Ex 19
19
Toq ri israelita xe'apon pa Sinaí
1-2Chirij re', ri israelita xe'el-pe pa Refidim; y chupan k'a ri q'ij toq xtz'aqet oxi' ik' chi ke'el-pe pan Egipto, chupan ri q'ij ri', jari' toq xe'apon pa ruwa-taq'aj ri k'o chunaqaj ri juyu' Sinaí. Y chiri' xek'oje-wi-qa chuwech-pe ri juyu'. 3Y ri Moisés xjote' k'a el pa ruwi' ri juyu'. Y ri chiri' pa ruwi' ri juyu', ri Dios xch'on-pe rik'in y xubij-pe chire: Kere' k'a tabij chike konojel ri e rijatzul ri Jacob, taya' rutzijol chike ri winaqi' israelita y tabij: 4Rix kan xitz'et k'a jebel ri xinben yin kik'in ri aj-Egipto, ri xinben richin xixink'en-pe wawe' wik'in yin, achi'el xa ta xixpe pa ruwi' ruxik' jun kot. 5Wakami k'a, wi kan xtinimaj k'a ri nuch'abel y nitaqej ri jikibel-tzij ri nubanon iwik'in, rix kan xkixok k'a jun tinamit ri janila iwejqalen chikiwech ri ch'aqa' chik tinamit. Man rik'in ri' chijun re ruwach'ulew kan wichin yin. 6Chuqa' kan xkixok jun ajawaren kichin sacerdote richin yinisamajij y rix kan xkixok xaxe wichin yin, xkacha' chike, xcha' ri Jehová chire ri Moisés.
7Y ri Moisés xqaqa k'a pe y xuteq koyoxik ri rijita'q taq achi'a' ri k'o kiq'ij y xuq'alajirisaj k'a chikiwech ronojel ri xubij-pe ri Jehová chi k'o chi nubij chike. 8Y konojel k'a ri winaqi' kan junan k'a xech'on y xkibij: Roj kan xtiqaben k'a ronojel ri rubin-pe ri Jehová, xecha'. Y ri Moisés xuk'uaj k'a chire ri Jehová ri ch'abel ri xkibij ri winaqi'.
9Y ri Jehová xubij chik k'a chire ri Moisés: Yin kan xkipe k'a pa jun pimilej-sutz' richin yich'on awik'in y ri awinaq kan xtikak'axaj k'a y kan xtikikuquba' kik'u'x awik'in richin jantape'. Y jari' toq ri Moisés xutzijoj-el chire ri Dios ri ch'abel ri xkibij ri winaqi'. 10Y k'ari' ri Jehová xubij chik k'a chire ri Moisés: Kabiyin kik'in ri awinaq y tabana' k'a chike chi kan tikijacha-ki' chuwe yin chupan re q'ij re' y ri q'ij chua'q. Chuqa' kan tikich'aja' ri kitziaq. 11Roma chupan-apo ri rox q'ij, konojel ta winaqi' kichojmirisan ta chik ki', roma jari' toq ri Jehová xtiqaqa-pe pa ruwi' re juyu' re' y konojel ri awinaq kan kitzuliben k'a toq xtiqaqa-pe. 12Rat taya' k'a retal k'a akuchi utz chi yejel-apo ri winaqi' y man keq'ax-apo chire ri retal ri' y tabij chike: Tichajij-iwi' chi man yixjote-q'anej pa ruwi' ri juyu', ni man tineq chuqa'. Roma ri wineq ri xa man niniman ta tzij, xa xtiken y man jun ri xtitikir xtikolon richin. 13Kan man jun k'a xtijelun ruq'a' chirij ri juyu', roma ri xtibanon keri' xtikamisex chi abej o chi ch'ab; ri' wi wineq o chikop: Y k'a toq xtiq'ajan na k'a pe ri xupubel banon rik'in uk'a', k'ari' utz richin xkejote-pe, xcha' ri Dios, chire ri Moisés.
14K'ari' ri Moisés xqaqa k'a pe pa ruwi' ri juyu' y kan xuben chike ri winaqi' chi tikijacha-ki' chire ri Dios y tikich'aja' ri kitziaq. 15K'ari' rija' xubij chike: Kan tichojmirisala' k'a apo iwi' richin ri pa rox apo q'ij. Man kixk'oje' kik'in ri iwixjayilal, xcha'.
16Y xk'uluwachitej k'a chi toq xapon ri rox q'ij nimaq'a' yan, xpe k'a koqolajay y koyopa' y xqaqa k'a jun pimilej-sutz' pa ruwi' ri juyu'. Y xebeq'ajan k'a pe rik'in janila uchuq'a' ri xupubel ri e banon rik'in uk'a'. Y ri winaqi' ri ek'o pa taq kachoch ri banon rik'in tzieq kan janila k'a xkik'en rukiy. 17Y ri Moisés xeberoyoj k'a pe konojel ri ruwinaq ri ek'o chiri', ri akuchi ek'o-wi-qa, richin chi nibekik'ulu' ri Dios. Y rije' xebepa'e-apo chuxe' ri juyu'.
18Kan chijun k'a ri juyu' Sinaí nibuqun pa sib, roma ri Jehová xqaqa-pe pa ruwi' ri juyu' ri' rik'in q'aq'. Y ri sib ri' kan achi'el k'a ri rusibil jun horno nuben, y chijun ri juyu' nisilon janila. 19Ri xupubel, ronojel mul kan más k'a niq'ajan-pe. Ri Moisés nich'on k'a rik'in ri Dios y ri Dios kan nuk'uluba' k'a ri ruch'abel, rik'in achi'el ruch'abel koqolajay.
20Ri Jehová xqaqa k'a pe pa rutum ri juyu' Sinaí, y k'a chiri' xroyoj-wi-pe ri Moisés, y ri Moisés xjote-q'anej k'a rik'in. 21Y xubij chire ri Moisés: Kaqaqa-el y tabebij chike ri winaqi' chi man keq'ax-pe ri akuchi k'o-wi ri retal ri ruchi' ri juyu', richin chi nikajo' yinkitz'et yin. Roma wi xa man xtikinimaj ta tzij, kan xkeken k'a janila chi winaqi'. 22Chuqa' ri sacerdote kan tikijacha-ki' pa nusamaj yin y wi man xtikiben ta, kan xkenk'is k'a, xcha' ri Jehová.
23Ri Moisés xubij chik k'a chire ri Jehová: Ri winaqi' kan man xketikir ta k'a xkejote-pe pa ruwi' re juyu' re', roma kan atk'o rat wawe' y chuqa' xabij chi tinya' k'ulba't richin man yeq'ax ta pe, xcha' ri Moisés.
24Y ri Jehová xubij: Kaqaqa-el y tabek'ama-qa ri Aarón y k'ari' junan yixjote-pe, jak'a ri e sacerdote y ri winaqi' man k'a keq'ax-pe ri akuchi k'o-wi ri k'ulba't richin chi yepe wik'in yin, richin chi man kenk'is, xcha' ri Dios. 25Y ri Moisés xqaqa k'a pe akuchi ek'o-wi kan ri winaqi' y xuq'alajirisaj chikiwech ronojel re'.
Toq ri israelita xe'apon pa Sinaí
(Deut 5:1-21)
Currently Selected:
Ex 19: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
