Deut 29
29
Ri jikibel-tzij ri xuben ri Jehová rik'in ri tinamit Israel pa Moab
1Y keri' chupan ri q'ij ri' ri Moisés xtane' chubixik chike ri ruwinaq re ruka'n jikibel-tzij re', toq k'a ek'o na chiri' pa Moab. Y ri nabey jikibel-tzij xban ojer kan chiri' pan Horeb.
2K'ari' ri Moisés xerumol k'a konojel ri ruwinaq y xubij chike: Rix xitz'et k'a ronojel ri xuben ri Jehová ri chiri' chupan ri ruwach'ulew Egipto, chire ri rey, chike ri rusamajela' y chire chijun ri ruwach'ulew. 3Kan xitz'et k'a ronojel ri nima'q taq tejtobenik y ri nima'q taq retal y ri meyel taq banobel ri xuben. 4Stape' rik'in ronojel re xitz'et, rix kan man niq'ax ta chiwech. 5Roma chupan ri kawineq juna', toq xixinyuqej chupan ri tz'iran ruwach'ulew, kan man xtziaqir ta ri itziaq ni ri ixajab. 6Stape' kan man k'a itijon ta kaxlan-wey y man iqumun ta vino y ni ta jun chik ruwech ya' ri ch'amirineq chik ri niq'abarisan, jak'a ri Dios kan ruya'on iway más utz, y re' richin chi niwetamaj chi ri Jehová jari' ri qa-Dios.
7Y toq xojoqaqa re wawe' xojkichop chi oyowal ri Sihón, rey richin ri Hesbón, y ri Og rey richin ri ruwach'ulew Basán, y roj kan xeqach'ek. 8Y xqak'en kan ri kiruwach'ulew y xqaya' chike ri tzobaj richin ri Rubén, richin ri Gad y chike ri nik'aj tzobaj richin ri Manasés richin xkichinaj. 9Kan titaqej k'a ri ruchojmilal y kan tibana' ri achike ri nubij, richin keri' kan ronojel k'a utz xtel chiwech ri xtiben.
10Wakami chi'iwonojel rix kan imolon-pe-iwi' chuwech ri Jehová ri qa-Dios: Ri e aj-raqen richin ri tzobaj achi'a' ri k'o kiq'ij, ri samajela' richin ri tinamit y konojel ri achi'a' ri e qawinaq, 11ri taq iwalk'ual, ri iwixjayilal y ri man e iwinaq ta ri ek'o chi'ikojol, nitiker-el rik'in ri nich'aron ri isi' k'a rik'in ri neran ri iya'. 12Roj qamolon-qi' wawe' richin chi noqaqa chi'ik'u'x richin nitaqej ri jikibel-tzij ri xiben rik'in ri Jehová ri qa-Dios. 13Wakami kan nijike' k'a kan chi roj kan oj rutinamit y rija' kan qa-Dios achi'el ri rusujun chiqe y chike ri qati't-qamama': Ri Abraham, ri Isaac y ri Jacob. 14Y man xaxe ta qik'in roj re qamolon-qi' wawe' nuben ri Jehová re jun jikibel-tzij re' y re jun ya'on-tzij re', 15xa kan keri' chuqa' kik'in ri man jani ke'alex. 16Rix iwetaman jebel ri achike chi k'aslen ri xqaq'axaj-pe pan Egipto, ri xqaben toq xojq'ax chikikojol ri nima'q taq ruwach'ulew y ri achike xqak'uluwachij pa taq bey. 17Y chuqa' xitz'et ri itzel taq kibanobal ri xekiben rije', toq xekiben wachibel ri e banon rik'in che', rik'in abej, rik'in saqipueq y q'anapueq. Y ri winaqi' ri' jari' ri nikiya' kiq'ij. 18Wakami k'a man jun tuch'er kan ri' y numestaj ta kan ri Jehová ri qa-Dios, ni ta achi'a', ni ta ixoqi', ni ta ri alk'ualaxela' y ni ta ri iy-mam y ri ach'alalri'il ri richin ri tinamit, richin ye'isamajij y niya' kiq'ij ch'aqa' chik dios kichin ri winaqi' ri e richin ri ruwach'ulew ri'; roma wi k'o jun nibanon keri' chi'ikojol xa kan nok k'a achi'el ruxe' che' ri k'ey-k'ey y nikamisan.
19Rik'in juba' toq iwak'axan chik ri ch'abel richin ri ya'on-tzij k'o jun chi'ikojol ri kan janila xtuna-ri' y xtubij-qa: Yin kan man jun xtink'uluwachij stape' xtinben ronojel ri niqa' chinuwech yin, xticha-qa; y jari' ri xtibanon chi xtipe wululen chiqij qonojel. 20Ri Jehová kan man jun bey xtukuy rumak ri wineq ri nich'obon keri', xa kan xtrelesaj royowal chirij ri wineq ri', y kan xtuya' ri itzel oyonik pa ruwi' achi'el ri tz'ibatajineq kan chupan re jun wuj re', y kan xtuk'is-el jumul ri rijatzul chuwech re ruwach'ulew. 21Y ri Jehová xtuch'er-el ri wineq ri nibanon keri' chikikojol konojel ri qawinaq y xtuben chire richin janila xtutej poqon achi'el ri etzelanik ri xtz'ibex kan chupan ri wuj richin ri pixa'. 22Ri iwijatzul ri xkepe chiwech-apo y keri' chuqa' ri man e iwinaq ta ri yepe nej, xtikitz'et ri tijoj-poqonal y ri yabilal ri ruya'on ri Jehová pa ruwi' re ruwach'ulew re'. 23Y xtikitz'et k'a chi ri chiri' kan xtok kan tz'iran ruwach'ulew, xa kan xaxe chik ri chuwilej-abej, atz'an y k'atineq ulew k'o y man niwachin ta chik y ni ta q'ayis man nik'ase' ta chik chuwech, roma kan xtibanatej rik'in achi'el ri xbanatej kik'in ri tinamit Sodoma, Gomorra, Admá y Zeboím, roma ri Jehová xyakatej janila royowal chikij y xeruk'is.
24K'ari' ri winaqi' richin ronojel ruwach'ulew xtikik'utuj ri achike roma ri Jehová xyakatej royowal y xuben kere' chire re jun ruwach'ulew re'. 25Y k'ari' xtibix k'a chikij: Kela' xkik'uluwachij roma xkimalij kan ri rujikibel-tzij ri Jehová ri ki-Dios kan ri kati't-kimama', ri jikibel-tzij ri xuben kik'in toq xerelesaj-pe pan Egipto. 26Xa xekitzeqelibej-el ch'aqa' chik dios y xexukutaj chikiwech richin xkiya' kiq'ij, y re dios re' xa man ketaman ta kiwech y chuqa' man jun ri kik'ulun ta pa kiq'a'. 27Roma ri' ri Jehová janila xyakatej royowal chirij re ruwach'ulew re' y xuya-pe pa ruwi', ronojel ri itzel oyonik ri tz'ibatel kan chupan re jun wuj re'. 28Y rik'in k'a ri janila royowal, ri Jehová xerelesaj-el chupan re kiruwach'ulew, y xerutaluj-el pa ch'aqa' chik ruwach'ulew, achi'el re niqatz'et k'a re q'ij re', xkecha'.
29Ronojel ri man tz'etel ta pa ruq'a' ri Dios ek'o-wi, jak'a ronojel ri e q'alajirisan kan, qichin k'a roj y kichin ri qalk'ual, richin jantape' niqataqej ronojel ri ruchojmilal richin re pixa' re'.
Currently Selected:
Deut 29: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
