Ecl 7
7
Más utz naben ri más k'atzinel
1Más rejqalen ri etaman awech chi at jebel,
ke chuwech nakusaj jun jubulej aq'om.
Más k'a rejqalen ri q'ij richin ri kamik,
ke chuwech ri q'ij richin alaxik.
2Más utz yatapon pa jun jay ri akuchi k'o xken-el,
ke chuwech yatapon pa jun jay ri akuchi najin-wi jun nimalej wa'in,
roma rik'in ri kamik ri k'o chi napon ri wineq chiri';
y ri k'a nik'oje' na kan, k'o chi nuch'ob chi rija' chuqa' xtapon chuwech ri kamik.
3Más utz ri bis ke chuwech ri tze'en,
roma ri nibison awech nuben chawe chi jebel yach'obon pan awánima.
4Ri ránima ri wineq ri k'o runa'oj, nich'obon pa ruwi' ri kamik,
jak'a ri wineq ri maneq runa'oj, xa ja ri nimaq'ij nuch'ob.
5Más utz nawak'axaj ruch'olinik jun wineq ri k'o runa'oj,
ke chuwech nak'ul ri nikiya' aq'ij ri winaqi' ri maneq kina'oj.
6Roma ri rukikoten ri wineq ri maneq runa'oj,
xa kan achi'el ri k'ix toq nich'itit pa q'aq' chuxe' ri bojo'y.
Chuqa' ronojel re' xa kan q'axel.
7Kan qitzij wi chi toq niq'at rusamaj jun aj-na'oj nisach ruk'u'x,
y toq nipuaqix niyojtej rubanik ri ránima.
8Más kikoten nak'is rubanik jun samaj,
ke chuwech k'ari' natikeriba-el,
más utz ri wineq ri ch'uch'uj ránima,
ke chuwech nim nuna' roma nuch'ob chi k'o runa'oj.
9Man kan chi'anin tipe awoyowal, roma ri yebanon keri' xa ja ri winaqi' maneq kina'oj y kan k'o chik rusok ri oyowal pa kánima. 10Man jun bey tabij-qa pan awánima ¿achike na roma chi ri ojer más utz ke chuwech re wakami? Man jun bey k'a tabij-qa keri', roma re' man ruk'amon ta richin chi nubij jun wineq aj-na'oj.
11Kan janila k'a rejqalen ri na'oj, y keri' chuqa' jun ulew ri nawichinaj kan, roma re' kan k'o ri nuk'en-pe chike ri winaqi' ri ek'o chuwech re ruwach'ulew. 12Ri etamabel kan jun tobel, y kan keri' chuqa' ri méro. Jak'a ri na'oj más rejqalen roma nuben más k'es chire ri wineq.
13Tatz'eta' na pe jebel rusamaj ri rubanon kan ri Dios. Ri kan kotokik rubanon kan rija' chire, ¿k'o kami jun wineq ri nitikir nuben choj chire? 14Toq kan ronojel utz eleneq chawech o toq ronojel xa man utz ta nel chawech, kan toqaqa chi'ak'u'x chi ja ri Dios niya'on-pe ri utz y ri man utz ta, y chi ri wineq man nretamaj yan ta ri achike ri peteneq chuwech-apo.
15Kan k'iy k'a nutz'eton-pe chupan ri ka'i-oxi' q'ij chire ri nuk'aslen ri xa q'axineq chik. E nutz'eton k'a chojmilej taq winaqi' chi stape' xa choj ri kik'aslen, xa chi'anin xeken-el. Nutz'eton chuqa' winaqi' e banoy richin etzelal, chi stape' keri' rubanik ri kik'aslen, xa janila k'iy juna' xek'ase'.
16Man taben chi ja rat ri más at choj chikiwech ri ch'aqa' chik,
ni man taben chi ja rat ri más at aj-na'oj chikiwech ri ch'aqa' chik.
Roma xa jari' ri xtibanon chawe richin yayojtej chikiwech ri ch'aqa' chik winaqi'.
17Man taben chi ja rat ri más at itzel chikiwech ri ch'aqa' chik,
ni man taben chi ja rat ri más at nakanik chikiwech ri ch'aqa' chik.
Roma xa jari' ri xtibanon chawe richin yaken yan el,
y xa man jani tapon ruq'ijul richin ri akamik.
18Kan jebel k'a chi k'o jun ri achapon rubanik,
xaxe k'a man tamestaj chi k'o chuqa' jun chik ri kan k'o chi naben,
roma ri k'o rukiy ri Dios chuwech, kan ronojel utz nel chuwech.
19Ri na'oj ri k'o rik'in jun wineq aj-na'oj kan nuya' janila ruchuq'a',
jun uchuq'a' más nim ke chuwech ri kuchuq'a' lajuj q'atoy taq tzij pa jun tinamit.
20Kan keri', chuwech re ruwach'ulew man jun ri kan choj ruk'aslen, ri kan xaxe ta ri utz nuben y man ta nimakun.
21Man k'a tik'oje-qa chi'ak'u'x ronojel ri tzij ri nawak'axaj, richin keri' man nitike' kan pan awánima ri tzij ri yerubij ri asamajel chawij. 22Roma xaxe k'a rat at etamayon jebel janipe' bey at ch'owineq chikij ri ch'aqa' chik.
Ri na'oj kan janila nim
23Ronojel re' kan rik'in k'a na'oj xintejtobej, roma xinwajo' ta xinok jun wineq aj-na'oj, xa jak'a ri na'oj janila nim y man tikirel ta richin ninq'i' ronojel. 24Ri na'oj kan nej-nej xk'oje-wi kan chuwe, y man xinq'i' ta. Kan nim-nim k'a rupan, y man xinwil ta ri ruxe'. ¿Kan k'o ta kami jun wineq ri nuq'i' ta y nretamaj ta ronojel? 25Man rik'in ri', kan beneq nuk'u'x chirij chukanoxik y chi retamaxik ri na'oj, roma kan xinwajo' ta xinwil ri ruxe'. Xinwajo' ta chi ri nunojibal kan ta nitikir nusol-rij ri achike k'a roma toq k'o ronojel, y jari' toq kan xinwil k'a chi ri etzelal nipe roma maneq qana'oj. Y re maneq qana'oj xa roma qach'ujilal. 26Yin kan xinwil chuqa' jun ri más ruk'eyul ke chuwech ri kamik, y ri' jun ixoq ri nuya' pikbel. Rija' achi'el jun kolo', y ri ruq'a' e achi'el cadena. Ri achin ri jebel chuwech ri Dios nanimej chuwech jun ixoq keri', jak'a ri man jebel ta chuwech ri Dios kan chi'anin niqaqa pa ruq'a'.
27Yin ri yich'abalin ri ruch'abel ri Dios, xinapon k'a pa jun ramaj toq kan xbesaqir-pe chinuwech, chirij ri nuch'obonik ri nubanon-pe chikij chi jujun chi jujun ronojel ri k'o. 28K'a re wakami kan janila k'a nukanon-pe richin chi ninwetamaj ta ri achike k'a roma ek'o ronojel, jak'a xa man wilon ta. Xa choj keri' in samajineq achi'el toq yich'on chikij ri achi'a' y ri ixoqi'. Chikikojol 1,000 achi'a' kan wilon-wi jun utz, jak'a chikikojol ri ixoqi' kan man jun ri utz ta wilon. 29Chuqa' xinwil y xinwetamaj chi ri Dios kan choj rubanik ruk'aslen ri wineq rubanon chire, xa jak'a ri wineq xa ja ri rubey ri etzelal ri xuk'uaj kan.
Currently Selected:
Ecl 7: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
