Ester 7
7
Ri Amán nitzeqebex
1Keri' ri rey y ri Amán xebe k'a pa nima-wa'in rik'in ri reina Ester. 2Y chupan ri ruka'n nima-wa'in ri', rokik nikiqum vino, ri rey xubij chire ri Ester: Tak'utuj k'a chuwe ri rurayibel ri awánima, y yin kan xtinya' chawe. Kan xtinya' k'a chawe stape' nak'utuj nik'aj chire ri wajawaren, xcha'.
3K'ari' ri reina Ester xubij: Wi yin xinwil utzil awik'in, y wi rat niqa' chawech, tabana' utzil takolo' ri nuk'aslen yin y konojel ri nuwinaq, 4roma yin y ri nuwinaq xa kan oj k'ayin chik richin yojbeken y xqojk'is jumul. Wi ta xojk'ayix richin yojyuqe' pa samaj chi achi'a' chi ixoqi', man ta yich'on; jak'a re wakami, xa xqojbek'is, y re' kan man ruk'amon ta k'a chi keri' nibanatej, roma xa xtuben chi xtiwuluwu' ri awajawaren rat, xcha'.
5K'ari' ri rey Asuero xubij chire ri reina: ¿Achike k'a ri' y akuchi k'o-wi ri xch'obon-q'anej re jun itzel na'oj re'?, xcha'.
6Y ri Ester xubij: Ri etzelanel qichin ja re itzelej Amán, xcha'. Jari' toq ri Amán kan xpe jun nimalej xibinri'il chire chikiwech ri rey y ri reina. 7K'ari' ri rey xyakatej-el chire ri nima-wa'in roma kan xyakatej janila royowal, y xbe akuchi e tikil-wi kotz'i'j chiri' chuwa-jay. Jak'a ri Amán xkanej kan richin nuk'utuj utzil chire ri reina, chi man nikamisex ta, roma retaman chik chi, ja ri kamik ri royoben.
8Y toq ri rey xok chik apo chiri' akuchi najin-wi ri nima-wa'in, xutz'et chi ri Amán lukul-apo pa ruwi' ri tz'uyubel nim raqen y buyul ri akuchi nuxulan-wi ri reina Ester. Jari' toq xubij ri rey: ¿Nawajo' chuqa' yak'oje-qa rik'in ri reina re wawe' pa wachoch?, xcha'. Y toq ri rey xtane-qa chubixik re ch'abel re', kan jari' toq ri samajela' richin ri rey ri ek'o chiri' xkitz'apej rupalej ri Amán, retal chi nibeken.
9Y k'o k'a jun chike ri eunuco ri nilin richin ri rey, ri rubini'an Harboná; xch'on y xubij chire ri rey: Ri Amán runaban kan jun che' pa rachoch, ri jubama oxlajuj jaj rik'in jun q'a'aj jotol chikaj, richin nutzeqeba' ri Mardoqueo ri xkolon ri ak'aslen rat nu-rey, xcha'. K'ari' ri rey xubij chi ja ri Amán ri xtitzeqebex chutza'n ri che' ri'. 10Keri', ri Amán xtzeqebex k'a chutza'n ri che' ri', pa ruk'exel ri Mardoqueo. Y rik'in k'a ri' xik'o-qa ri royowal ri rey Asuero.
Currently Selected:
Ester 7: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
