisamajij. Y yin kan xkixinwurtisaj k'a rik'in ri iway y ri iya'. Y chuqa' kan xtinwelesaj k'a ronojel yabilal chi'ikojol rix. 26Kan man jun k'a ixoq xtibanon tzaqonik chi'ikojol, ni man jun ri man ta nik'oje' ral y xtinben chi kan k'iy juna' xkixk'ase' chuwech re ruwach'ulew.
27Yin kan xtinben richin xtikixibij-ki' chiwech, y xtinya' ri nimalej nuxibinri'il pa kiwi' konojel ri tinamit ri akuchi xkixq'ax-wi y xa xtusech kik'u'x y xke'animej k'a el chiwech ri e etzelanel iwichin. 28Y yin kan xtinteq k'a pe jun nimalej xibinri'il chikij richin xke'animej k'a el chiwech ri winaqi' heveo, ri heteo y ri cananeo. 29Jak'a xa chi jutaqba' xkek'is ri winaqi' ri' richin chi man nitole' ta kan ri ruwach'ulew jumul y keri' man xkek'iyer ta k'a pe ri k'uxunela' taq chikopi' chiwij. 30Chi jutaqba' k'a xkenwelesaj-el rije' chiwech rix, k'a toq xtik'iyer na ri iwijatzul y kan xtok iwichin ri ruwach'ulew. 31Yin kan ninya' yan k'a chiwe ri k'ulba't richin re ruwach'ulew re ninya' chiwe. Nuchop-el rik'in re Kaqa-Palou, nijote-el ronojel ri ruchi' ri palou, nitzale' k'a akuchi k'o-wi ri raqen-ya' Éufrates y k'ari' nitzale' pa rajxokon chupan ri tz'iran ruwach'ulew y nik'ulun k'a akuchi k'o-wi ri Kaqa-Palou. Konojel k'a winaqi' richin re ruwach'ulew re' xkenjech pan iq'a' y rix xke'iwelesaj k'a el chupan ri kiruwach'ulew.
32Man tiben chi nijunamatej-iwech kik'in ri winaqi', rik'in jikibel-tzij y man tik'en kiwech ri ki-dios. 33Kan man k'a tiya' q'ij chike re winaqi' re' chi yek'ase' chi'ikojol, roma rije' xa xtikiben chiwe chi yixmakun chinuwech. Y wi rix kan xke'isamajij ri ki-dios, jari' ri xtibanon chiwe chi xkixtzaq, xcha'.
Currently Selected:
Ex 23: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
