Am 9
9
Man jun xtikolotej kan chupan ri ruk'ayewal ri xtuteq-pe Dios
1Yin xinben chik jun achi'el achik', y xintz'et ri Jehová pa'el chunaqaj ri porobel, y xubij chuwe:
Ke'asiloj ri ruwi' pilar richin xkekorotej ronojel che';
richin nitzaq-qa ronojel pa kiwi' ri winaqi'.
Y ri xkekolotej kan, ja yin xkikamisan kichin rik'in espada.
Kan man jun xtitikir xtiberewaj-ri', ni man jun xtukol kan ri'.
2Stape' xtikewaj kan ki' chuxe' re ruwach'ulew
yin kan xkenwelesaj-pe k'a chiri'.
Chuqa' stape' xkejote-q'anej nej chire ri kaj
yin kan k'a chiri' xkenbenqasaj-wi-pe.
3Chuqa' stape' xtikewaj-ki' pa ruwi' ri juyu' Carmelo
kan k'a chiri' xkenwil-wi-pe.
Stape' nibekewaj-ki' chinuwech chupan ri palou,
yin xtinteq ri chikop aj pa ya' chikij richin xkeruk'is.
4Wi xke'uk'uex-el pa ximonri'il koma ri e etzelanel kichin,
xtinben chi xkekamisex rik'in espada.
Xtinben ronojel re' roma xinch'ob yan chi xtinya' ruk'ayewal pa kiwi'.
y man xtinya' ta urtisanik pa kiwi'. xcha' ri Dios.
5Ri Jehová ri Dios ri k'o ronojel uchuq'a' pa ruq'a',
nuchop-qa juba' ri ruwach'ulew y ri ulew kan niya'er-qa.
Kan jari' toq konojel ri winaqi' nikichop oq'ej.
Chupan ri q'ij ri' ri ruwach'ulew kan nijote' y niqaqa
achi'el nuben ri raqen-ya' Nilo.
6Ri Jehová chila' chikaj xuben-wi ri rachoch,
y ri ruxe' ri rachoch k'o-pe chuwech ri ruwach'ulew.
Rija' kan yerumol ri ya' richin ri palou,
y k'ari' nuya'aj chijun ri ruwach'ulew.
Jehová jari' ri rubi' rija'.
7Ri Jehová nubij: Chinuwech yin, rix israelita xa ix junan kik'in ri winaqi' etíope.
Yin xixinwelesaj-pe pa ruwach'ulew Egipto.
Chuqa' xenwelesaj-pe pa ruwach'ulew Creta ri aj-Filistea.
Y chupan ri ruwach'ulew Quir xenwelesaj-pe ri winaqi' Sirio.
8Yin Jehová xintz'et yan k'a chi rix kan ix janila aj-maki'.
Roma ri' kan xkixinwelesaj-el chuwech re ruwach'ulew.
Jak'a man xkixink'is ta el jumul.
9Yin kan xtinben chiwe rix israelita achi'el xa ta xkixinchayuj kan,
achi'el toq nichayux ri trigo.
Rix ri yixtzeqeliben wichin kan xkixtalutej k'a el pa taq ruwach'ulew.
Jak'a ri man xkinkitzeqelibej ta xa xke'ok achi'el q'ayis ri nichayutej kan.
10Chi'iwonojel rix ri ix aj-maki' xkixken rik'in espada;
stape' nibij chi re' man xtibanatej ta,
stape' nibij chi ri ruk'ayewal man xtiqaqa ta chiwij.
11Chupan ri q'ij ri' yin xtinyek chik q'anej jun bey ri rajawaren ri David,
achi'el niyak-q'anej jun jay wulatejineq.
achi'el toq ninojisex chik ruwech ri tz'aq;
achi'el toq niyak chik q'anej ri wulatejineq kan.
Y kan xtinben chik chire achi'el ri rubanon ojer kan.
12Rix kan xtok k'a iwichin ri ruwach'ulew Edom,
y konojel ri ch'aqa' chik ruwach'ulew ri kan e wichin yin.
Yin Jehová kan ninya' nutzij chi kan xtibanatej.
13Xtapon k'a ri q'ij toq xtiwachin janila trigo;
kan k'a man jani tik'ol ronojel tiko'n,
kan ja yan ri' nijosq'ix chik jun bey ri ulew.
Chuqa' xtapon k'a ri q'ij toq xtiwachin janila uva;
kan k'a man jani tik'is ri ruyitz'ik ri uva,
kan ja yan ri' nitik chik qa ch'aqa'.
Y kan pa ruk'iyal k'a vino ri xtik'oje',
kan xtuben k'a achi'el jun raqen ya' ri nibiyin pa juyu'.
14Kan keri' k'a xtibanatej chi xkixinwelesaj-pe pa ximonri'il rix israelita.
Xtipabex chik q'anej jun bey ri itinamit ri e wulatejineq kan,
richin xkixk'oje' chik jun bey chiri'.
Rix xtitik chik qa i-uva y xtiqum chik ri vino.
Chuqa' xtitik qa jalajoj ruwech che' y kan ja rix xkixtijo.
15Kan jebel xkixinya' chik chupan ri iruwach'ulew
achi'el jun che' ri jebel tikil.
Y man jun chik xtelesan-el iwichin, akuchi xkixinya-wi.
Yin Jehová ri i-Dios ri yibin.
Currently Selected:
Am 9: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
