Ex 13
13
Ri nabey taq alk'ualaxela' kan e richin ri Jehová
1Ri Jehová xubij chire ri Moisés: 2Kan ke'ich'ara' k'a chuwe yin konojel ri e nabey taq al alaboni' ri ye'alex chikikojol ri awinaq y kan keri' chuqa' ri nabey taq achija' ri ye'alex chikikojol ri awej, roma re' kan e wichin yin, xcha' ri Jehová.
Ri nimaq'ij richin kaxlan-wey ri maneq ch'amilej-q'or rik'in
3-4Y ri Moisés xubij chike ri winaqi': Toqaqa k'a chiqak'u'x re jun q'ij re', chupan ri ik' Abib toq ri Jehová rik'in ri nimalej ruchuq'a' xojrelesaj-pe pa tijoj-poqonal. Roma ri' kan man jun k'a chiqe roj xtutej ta kaxlan-wey ri k'o ch'amilej-q'or rik'in. 5Kan ja k'a q'ij ri' y ja ik' ri' xqojnimaq'ijun toq ri Jehová xqojrukusaj chupan ri ruwach'ulew ri rusujun chike ri qati't-qamama', richin nuya' chiqe roj, ri kiruwach'ulew ri winaqi' cananeo, ri hitita, ri amorreo, ri heveo y ri jebuseo, ruwach'ulew ri akuchi niwachin ronojel ruwech tiko'n. 6Wuqu' k'a q'ij xtiqatej kaxlan-wey ri maneq ch'amilej-q'or rik'in y chupan k'a ri ruwuq q'ij xtiqaben k'a jun nimalej nimaq'ij chire ri Jehová. 7Chi wuqu' q'ij k'a xtiqatej ri kaxlan-wey ri maneq ch'amilej-q'or rik'in, y kan man k'a tik'oje-pe naqaj ri ch'amilej-q'or; y keri' xtibeqabana' chupan ri ruwach'ulew akuchi xqojapon-wi. 8Y chupan k'a ri q'ij ri' jari' toq xtiqabij chike ri qalk'ual: Re nimaq'ij re' richin niqanataj ri xuben ri Jehová qik'in, toq xojrelesaj-pe pan Egipto, xqojcha'. 9Y re' kan man xtiqamestaj ta k'a y kan xtuben chiqe chi kan achi'el jun etal chirij ri qaq'a' y ri nik'aj-qawech, richin keri' ri rupixa' ri Jehová kan jantape' xtoqaqa chiqak'u'x, roma ri Jehová rik'in ri nimalej ruchuq'a' xojrelesaj-pe pan Egipto. 10Jare' k'a ri nubij ri Jehová chi k'o chi niqaben, k'atzinel xtiqanimaq'ijuj re jun q'ij re', ronojel juna'.
11Y toq ri Jehová xqojrukusaj-apo chupan ri ruwach'ulew kichin ri cananeo, ri ruwach'ulew ri kan rujikiban chik chike ri qate-qatata', y chuqa' chiqe roj, chi kan xtuya-wi chiqe, 12jari' toq xkeqaya' chire ri Jehová ri e nabey taq qak'ajol y chuqa' ri e nabey taq kal ri qawej, ri e achija'. 13Jak'a ri nabey kal ri taq bur k'o chi niqakol y niqaya' jun alaj achij karne'l chuwech y wi man xtiqakol ta, kan xtiq'upix k'a ri ruqul. Y chuqa' keri' xtiqaben kik'in ri nabey taq qak'ajol, kan k'o chi yeqakol.
14Y toq ri chua'q-kabij xtikik'utuj chiqe ri qalk'ual chi achike roma kere' niqaben, roj xtiqabij k'a chike: Roj janila k'a k'iy juna' ri xojyuqe' pa samaj ri pan Egipto y k'a ja na ri Jehová ri xkolon-pe qichin, rik'in ri nimalej ruchuq'a' rija'. 15Y toq ri rey aj-Egipto kan xukowirisaj ri ránima richin chi man xuya' ta q'ij chiqe richin chi xojel-pe, ri Jehová kan xuben chi xeken konojel ri e nabey taq k'ajola' y ri e nabey taq achija' kal ri kawej. Y roma ri' roj niqaben k'a re sipanik re', richin chi niqaya' chire ri Jehová ri nabey taq kal ri qawej. Chuqa' niqaya' jujun taq alaji' achija' karne'l chikiwech ri nabey taq al alaboni', richin yeqakol, keri' xtiqabij chike. 16Y re' kan man xtiqamestaj ta k'a, y kan xtuben chiqe chi kan achi'el jun etal chirij ri qaq'a' y ri nik'aj-qawech, roma ri Jehová rik'in ri nimalej ruchuq'a' xojrelesaj-pe pan Egipto, xcha'.
Ri israelita kan k'o k'a uk'uayon kibey
17Toq ri rey xuya' q'ij richin xe'el-el ri israelita, ri Dios man xeruk'uaj ta chupan ri bey ri akuchi k'o-wi ri kiruwach'ulew ri aj-Filistea, stape' jari' ri bey ri más naqaj, roma xubij ri Dios chi rik'in juba' nikitzolij-ki' chikij toq xtikitz'et ri labal y xa xtikajo' xketzolin kan pan Egipto. 18Roma ri' rija' xuben chike richin xkichop-el ri bey ri nusutij rij ri tz'iran ruwach'ulew, ri napon ri pa Kaqa-Palou. Y rije' kan xebe k'a y konojel kik'ualon k'a kikamisabal. 19Y ri rubaqil ri José, kan xuk'uex-wi-el, roma keri' xubij ri Moisés. Roma ri José, ri ojer kan, xuben k'a chike ri ruwinaq chi xkiya' kitzij chuwech, chi xtikik'uaj-el ri rubaqil. Roma chuwech rija' kan qitzij chik chi ri Dios xkerukol-el.
20Xe'el k'a el pa tinamit Sucot, y xe'apon pa tinamit Etam, y chiri' xek'oje-wi-qa ri q'ij ri' akuchi nitiker-wi-el ri tz'iran ruwach'ulew. 21Y ri Jehová beneq k'a chikiwech rije': Ri paq'ij beneq pa jun sutz' pa'el chikaj richin nuk'ut ri bey chikiwech, y ri chi'aq'a', ri sutz' ri' nok ruxaq-q'aq' richin nusaqirisaj ri kibey, richin chi yebiyin chi paq'ij chi chaq'a'. 22Y ri achi'el sutz' rubanik ri paq'ij y ri achi'el rubanik ruxaq-q'aq' ri chi'aq'a', kan jantape' k'a nabey-el chikiwech.
Currently Selected:
Ex 13: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
