2 Rey 8
8
Ri ixoq aj-Sunem xtzolix ronojel rubeyomel
1K'o k'a jun q'ij chi ri Eliseo xubij chire ri ixoq aj-Sunem ri xuk'asba' ti ral chi tibe y keruk'uaj-el ri ek'o pa rachoch richin yebek'oje' ri akuchi más utz, roma ri Jehová xuteq-pe jun wayjal pa ruwi' ri ruwach'ulew richin wuqu' juna'. 2Ri ixoq xuben k'a ri xubij ri Eliseo chire: Xuk'uaj k'a el ri rachijil y ri ral chupan ri kiruwach'ulew ri aj-Filistea; y chiri' xek'oje-wi wuqu' juna'.
3Toq xq'ax yan k'a wuqu' juna', xetzolin k'a chupan ri kitinamit, y ri ixoq xbe rik'in ri rey richin xberuk'utuj utzil richin titzolix ri rachoch y ri rulew. 4Chupan ri q'ij ri', ri rey richin ri Israel nitzijon rik'in ri Guehazí, ri rusamajel ri Eliseo, y nubij k'a chire chi tutzijoj chire ri meyel taq banobel ri rubanon ri Eliseo. 5Rokik ri Guehazí nutzijoj achike rubanik xuben ri Eliseo toq xuk'asba' ri ral ri ixoq aj-Sunem; jari' toq xapon ri ixoq ri', richin xberuk'utuj ri rachoch y ri rulew ri ruya'on kan. Y ri Guehazí xubij chire ri rey: Ja ixoq re' ri nintzijoj chawe, y ja ak'ual re' ri xya'ox chik jun bey ruk'aslen, xcha'.
6K'ari' ri rey xuk'utuj chire ri ixoq pa ruwi' ronojel re banobel re', y rija' xutzijoj chire. Chirij ri' ri rey xuteq-el jun tata'al y xubij-el chire chi titzolix ronojel ri kan richin ri ixoq, y chi kan tiya'ox chuqa' chire ronojel ri ruya'on-pe ri ulew, ri janipe' juna' ruya'on kan ri rajaw k'a re wakami.
Toq ri Hazael xok kan rey pa Siria
7K'o k'a jun q'ij ri Eliseo xbe pa tinamit Damasco. Chupan k'a ri q'ij ri' ri rey richin Siria ja ri Ben-hadad. Y ri rey ri' kan janila yawa', y xya'ox k'a rutzijol chire chi chiri' xapon ri Eliseo, ri rusamajel ri Dios. 8K'ari' ri rey xubij chire jun chike ri rusamajel ri rubini'an Hazael: Tak'uaj-el jun sipanik, y tabek'ulu' ri rusamajel ri Dios, richin rija' tuk'utuj chire ri Jehová pa nuwi' yin. Tak'utuj k'a chire wi k'a yik'achoj na chire re jun yabilal re' o maneq chik, xcha'.
9Y ri Hazael xbe k'a richin xberuk'ulu' ri Eliseo, y xuk'uaj k'a el nimalej taq sipanik chire ri kan janila rejqalen ri k'o pa Damasco. Ronojel re' xuya-el chikij e kawineq camello. Toq xapon rik'in ri Eliseo, ri Hazael xubij chire: Ri Ben-hadad, rey richin Siria, xiruteq-pe awik'in richin nink'utuj utzil chawe, chi nabij ta chire wi kan nik'achoj chire ri yabil ri chapayon o man nik'achoj ta chik, xcha'. 10K'ari' ri Eliseo xubij chire: Tabij chire ri Ben-hadad chi ri yabil ri chapayon man richin ta kamik, kacha' chire. Jak'a ri Jehová xuq'alajirisaj yan chinuwech chi rija' k'o chi nibeken, xcha'. 11Y ri Eliseo xutzu' ri Hazael, y kan xuben chire chi xkaqer rupalej. K'ari' ri Eliseo xuchop oq'ej.
12Y ri Hazael xubij chire: ¿Achike roma yatoq' wajaw?, xcha' chire.
Y ri Eliseo xubij: Roma wetaman chi rat kan k'iy itzel ri xtabebana' chike ri nuwinaq israelita; y ri tz'aq xtabeya' ruq'aq'al, y xke'akamisaj ri alaboni' rik'in espada. Kan xke'abojla' ri taq ak'uala' chuwech abej, y kan xtachobila' kipan ri ixoqi' ri e yawa'i' chik, xcha'.
13Y ri Hazael xubij: Yin xa man jun ok wejqalen; xa in achi'el jun tz'i' ri man jun rejqalen richin chi ninben ri xabij, xcha'.
Jak'a ri Eliseo xubij: Ri Jehová xuq'alajirisaj yan chinuwech chi rat xkatok rey richin Siria, xcha'.
