2 Sam 22
22
1Toq ri David xkolotej yan roma ri Jehová pa kiq'a' ri etzelanel richin, y pa ruq'a' ri Saúl, jari' toq xuben re jun bix re' chire ri Jehová:
2Jehová, yin kan janila yatinwajo',
roma kan ja rat yaya'on wuchuq'a'.
3Jehová, rat kan at achi'el k'a jun abej ri ninwewaj-wi' chirij,
achi'el jun jay ri akuchi utz ninto-wi-wi'.
Rat kan yinakol-wi.
Kan xtinkuquba' k'a nuk'u'x awik'in.
Ja rat k'a ri at nutobal yin.
Rat yinakol chikiwech ri e etzelanel wichin.
Ja rat k'a ri yato'on wichin chuwech ronojel.
4Kan ninnataj k'a ri abi' rat Jehová,
roma kan ruk'amon richin niya'ox aq'ij-ak'ojlen.
Y yinakol chikiwech ri e etzelanel wichin.
5Ri kamik kan xsutin k'a chuwij.
Jalajoj k'a ruwech etzelal xrojqaj-ri' chuwij,
roma ri' kan janila xinxibij-wi'.
6Ri kamik xurarij k'a chuwaqen achi'el nuben jun kolo'.
Kan xuben k'a chuwe richin yiqaqa chupan ri pikbel richin kamik.
7Chupan k'a ri nimalej bis ri' xich'on rik'in ri Jehová.
Xink'utuj utzil chire richin yiruto'.
Rija' kan xirak'axaj-pe k'a ri akuchi-k'o-wi.
Ri nuch'owen rik'in xapon k'a chuwech rija' y kan xrak'axaj.
8K'ari' xpe jun nimalej silonel;
y kan xesilon k'a ri ruxe' ri juyu'.
Kan chijun k'a ruwach'ulew xsilon roma kan xpe royowal ri Jehová.
9Roma ri royowal, ri pa rutza'n kan xel k'a pe sib;
ri pa ruchi' kan xel-pe q'aq' ri kan nuk'is ronojel;
y kan xk'a'on k'a ri racheq-q'aq'.
10Xujeq k'a ri kaj, y xqaqa k'a pe,
y xpa'e' k'a pa ruwi' ri q'equ'm sutz'.
11Xch'oke' k'a el chirij jun querubín,
y xexik'an-el pa kaq'iq'.
12Chupan k'a ri q'eqel-sutz' xupis-wi-ri'.
Ri sutz' ri' kan q'eq-q'eq rubanon,
achi'el nuben toq niqaqa yan jun kamik job.
13Chupan k'a ri sutz' ri' xel-pe rusaqil ri Jehová.
Jari' k'a toq xqaqa-pe saqboch, koyopa' y q'aq'.
14Ri nimalej Jehová xch'on k'a pe chupan ri sutz' ri'.
kan janila kow xch'on achi'el niq'ajan ri koqolajay.
15Xuk'eq k'a pe ri koyopa' achi'el nuben jun ch'ab.
Y rik'in re' xuben chi xkitaluj-el-ki' ri e yakatajineq chuwij.
16Xeri' xbeq'alajin-pe ri nima'q taq siwan ri ek'o chupan ri palou,
y kan xtz'etetej k'a ri ruxe' ri ruwach'ulew.
Ronojel re' xa roma ri ruch'abel ri Jehová,
roma ri nimalej ruxla'.
17Ri Dios kan k'a chila' chikaj k'a xuya-pe ri ruq'a' chuwe.
Xirelesaj k'a chupan ri janila chi ruk'ayewal achi'el xa ta xirelesaj chupan jun palou.
18Xirukol pa ruq'a' ri más nim etzelanel wichin,
stape' rije' kan más e k'iy y kan ik'owineq chik ruwi' kuchuq'a' chinuwech yin.
19Xinkichop k'a toq yin ink'o pa ruk'ayewal.
Y kan jari' toq xiruto' ri Jehová.
20Jak'a ri Jehová xikolon y xiruya' ri akuchi kan janila jebel.
Roma kan janila yirajo' xirelesaj chupan ri ruk'ayewal.
21Ri Jehová xuya' k'a ri ch'akonik chuwe yin.
Roma k'a ri ruch'ajch'ojil ri wánima,
xuya' chuwe ri ruk'amon.
22Yin kan nuchajin k'a wi' chuwech ri Jehová;
kan man nuch'aron ta k'a kan wi' chupan ri bey ri richin ri Dios.
23Kan nintzeqelibej k'a ri rupixa' ri Dios,
roma chuwe yin achi'el jun utzilej bey.
Y kan man xtinch'er ta k'a kan wi' chire.
24Yin kan choj k'a in biyineq chuwech rija',
y kan nuch'aron k'a wi' rik'in ronojel ruwech etzelal.
25Roma ri ruch'ajch'ojil ri wánima chuwech ri Jehová,
xa roma ri' rija' k'o xuya' chuwe.
