Ex 15

Ri israelita yebixan roma kikoten

1K'ari' ri Moisés y konojel ri ruwinaq xkibixaj ri rubi' ri Jehová y kere' k'a nubij ri bix ri xkibixaj:

Xtiqabixaj k'a rubi' ri Jehová,

roma rija' kan xq'alajin chi k'o ruq'ij-ruk'ojlen.

Xuben chike ri kiej y ri e ch'okolibeyon kichin

chi xemuqutej kan chupan ri palou.

2Rat k'a Jehová ri quchuq'a' y ri qabix.

Ja rat ri qakolonel.

Rat ri qa-Dios ri k'o chi niqaya' aq'ij.

Ri at ki-Dios ri qate-qatata' y roj niqanimirisaj ri abi'.

3Rat Jehová at nimalej aj-labal;

Ja rat ri Jehová abi'.

4Rat xaben chi ri carruaje y ri aj-labal xebe chuxe' ya',

rat xaben chi ri aj-raqen xejiq' chupan ri Kaqa-Palou.

5Ri palou ri' xerumuq k'a;

xebek'oje' kan chuxe', achi'el ri abej.

6Ri awijkiq'a' rat Jehová Dios, nim rik'in uchuq'a';

ri awijkiq'a' rat Jehová Dios, xeruwulaj ri e etzelanel awichin.

7Rik'in ri awuchuq'a', rat nimalej Jehová Dios,

xe'aqasaj ri xkipaba-ki' chawech.

Rat xateq k'a pe ri aq'aq'arinen pa kiwi',

y rik'in ri' xe'ak'is achi'el nuben ri q'aq' rik'in ri q'ayis.

8Xa rik'in ok ri kaq'iq' ri nel pan atza'n, xumol-ri' ri ya'.

Ri ya' ri janila nisilon, xuben achi'el tz'aq ri pa taq ruxikin

ri ruxe-qa ri ya' kan chi'anin k'a xkowir.

9Ri e etzelanel qichin, xkich'ob: Qojyakatej-el y kebeqaq'i', xecha'.

Xkich'ob chi xtikich'er chikiwech ri xtikimej chiqe;

xkich'ob chi nikelesaj koyowal chiqij.

Xkich'ob nikelesaj ri ki-espada y yojkik'is.

10Jak'a rat Jehová Dios xateq-pe ri nimalej kaq'iq';

y ri palou xerumuq kan rije'.

Y choj xebe chuxe' ya' achi'el nuben ri chajipueq;

choj xebe chuxe' ri ya', ri kan xbusku'l-qa chikij.

11¿Achike ta k'a jun chik dios ri k'o, achi'el rat Jehová?

¿Achike ta k'a jun chik, ri kan nimalej Dios y kan Loq'olej?

Ri yatikir naben rat, kan meyel y xaxe rat ri yabanon richin.

12Rat kan xaxe k'a xayuq ri awijkiq'a';

ri ruwach'ulew kan jari' xjaqatej y xerubeq' ri winaqi'.

13Rat xayuqej rik'in joyowanik ri atinamit ri xakol;

kan rik'in k'a ri awuchuq'a' xak'uaj k'a akuchi atk'o-wi rat.

14Re' kan xtikak'axaj k'a ri winaqi' y kan xkebaybot.

Kan man xtikil ta k'a achike xtikiben ri winaqi' aj-Filistea.

15Ri e aj-raqen ri chiri' pan Edom xkelawalo' roma xibinri'il,

ri man jun bey nikixibij-ki' chiri' pa Moab, k'ari' xtikixibij-ki'.

Y ri aj pa Canaán kan xtikik'en rukiy.

16Xtiqaqa nimalej xibinri'il pa kiwi', roma ri ruchuq'a' ri aq'a',

Roma ri' xkememur, achi'el jun abej, ri man jun nitikir nubij.

k'a toq q'axineq chik na ri atinamit rat Jehová.

K'a toq q'axineq chik na re tinamit re xakol-pe.

17Rat xke'ak'uaj y xke'atik pa ruwi' ri juyu', ri xtaya' chike.

Ri chiri', ri akuchi atk'o-wi rat Jehová Dios.

Ri akuchi abanon rat Jehová, chi chiri' nak'ul-wi aq'ij.

18Xaxe rat Jehová ri atk'o pa ruwi' ronojel,

keri' re wakami y richin tibe-q'ij tibe-seq.

Ri rubix ri María

19Jari' toq ri rey aj-Egipto, ri ruwinaq, ri rukiej y ri ru-carruaje xe'ok chupan ri Kaqa-Palou. Y ri Jehová kan xerumuq kan chupan ri ya' ri' y jak'a ri israelita xeq'ax pa chaqi'j pa runik'ajal ri ya'. 20Y jak'a ri María, ri q'alajirisey ruch'abel ri Dios, ri rana' ri Aarón, xuchop jun q'ojom rubini'an pandero, richin xubixaj rubi' ri Dios. Y konojel k'a ri ixoqi' xkitzeqelibej-el y rije' kik'ualon chuqa' ki-pandero y yetzopiyaj ri yebixan. 21Y ri María kere' k'a ri xubixaj:

Qojbixan chire ri Jehová qonojel,

roma jun jebelej ch'akoj ri xuben.

Rija' xuben chike ri kiej y ri e ch'okolibeyon kichin,

chi xemuqutej kan chupan ri ya'.

Toq ri israelita xe'apon akuchi k'o-wi ri k'ey ya'

22Chirij re' ri Moisés xuben k'a chi xkichop chik el bey, y xe'el-el chuchi' ri Kaqa-Palou y xebe chupan ri bey ri nibe pa tz'iran ruwach'ulew rubini'an Sur. Xebiyin k'a oxi' q'ij chupan ri tz'iran ruwach'ulew ri' y chiri' kan man jun ya' nilitej. 23Y toq xe'apon k'a akuchi k'o-wi ya', kan man xetikir ta xkiqum, roma ri ya' ri' xa k'ey-k'ey; roma ri' xkibij Mará*f5* chire ri chiri'.

24Y ri winaqi' xkichop yexebexot chirij ri Moisés y nikibila' k'a: ¿Achike k'a xtiqaqum wakami?, yecha'. 25Y jari' toq ri Moisés xuk'utuj to'onik chire ri Jehová y ri Jehová xuk'ut k'a jun che' chuwech, richin chi jari' tuya' chupan ri ya'. Y ri ya' kan chi'anin k'a xutzir.

Ri Jehová kan xerutejtobej k'a y chuqa' xuya' jujun chik ruchojmilal chike. 26Y xubij: Wi kan qitzij xtiwak'axaj ri nuch'abel yin Jehová ri i-Dios, y kan xkixbiyin choj chinuwech, y kan xtiben ronojel ri nubij ri pixa' y kan xtiyek pan iwánima, kan man jun k'a yabil xtinteq-pe pan iwi' achi'el ri xinteq pa kiwi' ri aj-Egipto, roma ja yin Jehová ri in aq'omanel iwichin, xcha' ri Jehová.

27Y xe'el k'a el ri chiri' y xe'apon akuchi e tikil-wi oxk'al lajuj palma, y roma ri' rubini'an Elim. Y chiri' ek'o chuqa' kablajuj ralaxbel-ya' y chiri' chikinaqaj ri ya' xek'oje-wi-qa.

Currently Selected:

Ex 15: KQC

Highlight

Copy

Compare