14K'ari' ri Hazael xtzolin rik'in ri rey richin Siria, y ri rey xuk'utuj chire ri achike xubij-pe ri Eliseo chire. Y ri Hazael xubij: Ri Eliseo xubij-pe chuwe chi ri ayabil man richin ta kamik, xcha'. 15Jak'a ri ruka'n q'ij, ri Hazael xbe rik'in ri rey y xuk'uaj-apo jun pim tzieq. Y xuch'eqeba-el richin xuya' chupalej ri rey; y keri' ri Ben-hadad xken. Chirij re' ri Hazael xok kan rey richin Siria pa ruk'exel ri Ben-hadad.
Ri q'atbel-tzij richin ri Joram pa ruwi' ri ruwach'ulew Judá
(2 Crón 21:1-20)
16Toq ri Joram ruk'ajol ri Acab k'a k'es na, y chupan ri ro' juna' richin ri ruq'atbal-tzij pa ruwi' ri ruwach'ulew Israel, jari' toq xok kan rey ri Joram ruk'ajol ri Josafat rey richin Judá ri chiri' pa Jerusalem, y ri Josafat kan k'a k'es na. 17Ri Joram juwineq kablajuj k'a rujuna' toq xuchop nuq'et-tzij, y waqxaqi' juna' xuq'et-tzij. 18Ri Joram xa rik'in k'a jun rijatzul ri Acab ri xk'ule-wi, y roma ri' kan xuben achi'el ri kibanobal ri Acab y ri e aj pa rachoch, y chuqa' achi'el ri kibanobal ri ch'aqa' chik rey richin ri ruwach'ulew Israel. Y ronojel k'a ri rubanobal kan man xqa' ta chuwech ri Jehová. 19Man rik'in ri', ri Jehová man xrajo' ta xuk'is ri ajawaren richin Judá, roma ri rajowabal chire ri David ri rusamajel. Y roma chuqa' kan rubin chire ri David chi jantape' xtik'oje' jun rijatzul rija' chupan ri ajawaren.
20Rokik niq'aton-tzij ri Joram pa ruwi' ri Judá, ri aj-Edom xkipaba-ki' chuwech rija', y kan xkikanoj-qa jun ki-rey. 21Roma ri' ri Joram xeruk'uaj-el ri ru-carruaje ri e richin oyowal, y xbe pa tinamit Saír, ri k'o pan Edom. Jak'a ri aj-Edom xa xbekisutij-kij, y roma ri' ri Joram y ri achi'a' ri e uk'uayon ri carruaje xeyakatej chaq'a' chikij ri aj-Edom, y xa xe'animej*f3* y xebe pa taq kachoch. 22Keri' ri ruwach'ulew Edom xel chuxe' rutzij ri ruwach'ulew Judá k'a re wakami. Keri' chuqa' xkiben ri tinamit Libná chuwech ri Joram.
23Ri ch'aqa' chik rubanobal ri Joram tz'ibatel kan chupan ri wuj ri akuchi xtz'ibex-wi ronojel ri kibanobal ri rey richin Judá. 24Xken k'a ri Joram y xmuq akuchi e muqun-wi ri rute-rutata', chupan ri tinamit richin kan ri rey David; y ja ri Ocozías ri ruk'ajol, ri xk'oje' kan pa ruk'exel.
Ri q'atbel-tzij richin ri Ocozías pa ruwi' ri Judá
25Toq ri Joram ruk'ajol ri Acab k'a k'es na, y chupan ri juna' kablajuj richin ri ruq'atbal-tzij pa ruwi' ri ruwach'ulew Israel, jari' toq xok kan rey ri Ocozías ruk'ajol kan ri Joram rey richin Judá chiri' pa Jerusalem. 26Ri Ocozías juwineq ka'i' rujuna' toq xuchop nuq'et-tzij, y xaxe ok jun juna' xuq'et-tzij, y ri rati't ja ri Atalía, rijatzul kan ri Omrí ri xok rey richin Israel. 27Ri Ocozías rijatzul k'a ri ruji' ri Acab, y roma ri' kan xuben achi'el ri kibanobal ri Acab y ri e aj pa rachoch, Y ronojel k'a ri rubanobal kan man xqa' ta chuwech ri Jehová. 28Y ri Ocozías xbe k'a rik'in ri Joram rey richin Israel richin nibekibana' oyowal rik'in ri Hazael rey richin Siria, ri chiri' pa tinamit Ramot richin ri ruwach'ulew Galaad. Jak'a ri aj-Siria kan xkisok-el ri Joram. 29Chirij ri' xtzolin pa tinamit Jezreel richin xberaq'omaj ri' chire ri sokotajik ri xkiben-el ri aj-Siria chire, ri chiri' pa Ramot. Y ri Ocozías xbe chuqa' pa Jezreel rik'in ri Joram richin xberuq'ejela' kan.
Currently Selected:
2 Rey 8: KQC
Highlight
Copy
Compare
Share
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.