26Roma rat Jehová kan man namalij ta ri man yarumalij ta rat.
Kan choj k'a naben rik'in ri choj nibiyin chawech.
27Rat kan at utz rik'in ri utz ruk'aslen.
Jak'a kan naya' rutojbalil-mak pa ruwi' ri man nutzeqelibej ta ri abey.
28Rat kan ye'akol ri nikiqasaj-ki' chawech.
Chuqa' kan naqasaj kiq'ij ri kinimirisan-ki' chawech.
29Ja rat Jehová ri yasaqirisan ri nubey.
Rat k'a yasaqirisan chupan ri q'equ'm.
30Rik'in ri awuchuq'a' rat, yin yitikir yenk'is jun tzobaj aj-labal.
Chuqa' yitikir yentzeq ri nima'q taq tz'aq richin ri kitinamit rije'.
31Ri Jehová kan choj-wi ri rubey,
y ri rupixabanik kan janila ch'ajch'oj
achi'el ri q'anapueq ri ya'erisan pa q'aq'.
Rija' kan yojruto' k'a qonojel roj ri niqakuquba' qak'u'x rik'in.
32Roma ri' xa kan xaxe k'a ri Jehová ri Dios k'o.
Kan man jun chik achike ta xtito'on qichin.
33Ja rija' ri niya'on ronojel wuchuq'a'.
Kan nuk'ut k'a chinuwech ri chojilej bey.
34Kan xuya' wuchuq'a' richin anineq xibiyin chupan ri k'echelaj,
achi'el nanin jun masat.
35Ja rija' ri nibanon chuwe richin yich'akon pan oyowal.
Nuben chuwe richin yitikir ninkusaj ri rute-ch'ab ri banon rik'in q'enq'oj-pueq.
36Ja rija' ri niya'on ri ch'akonik chuwe.
Rija' kan yirutemej,
y kan yiruto' richin yibe pa jotol.
37Kan nutaq'ajuj k'a ri nubey, richin yin man yijilijo' ta.
38Yin kan xentzeqelibej ri e etzelanel wichin y kan xenq'i'.
Man xitzolin ta, k'a xenkamisaj na kan konojel.
39Kan xenxeq' kan konojel,
y xepunupuxin kan ke taq ri'.
40Ri Jehová xuya' wuchuq'a' richin xich'akon.
Xuben chike ri e etzelanel wichin richin xkiqasaj-ki' chinuwech.
41Xuben k'a chi ri e etzelanel wichin xa xe'animej-el chinuwech.
Y keri' kan xich'akon k'a chikij.
42Xkik'utuj k'a kito'ik,
jak'a man jun xto'on kichin.
Kan xkoyoj k'a chuqa' ri Jehová, jak'a rija' man xerak'axaj ta.
43Kan xenxeq' chi'aqen richin xe'ok poqolaj ri nuk'uaj ri kaq'iq'.
Kan xenwelesaj k'a el achi'el toq nik'aq ri ch'abeq pa taq bey.
44Ri Jehová kan xirukol k'a chuwech ri koyowal ri winaqi' ri man nikitzeqelibej ta rija'.
y kan xuben chuwe richin xinok aj-raqen, pa kiwi'.
Y re wakami xuben chike ri winaqi' ri man wetaman ta kiwech chi yinkisamajij.
45Kan xaxe k'a xkak'axaj ri nuch'abel, kan xkinimaj ri nutzij.
Chuqa' ri man e nuwinaq ta, kan xkiqasaj-ki' chinuwech.
46Kan xelawalo-qa roma xibinri'il.
Y kan yek'ark'ot k'a ye'el-pe ri akuchi kewan-wi-ki'.
47Nimalej ruq'ij ri Jehová roma ja rija' ri tobel wichin yin.
Xtinnimirisaj k'a ri nu-Dios, ri xya'on ri nukolotajik.
48Ja ri Dios ri niya'on ri rutojbalil pa kiwi' ri e etzelanel wichin.
Ja rija' ri yejachon pa nuq'a' ri winaqi' ri man nikitzeqelibej ta rija'.
49Ja rija' k'a ri nikolon wichin pa kiq'a' ri e etzelanel wichin.
Kan nuben k'a chuwe chi kan yich'akon chikij ri e yakatajineq chuwij.
Chuqa' kan yirukol pa ruq'a' ri wineq itzel.
50Roma ri' yin kan xtintzijoj ri nima'q taq rubanobal chikikojol ri winaqi' ri man nikitzeqelibej ta rija'.
Y roma ri' kan xtinbixaj k'a ri rubi'.
51Ri Jehová, toq nucha' jun rey, kan nuya' ch'akonik pa ruq'a'.
Nuya' ri rutzil pa nuwi' yin David, y chike ri e wijatzul richin tibe-q'ij tibe-seq.
Currently Selected:
2 Sam 22: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
